Obadaia 1 - Nobonob Baibel

¹ Imuam tulegleg Yawe Obadaia ippunitte anttom. Imuam Naɗi Yawenu nai, laa Edomnu dooglagnu meum. “Ig Yawe Nug nai awa ukkak danab laa nug wanppan wan laalappa danab amelagppa nai ab dooglagnu me ukkom doomut. Ao, danab Yawe me ukkom ele, nug nai imu ab dooglagnu me ukkom. ‘Ahappeg ig Edom banelag gotu!’ ”

Yawe Nug Edom dilag bu awak amu he, miag atiom

² Amu Yawe Nug atte. “Esau buɗub, da heppi, ag wanppan wan oh oolagppa nakoknab daaglag; danab ag ahilagnu ena iinab doon autna autnanab aoglag.

³ Ag Edom danab, ag qauko igippa daatteb. Ao, ag ahilag aab baippa kalatteb. Ag anam daanna, ag dada danab bena daatteb. Ag anam daatteb, amge keeke amu buppualatte, ag eheɗ dabmena, nai mattinna, ‘Aun ig eɗikkeb, ig neta qekkunignu laa iitta,’ anana oitteb, amge iitta!

⁴ Ag ai igel hagagaɗa attannab tette bia attannab tekkulagtai. Ge, ag teɗ ahilag hoɗoppai oolagppa appa bappaidkkulagtai. Anam amge ag amu heloblob, da, Yawe, da heppi, ag nena qena, nauhna autna aoglag.” Yawe Nug anam awa atte.

⁵ Yawe Nug anam atte, amu Nug imu ele atte. “Edom danab, haen naunab nau ahilagppa bekkun daatte. Yab danab ag tuqan nahip-ppa uɗiglag dayeb, ag aɗi keeke yab aoglagnu oolag hette aakkuib iite aon gokkulag? Ao, danab ag grep meu aotteb ele, ag grep dad nahip-ppa grep meu aoglag dayeb, ag Yawe aum bia daɗek danab grep meu nakok aon lakkulagnu ag grep meu laippu laippu iite uumna? ⌊Amge Edom danab, ahilkad kekeɗ ag uɗin, ag heppeg, ag Edom ag nauhna autna aoglag.⌋

⁶ Kekeɗ ag uɗin, Edom wan ooppa aɗi keeke ena ahilag daatte amu, ag anidna akkan gokkulag. Ao, ag uɗin, aben ohppanab, aben miag atiakib iitta, aben lokkumak ele, ag aben ohnab neegna, aɗi en daatte anidna, akkan gokkulag.

⁷ Danab wan atu laihnu ag ehanadkkulagnu ag ele nug tituanak heppig amu, ag wagai mena, ag ag Edom, ag ahilag wanppanu lamadkkulag. Ag lailkad ag ag hambuppualadna, ag eɗadkkulag. Ag lailkadnab bia, ag ahilag ee latteb amu, ag ahilagnu pelem laa mekkulag; amge ag Edom, ag amunu nakok laa ii doomna.

⁸ Haen amuppa da, Yawe, da heppi, kekeɗ ag danab doyak dabmak ena ele oh ag Edom wanppa daatteb aqappeg mauhkkulag. Ao, da heppi, ag danab oh ag diignu doyak tutukku ele Edom wanppa daatteb, ag Esau buɗub amu, ag mauhna, iitta mekkulag.

⁹ Teman am Edomnu aab okkai, amu appan ban danab ag eheɗ nau baɗaglag. Danab oh Edom wanppa daatteb amu, kekeɗ ag aqappeg mauhkkulag.” Yawe Nug anam awa atte.

Diig aɗinu Edom danab ag bu anam aoglag

¹⁰ Amu Yawe Nug inam atte. “Aɗinu ag Edom danab, ag anam aoglag? Diig am iikku. Ag ag lailkad Israel danab ah guittak nau mauhnoak madappig. Ag amu heppig amunu, uɗa nak ag tonatta daakku. Ao, geha ahilkad kekeɗ ag ag oɗoɗadppeppeg, ag nauhna autna aoppeg, hanhan anamib daakku.

¹¹ Ag Edom, ag Israel ele ag tiilag laippu bia, ag lailkad am ag, amge kekeɗ ag Israel eɗattegeg, ag Edom ag Israel nakok laa ii ehanatteg, kekeɗ, ag aab diig daup iitta amu, ag ban hena, Israel dilag keeke aon goppig. Ao, kekeɗ laihnu amu ag Jerusalem appa aun nug keeke hamu awa, mawa gokku dooglagnu om yaaegeg, ag Edom ag hamuib hippaidna daanna, Israel ehanadkkulagnu uun daappig. Ag Israel dilag kekeɗ laa bia heppig.

¹² Ag uug ag lailkad Juda dilagppa beum haenppa, ag amelag guhigppa ii neekkadlob am ena, amge ag anam neekkadppig. Ao, kekeɗ ag heeg, ag lailkad Juda danab ah nauhppig, ag Edom, ag gamag ahak ii doolob am ena, amge ag gamalag ahom. Uug amu Israel dilagppa be, ag Edom ag akka akka ag onilag ii humalob am ena, amge ag anam heppig.

¹³ Ao, kekeɗ ag Israel eɗattegeg, ag Edom ag Israel dilag aab anen anen ooppa ii golob am ena, amge ag goppig. Kekeɗ ag lailkad Israel aqaegeg nauhppig haenppa, ag Israel ag amelag guhigppa ii neekkadlob am ena, amge ag anam heppig. Ge, kekeɗ ag Israel eɗadna heeg, kuɗum mauhadppig, laa ag diin goppig ele amu, ag Edom ag kekeɗ amu heegeg, ag gona, Israel laulkadppanu en okkai yab akkan gona, en okkai ele daappig. Ag amu ii helob am ena, amge ag anam heppig.

¹⁴ Ag Edom ag ib oɗatleppa daanna, Israel oolppig aqadkkulagnu ii daalob am ena, amge ag amu heppig. Ge, uug naunab amu haenppa, haen amuppa Israelnu laa ag kekeɗ eppelagppa ii mauhppig, ⌊ag oolna ukkaegeg,⌋ Edom ag, ag aɗualadna, kekeɗ eppelagppa ii maadlob am ena, amge ag anam heppig.

¹⁵ Aɗinu ag anam ii helob? Da, Yawe, dahil deɗ naɗi am miag uɗiom daatte. Deɗ amuppa da wanppan wan ohnu danab ah epeɗiadkkul! Ag Edom, ag laa dilagppa heppig amu, amubia ahilagppa bekku. Ao, ag aɗi eheɗ heppig amu, eheɗ hak amuam eɗua, ag qaɗelagppa daakku.

¹⁶ Amunu, qauko dahilnu tituanak daatteppa, appa dahilad danab ah ag bu awak okkainab aon malappig, amubia wanppan wan laa oh ag ele bu amubia, amge amu eɗittak aoglagoitte. Ag aona, ag ii daappig bia daaglag.

¹⁷ Amge dahilad danab ah uug haenppa ii mauhkkulag amu, ag qauko Sion, appa ehanittak aon daaglag. Sion am dahilnu tituanak daakku. Anam amu, Israel danab ah ag eɗun, ag aulag wan, da, Yawe, da ag mattami amu, ag amu eɗun aoglag.

¹⁸ Haen amuppa Israel danab ah ag aab ewa daatte bia daaglag. Ao, Israel danab ah ag aab dittiak bia daaglag. Ag anam daappeg, Edom danab ah ag wit keeke gumu qaɗaiettaknab bia daaglag. Aab wit keeke gumu qaɗaiettaknab ewe, iitta mette, amubia Israel ag Edom eɗadna autna aon heppeg, Edom, Esau buɗub, ag iitta mekkulag. Edom wanppa amu, danab laippu laa bau ii daama.” Yawe Nug anam aum daatte amunu, am anam bekku.

¹⁹ Dimppa, danab ah gemu Judanu wan maha onig Negeb appa daatteb, ag wana, Esau buɗubnu wan Edom, ag wan amu aon daaglag. Danab ah ag Juda wanppa qauko okkai diigppa qauko nakok daattebppa daatteb, ag am ahan, Pilistia danab dilag wan aon, amuppa daaglag. Ag ele Israelnu wan, am Samaria ele aon daaglag. Benyamin danab ag Gileat wanppa daaglag.

²⁰ Haen amuppa diia ukka laih me dayak danab ah Israelnu ag Kanan wanppa daaglag, ag wan aoppeg ukkeb ukkeb, Sarepat batak daaglag. Amu diia ukka laih me dayak danab ah Jerusalemnu gemu Separad daatteb, ag eɗun, ag wanelagppa uɗin, ag Negeb wanppan aab aon daaglag.

²¹ Amu danab Yawe Nug ag Israel ehanatteg, qagaiettakppa ii daamnanu tituanadkku, huu amu ag qauko Sion, ⌊Jerusalem daatteppa,⌋ ag appa tena, ag Edom wan gumaglag. Amu Yawe Nug nukka, Nug ahilag king daakku.