Prowerb 9 - Nobonob Baibel

Doyak Dabmak Ena Ele hobul ha, danab ah onilagppa eum

¹ Doyak Dabmak Ena Ele nug nug laug heum. Nug biidod eblaih aɗit okkai amu lagnu uug maoglagnu galattom.

² Nug hobul hekkunu doɗ danab ah madakkunu aqa, babaitta mala, nug wain lanaknu babaitta malowa, aria nug ee lanaknu balal ele babaittom.

³ Nug babaittak uɗat amu oh ha malowa, aria nug maɗi ah nuhikkud ag nuhig nai ekkulagnu aab okkaippa gona, aben attannab, ag amuppa tena ekkulagnu maatte goppig.

^4-5 Nug aun laa nug epeɗia ha dabmak ena awaknu kobol ii dootte ele amu, nug nug amegppa atte. “Aun laa nug doyak ii awak ele amu, nug dahilppa uɗiaɗ! Genab, nug ippa uɗia, ee dahil, wain ele bapaidmi imu lanaɗ!

⁶ Ag doyak ii awak ele aib tuɗidna daan oippig! Ag amu tuɗidna ii hekkulag dayeb, ag bau daaglag; ag diignu doyak tutukku aon oiyeg!” awa atte.

⁷ Am aun nug awa awa qettak danab laa tolidtte amu, awa awa qettak danab nug nug eɗua, awa awa naunab qedakku. Yo, aun nug nau hak danab laa daug batatte amu, nauhak danab amu nug nug eɗua guittak medakku.

⁸ Na awa awa qettak danab daug batappe, nug geha nau ninig ele nahipnu dookku; amge na danab doyak dabmak ena ele laa daug batappe amu, nug nahipnu oo mauhkku.

⁹ Na danab doyak dabmak ena ele nai enappa doyak medappe, nug anamib doyak dabmak ena tuɗid ele daakku. Ao, na genab tutukku hak danab laa doyak aokkunu ippunidppe, nug tuɗid ele doyak okkai ele daakku.

¹⁰ Amu Yawenu ebehi oh bodoetta le mak kobol, amuam doyak dabmak ena ele digma awak aakku Ao, Kayak, Nug oppiaawak ele, Nug dooittak am he, diignu doyak tutukku aakku bette,

¹¹ amunu na da, Doyak Dabmak Ena Ele dim lamiɗkkut dayeb amu, na haen elab wanppa daakkut. Ao, na da, Doyak Dabmak Ena Ele dim lamiɗkkut dayeb amu, da maɗ nahip tuɗidppi, kuɗum daaglag.

¹² Na doyak dabmak ena ele aɗan oippe amu, doyak dabmak ena ele amu na nob ena medakku; amge na awa awa qettak danab daan, na guittak aon oikkut.

Ah onig Kayak Dab-ii-maama Haknu nai

¹³ Ah laa onig Kayak Dab-ii-Maama Hak, ah amu nug baag okkaippa nai maditte. Nug nukka nuhig oiyak ii atognoa enaib oikkunu ii oiya, doyak iitta ele oitte.

¹⁴ Nug nug laug od oɗeppa heɗep na daatte. O nug aab okkai ooppa qauko attannab igippa, appa dayak balal daatte, nug appa ana daatte.

¹⁵ Nug appa dayaya amu, aguppanu nug danab ah nug daatteppa gukkuidna oitteb ele, nug amelagppa qala ewa nai maditte; ag aben laalappa tutukku gokkulagnu gotteb, amge nug ag dooglagnu ewa,

¹⁶ laa amu ag epeɗia ha dabmak ena awak kobol ii dootte ele, nug ag amelagppa ⌊hambuppua,⌋ atte. “Ag laa doyak ii awak ele, ag uɗin, dahil nai doyeg!

¹⁷ Ag le yab aon lana amu, ag ubuhi ele dooglag. Ao, ag ee ahilag iitta aona, lokkumakppa lana amu, ag ubuhi enanag ele dooglag,” awa atte.

¹⁸ Nug anam ⌊hambuppualatta⌋ atte amunu, laa ag nug nai mattie dootteb ele, ag laa, ag nug aɗi maditte, ag amu dim lamidna hena mauhtteb, ag amu dab-ii-mettanna mauhtteb. Ao, laa ag nuhigppa watteb, ag mauheg, boumadtteb.