Nehemaia 3 - Nobonob Baibel

Aun aɗi ag aɗ bappaidppig

¹ ⌊Danab imu ag am Jerusalemnu aɗ, aɗnu od ele heppig.⌋ Mana mettak ikki danab Eliasip, mana mettak danab laa ele ag od onig Sipsip Od tatam eɗun babaittona, ag od okkainu od naunau ele bappaidna aihadna, Kayaknu tituanna mettona, ag aɗ appanu digmena eɗun babaittegeg ukke, lag attan ta ukkak menppa hak onig Danab 100 Dilag Lag, amuppa batappig. Ag aɗ laih amuppa malona, ag Kayaknu tituanna mettona, ag tuɗidna, appanu ag aɗ eɗun babaittegeg ukke, lag attan ta ukkak menppa hak onig Hananelnu Lag batappig.

² Jeriko danab ag aɗ laih mana mettak danab bappaidppig, ag amuppanu tuɗidna, ag laih amu eɗun babaitteg, Imri bekka Sakur nug ag heppig, amuppanu tuɗitta laih amu eɗua babaittom.

³ Hasena bekkod ag od laa onig Kakai Od, ag od amu eɗun bappaidppig. Ag od amunu ebehi okkai okkai buuidna, ag od okkai amunu od naunau hena aihattona, ag od amu oh manak qaknu keeke ele meppig.

⁴ Uraia bekka Meremot, nug Hakos alag, amu nug aɗ Kakai Od amuppanu nug laih eɗua babaittom. Nug heumppanu amu, Berekia bekka Mesulam, nug Mesesabel alag, nug tuɗitta, aɗ laih amu eɗua babaitte, nug heum, amuppanu Bana bekka Sadok nug tuɗitta babaittom.

⁵ Laih amuppanu amu, Tekoa danab ag tuɗidna, eɗun bappaidppig, amge Tekoa dilag danab okkai ag uɗat aɗi aɗi haknu ahilag tituanppig ele, ag hekkulagnu uun, ii heppig.

⁶ Aria Pasea bekka Joiada, Besodea bekka Mesulam ele aa od laa onig Od Anukkanabnu eɗuya bappaidpiɗ. Aa od amunu ebehi okkai okkai buuidya, aa od okkai amunu od naunau heya aihattoya, od amu ohnu manak qaknu keeke ele mepiɗ.

⁷ Od amuppanu amu, Gibeon ted Melatia, nug laikkud ele, amu Meronot ted Jadon, nug laikkud laa Mispanu ele ag tuɗidna, aɗ amunu laih bappaidppig. Persianu prowins Yupretis lenu qaban uɗitteppanu gawana amu, nug Mispa dayom.

⁸ Ag amu heeg, Harhaia bekka Usiel, nug keeke golppa hak danab, amu nug aɗnu laih Melatia, Jadon ele bappaidpiɗ, amuppanu nug aɗ tuɗitta babaitte, amu nug heumppanu Hanania, nug leppu muttuɗig enanag ele babaittak danab amu, nug tuɗitta, aɗnu laih amu babaittom. Laih amuam ukka, aɗ laih onig Aɗ Teppu Ele, appa batom.

⁹ Jerusalem danab ah obatak maha laanu gumak danab Repaia, nug amu Hur bekka, nug aɗ amuppanu tuɗitta, aɗnu laih babaittom.

¹⁰ Amu nug heumppanu Harumap bekka Jedaia, nug laug aben amuppa dayom amu, nug tuɗitta, aɗ nug laug dayomppa babaitte, amuppanu Hasapnea bekka Hatus nug tuɗitta, aɗ laih amu babaittom.

¹¹ Amu Harim bekka Malkiya, Pahatmoap bekka Hasup ele aa aɗnu aben laa eɗuya bappaidya, aa lag attan ta ukkak menppa hak onig Bret Keeke Manaknu Dram Laala ele bappaidpiɗ.

¹² Amu aɗ laih amuppanu Jerusalem danab ah laihnu gumak danab, nug Halohes bekka Salum, nug tuɗitta, aɗ amu eɗua babaittom. Nug aɗekkud ag ehanidppig.

¹³ Danab onig Hanun, danab ag aab Sanoanu ele ag od okkai onig Oolnu Noaknu Od eɗun heppig. Ag od amunu od naunau ele hena aihadna, ag od amu ohnu manak qaknu keeke ele meppig. Ag amu hena, ag aɗ laih Salum aɗi bappaidppig, ag amuppanu tuɗidna, aɗ eɗun babaitteg ukke ukke, 440 mita anam te, batappig. Aɗnu laih ag bappaidppig, amu batakppa am od okkai laa onig Kinipannu Od dayom.

¹⁴ Kinipannu odnu amu, Rekap bekka Malkiya, nug aben aab Bet Hakerem daatte, nug amu dilag okkai, nug od amu eɗua babaittom. Nug eɗua ha mala, od amunu od naunau ele ha aihattowa, od amu oh manak qaknu keeke ele meum.

¹⁵ Amu Kolhose bekka Salum, nug aben aab Mispa daatte, nug amu dilag okkai amu, nug od okkai laa onig Le Qeppuɗia Bak eɗua babaittom. Nug od amu eɗua ha, nug od amu igippa lag haug me dayeye, nug od amunu od naunau oh ele ha aihattowa, nug od amu ohppa manak qaknu keeke meum. Nug aɗnu laih ele eɗua babaittom. Babaittom ele am, dad onig Kingnu Dad, dad amuam le gottu onig Siloam guguittak, nug aɗ aben amuppa babaitte ukke ukke, adqaɗ danab ah ag Dawitnu Aab, amuppanu aon notteb ele, amuppa batom.

¹⁶ Nug babaittom, amuppanu amu, Asbuk bekka Nehemaia, nug tuɗitta, aɗ laih amu eɗua babaittom. Nug babaitte ukke ukke, kingnu boumak abenppa wanak babaittom. Aben amuppa amu le gottu laa, danab eppelagppa buuppig ele daye, lag onig Danab Okkai Okkai Elenu Lag, lag amu aben amuppa ele dayom. Nehemaia nug aben aab Betsur daatte, nug amu dilag okkai.

¹⁷ Nehemaia heumppanu amu, Lewi buɗub ag Bani bekka Rehum waappa daan, ag tuɗidna, aɗ laih amu eɗun bappaidppig. Ag heppig, amuppanu Hasabia, nug tuɗitta, aɗnu laih laa eɗua babaittom. Hasabia nug wan maha onig Keila, nug wan amunu laih dilag okkai danab. Nug danab amu onilagppa uɗat amu heum.

¹⁸ Hasabia babaittomppanu amu, Henadad bekka Bawai, nug Keila danab laih laanu ele ag tuɗidna, aɗ laih amu eɗun bappaidppig. Bawai, nug wan maha Keila, amunu laih laa dilag okkai dayom.

¹⁹ Nug heum ele, amuppanu Jesua bekka Eser, Mispa dilag okkai laa amu, nug tuɗitta, aɗnu laih amu eɗua babaittom. Nug aben laa, aben amuam ban haknu keeke maknu lag guguittak daatte ele amu, nug appa digme ukke ukke, aɗ eɗua, laih godeppa batom.

²⁰ Eser babaittom, amuppanu Sabai bekka Baruk nug yag-nab-bak doyaya, nug tuɗitta, aɗ laih amu eɗua babaittom. Nug aɗ eɗua laih godeppanu ukke ukke, mana mettak ikki danab Eliasip laug odppa batak eɗua babaittom.

²¹ Amuppanu amu, Uraia bekka Meremot, nug amu Hakos alag, nug tuɗitta, aɗnu laih amu eɗua babaittom. Nug Eliasip laug odppa digme ukke ukke, Eliasip laug batakppa batom.

²² Nug heumppan ukkak amu, mana mettak danab wan atu Jerusalem talilittak daappig ele, ag tuɗidna, aɗ laih amu bappaidppig.

²³ Ag bappaidppig, amuppanu amu danab aɗit, Benyamin, Hasup ele, aa aɗ aa laulah odppa dayom ele, aa tuɗidya, laih amu eɗua bappaidpiɗ. Aa babaitteheh, Masea bekka Asaria, nug alag am Anania, nug aɗ nug laug heqoppa dayom am eɗua babaittom.

²⁴ Asaria nug laugppa babaittom, amuppanu Henadad bekka Binui, nug tuɗitta, aɗnu laih eɗua babaitte ukke ukke, aɗ eɗua, laih godeppa ukke, amuppanu ukke ukke, aɗ hokane piiakppa batom.

^25-26 Daug amu laihppan ukkak am Usai bekka Palal nug eɗua babaittom. Laih nug babaittom am lag attan ta ukkak menppa hak laa, king laug enanagnab aben attan dayom, lag amu guguittak, amu king laug haɗap laa, kingnu gumak danab appa daappig ele guguittak, appa digmeum. Nug babaittomppanu Paros bekka Pedaia, amu Kayaknu mettid lagnu maɗi nid ele, ag tuɗidna, aɗnu laih amu eɗun bappaidppig. Ag babaitteg ukke ukke, aɗ kaɗag uɗitteppanu daatte, aɗ amuppa od onig Le Awaknu Od, ag amuppa batappig. Lag attan ta ukkak menppa hak, lag amu ag batappigppa guguittak daatte. Kayaknu mettid lagnu maɗi nid, ag am qauko nakok onig Opel, ag amuppa daappig.

²⁷ Aben amuppanu amu Tekoa danab ag aɗnu laih laa ele eɗun bappaidppig. Tatam laih laa bappaidppig, gemu laih imu eɗun bappaidppig. Ag aɗ laih imunu bappaidppig am, ag lag attan ta ukkak menppa hak appa digmeeg ukke ukke, qauko onig Opel, appa aɗ daatte, ag appa batappig.

²⁸ Amu aɗnu od okkai laa onig Hosnu Od, appanu ukkak amu, mana mettak danab anen anen ag laulkad odppa aɗ eɗun bappaidppig.

²⁹ Ag heppig, amuppanu Imer bekka Sadok nug laug guguittak tuɗitta, aɗnu laih amu eɗua babaittom. Sadok heumppanu amu, Sekania bekka Semaia, nug aɗ od kaɗag uɗitteppanu gumak danab amu, nug amuppanu tuɗitta, aɗ laih amu eɗua babaittom.

³⁰ Nug heumppanu amu, Selemia bekka Hanania, Salap bekka Hanun ele, aa tuɗidya, aɗ laih laa ele amu eɗuya bappaidpiɗ. Hanunnu amu, nug awakkud tanig ele tatam doeg, nug doum. Aria amuppanu ukkak amu, Berekia bekka Mesulam nug aɗnu laih amu eɗua babaittom. Aɗnu laih amuam nug dayom guguittak dayom.

³¹ Amuppanu amu, Malkiya, nug keeke golppa hak danab, amu nug tuɗitta, aabnu aɗ eɗua babaitte ukke ukke, lag laa, Kayaknu mettid lagnu maɗi nid, aria keeke laihnu awa dadennu mak danab ag lag amu ele uɗat medappig amu, Malkiya nug lag amuppa nuhig babaittak uɗat batom. Lag amuam aɗnu od okkai laa onig Mipkad, od amu guguittak. Aɗ laih yawalti uɗitteppanu daatte, laa laih kaɗag uɗitteppanu daatte amu, aɗ amu oh daugppa, appa aɗ attan lag oo laa daatte amu, Malkiya nug oo amuppa nuhig uɗat batom.

³² Aria, Malkiya nug anam he ukke bate, nug batomppanu ukke ukke, aɗnu od okkai onig Sipsipnu Od, appa batak daye, keeke golppa hak danab ag, aria keeke laihnu awa dadennu mak danab ele amu, ag oh aɗnu laih amu bappaidppig.