Revelesen 14 - Nobonob Baibel

Danab 144,000 ag ahi edappig

¹ Amu da eɗue neekke amu, Sipsip Nag Sion qaukoppa hibaitta dayeye, danab ah 144,000 Nug ele daappig anidmi. Nug onig, amu Nug Mameg onig ele ag uɗalkadppa yaak daapiɗ.

² Ag daaegeg, da hab aabppanu oqotti laa, le okkai buɗuɗuppa noawa oqotti otte amubia, amu hakkaɗ okkai qa, aɗeɗe ugakka oqotti otte amubia ele doomi. Oqotti amuam danab harp qeeg, baag oqotti enanag, musik atteb bette, am amu bia doomi.

³ Ag sia king ⌊anuqak⌋ noobppa hab daup waɗele Kayaknu bauklel aotteb ele, ag noolagppa amu ikki danab noolagppa ele ahi bau edappig. Laa oh ag ahi amu ettaglagnu am elele iitta; danab 144,000 Kayak Nug ag wanppanu danab ah oolagppanu ag hipuninnu qagaiettakppanu eɗua uhuqak heum ele, ag aakkuib ahiettaglagnu elele daappig.

⁴ Danab amu ag ah ele gappai kobolppa ag akka ag dubuttid ii medappig; ag oppiak daatteb. Ag Sipsip Nag aben ohppa gotte amu, ag Nug dim lamidtteb. Amu Kayak Nug danab amu wanppanu danab ah oh oolagppanu hipuninnu qagaiettakppanu eɗua uhuqe, ag ee meu tatam eɗua, ofa Kayak medakkunu daatte, ag amubia ofa Kayak, Sipsip nag ele mataknu daatteb.

⁵ Ag oɗelagppa nai hambuppuak laa ii madippig, ag oolagppa kaliak laa iitta ele.

Engel ewam nai madippig

⁶ Aria, da engel laa nug hagagaɗa, nug Nai Ena bauklel hanhannu ele, danab oh wanppa daatteb, amuam danab ah ag wanppan wan ohppanu, huu ohppanu, nai ohppanu amu beɗulag iɗu iɗu ohppanu ele, ag amelagppa mehuqkkunu hab waappa aben gamag amuppa ugekke anidmi.

⁷ Nug baag okkaippa aum. “Ag Kayaknu ebehilkad oh bodoetta le meeb, ag Nug binag amahlak oppiaawak ele Nug metteg! Aɗinu? Nuhig hettoɗiakppa danab ah epeɗiadkkunu haen aakku neum. Ag laa Nug hab, wan, yu, le, amu le qeppuɗiattak ele he beppig amu, ag Nug noobppa dup nona binag meig!” awa aum.

⁸ Anam a amu engel ebqak 2 nug dim lamitta ba aum. “Aab okkai Babilon onig, ɠagattag ele aakku na qeum! Aakku na qeum! Nug he, danab ah wan atu ohppanu ag danab wain laeg kaaka aqe, kobol kobol hetteb, amubia ag nug ele kobol nau digdig ele, ewau pakkua gappai hak kobol bia heppig,” awa aum.

⁹ Anam a amu engel laa engel aɗit amu dimlamata, engel ebqak 3 amu nug baag okkaippa inam aum. “Aun laa nug doɗ dakkuɗ amu nug dottog ele noolahppa dup noa binag ma, nug uɗappa o eppegppa nuhig epponak keeke aotte amu,

¹⁰ nug Kayaknu wain lakku. Wain amuam oppoɗi bak Kayak Nug danab dilag hipuninnu dootte. Kayak Nug wain amu le ele ii kaboliom. Iitta! Nug oppoɗi bak amu kap-ppa qe noa daatte amu, danab amu lakku. Lawowa, Kayaknu engel noolagppa, amu Sipsip Nag noobppa ele nug guittak okkainab, kalu laa huana eotte onig salpa ewebeb, amuppa guittak aokku.

¹¹ Aab ag guittak madatte ele amu, nuhig kahug amu haen oh tette. Danab ag doɗ dakkuɗ, amu nug dottog ele noolahppa dup nona binag metteb, ag uɗalkadppa o eppelkadppa nug onignu epponak keeke aotteb ele amu, ag tuqan amun ele hik laa ii aomna,” awa aum.

¹² Uug nau danab ah amu dilagppa bekkunu daatte, doyak amuam uug beegeg, Kayaknu danab ah oppiaawak ele ag Kayaknu haknunab anak dim lamidtteb, ag Jesusnu ooppa genab doyak ahilag ele ɠagattag aɗatteb amu, ag tuɗidna uug doyaya eɗittaknuib dabmak awak kobol dim lamidkkulagoitte ippunigtte.

¹³ Aria, da baag laa hab aabppanu doomi amu nug inam aum. “Na nai inam ye! Danab aun aɗi ag Naɗi onignu oolagppa genab dootteb amunu gemu, butti aɗi ele laa heeg, ag mauhtteb ele amu, ag itittak ena aoppig daatteb,” awa aum. Aria, Kayak Ouɗi Nug ele atte. “Ag ahilag uɗatnu hik aoglag. Aɗinu? Ag ahilag hak ena heppig ele amu, amunu nai am ag ele gokkulag,” awa atte.

Ee meu awak haen bia, Kayak danab ah epeɗiadkkunu haen naɗinu ippunittak nai

¹⁴ Aria, da eɗue neekke amu lombig hakkab laappa, da laa danab bekkalag bia, king haɗ golppa hak Nug igippa dayeye, qep aeg ele laa nug eppegppa aɗom amu, nug lombig amuppa dayeye anidmi.

¹⁵ Anitti amu engel laa nug Kayaknu mettid lag ooppanu dimittim doum. Amu nug laa lombig hakkabppa dayom ele baag okkaippa amegppa aum. “Wanppanu meu oh aakku oɗun malappig amunu, wanppanu meu awaknu haen doum. Doum amunu, na qep aeg ele nahip aon gona, meu amu awe!” awa aum.

¹⁶ Nug a amu, laa nug lombig hakkabppa dayom ele Nug qep aeg ele nuhig awa ukka, wanppanu meu okkulatta diiom.

¹⁷ Okkulatta diie amu engel laa nug Kayaknu mettid lag, hab aabppa daatte amu, amuppanu nug ele nuhig qep aeg ele aɗa, dimittim doum.

¹⁸ Aɗeɗe amu engel laa ele nug qaɗabppanu aha doum. Engel amuam qaɗabnu aab aɗu guma atognotte ele. Nug engel qep aeg ele aɗom amegppa ewa aum. “Grep meu oɗun malappig amunu, na qep aeg ele nahip amu aon gona, wanppanu grep meu aɗa auta awak oh okkuladna qagme!” awa aum.

¹⁹ Nug anam a amu, engel amu nug qep aeg ele nuhig amu awa ukka, wanppanu muɗi grep meu ohnab okkulattom. Okkulatta, grep meu qagma, grep meu oh grep meu tappa leppu awaknu aben bappaidppigppa akke noppig. Keeke imuam oppoɗi bak Kayak nug danab dilag hipuninnu dootte ippunigtte.

²⁰ Amu ag grep meu, grep meu tappa leppu awaknu aben aab okkainu aɗ dimittim appa bappaidppigppa tabappig. Tappaeg, grep leppu noa amba eɗua tiig ba, leta dimittim ukka, 296 kilomita ukkom. Unuqag nuhig am hapahapa ewam bia.