Nehemaia 2 - Nobonob Baibel

Nehemaia nug Jerusalem ukkom

¹ Aria, King Artekserksis Persia dilag king dayaya, nuhig king dayaknu maɗ 20ppa, kalam onig Nisan, kalam amuppa da hanhan hemi bia, laa kingnu wain aon uɗin meɗaeg, da king lakkunu awe ukken, nug mettami. Amge gemu da nug noobppa wakkulnu dayeye, da oolppa uug laa dayom. Deɗ laa da anambia ii doomi. Gemuib.

² Da anam daaiyi, king nug aniɗa, nug da oɗ meɗom. “Na oɗe iitta amu, aɗinu na iɗun tiguguɗak daatte. Na ootppa uug okkai laa doottem amunu, na iɗun anam daatte doottem,” awa aum. Nug anam a, da eheɗ baɗami.

³ Da baɗami, amge da king amegppa ami. “O king, na hanhan bau daakkutnu ool daatte. Amge da alai aɗi dakkeɗalag, da mamelad aɗi ag aguppa daan oin mauheg boumadppig amu, kekeɗ ag aab okkai amu heeg nauhe, ag aab amu aɗnu od ele aab aɗuppa manatteg eoppig. Ag anam heppig, amu da oolppa uug okkai doottem,” awe ami.

⁴ Da anam ai, king nug da oɗ meɗom. “Anam, amge na aɗi hekkutnu dabmettem?” awa oɗ meɗom. Nug anam oɗ meɗe, da Kayak hab attan daatte ⌊oolppaib⌋ unuqitten,

⁵ da king amegppa ami. “O king, na ootppa ena dookkut dayeb, da nahip maɗi nid, da nahip neekkakppa ena daattem dayeb amu, na heppe, da Juda wanppa, aab okkai laa da mamelad aɗi appa boumak daatteb ele amu, da aab amuppa ukken, da aab amu eɗuen bappaidkkulnu oɗ medattem,” awe ami.

⁶ Da anam ai, kuin nug king heqoppa dayeye, king nug eɗua, da oɗ meɗom. “Na gokkut dayeb amu, na appa gona, uɗat amu hewona, eɗun uɗikkut amu, kalam ganeppa, o maɗ ganeppa na amu hekkut? Haen ganeb na eɗun uɗikkut?” awa oɗ meɗom. ⌊Nug da anam oɗ meɗe, da nob mei,⌋ king nug amunu ena doya, nug da gokkulnu a, da ukkaknu haen ele nug mettami.

⁷ Da amu hewoya, da tuɗitten, nug oɗ mettami. “O king, na ootppa ena dookkut dayeb, da uug laa ibppa ii anidpanu amu, na pas laa yaan meɗappe, da Persianu prowins Yupretis lenu qaban uɗitteppanu gawana dilagppa paniadppi, ag ehaniɗppeppeg, da Juda wanppa elele tekkulnu ool daatte.

⁸ Laa ele amu, danab onig Asap, nug appa adnu dad nahip gumam daatte, amu na pas laa nuhignu ele yaan meɗappe, da awe ukken ippunidppi, nug da aben aɗ ɠagattagnab ele Kayaknu mettid lagnu guguittak daatte, nug aɗ amunu od hekkulnu, da aab okkainu aɗnu od ele hekkulnu, amu da laul ele buukkulnu nug dad amuppanu ad okkai meɗakkunu oɗ medattem.” Da king anam oɗ mettami. Da anam oɗ mettai, Kayak, Nug enanag atognoiɗtte amu, Nug ehaniɗom amunu, king nug keeke oh da nug amunu oɗ mettami amu, nug keeke amu oh da meɗom.

⁹ King amu oh da meɗe, da gokkulnu daaiyi, king nug daup dilag okkai laala, aria daup hos attan oinna, ban hetteb ele otiatta he, ag da omaiɗeg gota, da Persianu prowins Yupretis lenu qaban uɗitteppanu gawana amu, da ahilagppa pas king yom paniadmi.

¹⁰ Da ippuanatti, kingnu ehanittak anuqak danab aɗit laa, aa am aab nakok Horon danab Sanbalat, Amon wanppanu ehanittak anuqak danab Tobia ele, aa laa nug Israel danab ehanadkkunu uɗiom doopiɗ amu, aa oolah am ena iittanab iitta.

Nehemaia nug Jerusalemnu aɗ attem daatte italom

¹¹ Am da ukken tewoya, da Jerusalem tein daaiyi, deɗ ewam ukke dimppa,

¹² da danab laib laib laa ele ig tuqan ahat, ⌊aabnu aɗ nauhak dayeye anidkkunignu⌋ gomut. Da laa amegppa Kayak he, Jerusalemnu aɗ bappaidkkulnu dabmettem amu, da laa amelagppa amunu deɗ laa nakok laa ii mattimi. Iitta. Dabmak amuam da oolppaib dooiyi dayom. Am ig tuqan amuppa gomut ele amu, ag da ele laippu gomut; ag baelagppa oiyegeg, da dakka donki attan oimi. Ig hos o donki laala akkat ii gomut.

¹³ Da tuqan ukken, da tatam aɗnu od laa onig Oolnu Noaknu Od, da od amuppa aab dimittim ukke, da eɗuen, le qeppuɗia bette ele laa onig Makkai Okkai laanu Le, da le amu guguitten ukke, le amu qe-eɗitten wain, od laa onig Kinipannu Od, od amuppa wami. Wain ugekke, da Jerusalemnu aɗ kekeɗ dilag daup ag loppaɗeg, nauhak dayom italen ukke, aɗnu od ele aab aɗuppa maippig anidmi.

¹⁴ Da appa wain ugekke, da aɗnu od onig Le Qeppuɗia Bak, da od amuppa wain, le gottu laa onig Kingnu Le Gottu, appa wami. Da appa wami, amge kinipan huanaknab daye, ib laa ii dayom amunu, donki nug gokkunu elele iitta.

¹⁵ Ib iitta amunu, da eɗuen, oolnu noak Kidron, appa tuqan wain ugekke, neekki ukke, aabnu aɗ italmi. Da amuppa itale malen, da eɗue, Oolnu Noaknu Odppa noin, aakku aab ooppa gomi.

¹⁶ Jerusalemnu ikki danab ag da amu hemi ii dooppig. Da adeppa gomi, da attem attem hemi amu, ag ii dooppig. Aɗinu? Juda danab laa amegppa, mana mettak danab laa amegppa, anuqak danab laa amegppa, o Juda dilag ehanittak anuqak danab laa amegppa, o danab uɗat hekkulagnu daappig oolagppan laa amegppa dabmak amunu nakok laa ii ami. Dimppa akkulnu dabmemi.

¹⁷ Da anam dabmak awen, oiye aɗ italmi dimppa amu, da ag amelagppa ami. “Ag uug ig tonikkom daatte anidtteb. Kekeɗ ag heeg, Jerusalem nauhakib daatte; aɗnu od ele manaeg eoppig. Anam daatte, amge ahappeg, ig Jerusalemnu aɗ bappaidta, ig uɗa nak nau guittak ele baula ii doomta,” awe ami.

¹⁸ Da anam awoya, da Kayak, Nug da enanag atognoiɗom, Nug ehaniɗe king nug aɗi aɗi nai da amelppa aum ele mattiyi doon, ag appig. “Ig ahat, aab imu bappaidtu!” appig. Ag anam anana, ag aakku uɗat ena amu hekkulagnu bappaidppig.

¹⁹ Ig anam bappaidmut, amge haen Horon ted Sanbalat, Amon dilag ehanittak anuqak danab Tobia, Arebia ted Gesem ele ag amunu nai doon, ag aon aon iqan, ig amenigppa inam appig. “Ag Juda ag attem hetteb? Ag king waappa daaglagnu uun, nuhig nai tabappeg nekkunu hettebte?” aon appig.

²⁰ Ag anam appig, amge da ag amelagppa ami. “Kayak hab attan daatte, Nug ehanigkku. Nug ehanikkeb, ig uɗat imu malagnig. Ig am nuhikkud maɗi nid, amu ig uɗat imu digmeta hekkunig, amge ag, ag appalag diig am Jerusalem iitta. Laa amu, ag, o ag mamelkad, o ag dokkialkad, o ag memetalkad anukkanu ele ag ippa ii daappig amunu, imuam ahilag keeke iitta,” awe ami.