Namba 6 - Nobonob Baibel

Nasarait dayaknu ɗo digdig

¹ Amu Yawe Nug Moses amegppa aum.

² “Na Israel danab ah inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Danabte o iitta ahte laa nug haen gane epeɗia, haen amuppa nug Yawenu anuqak dabmaama oikkunu genabnab hekkunu nai ana qagatte, nug aakku Nasarait daakku.

³ Danab nug anam ha amu, nug aib wain lanana, le ɠagattag laa ele aib laum. Nug le laala wainppa hak, o iitta le laala le ɠagattag laalappa hak ele aib laum. Danab o ah amu nug grep leppu, o iitta grep meu, o iitta grep meu qaɗaiettak, nug amu oh ele aib laum.

⁴ Haen gane nug epeɗia, Nasarait daakkun tituanom amu, nug lanak keeke grep lebuppanu, o iitta grep meu gaɗa, o aeg, o grepnu attem amu, nug amu ele aibnab laum.

⁵ Laa nug Nasarait daakkunu haen tituanom amu, haen amu ohppa nug ikki uɗug aib otaɗom. Nug Yawenu tituanak daakkuoitte. Anam daakkunu at am, nug ikki uɗug uueb, elab daakku.

⁶ Haen nug epeɗia, Nasarait daakkunu tituana, Yawe amegppa aum amu, haen amu ohppa nug aib mauhak gaɗa laa guguitta waum.

⁷ Nug mamegtai, o iitta anigtai, o iitta appinagtai, o iitta awag o amagtai mauhkku, amge nug nuhig nai ɠagattag amu iinab oppatma; nug nai amu dim lamidkku. Nug nai ɠagattag nuhig amu oppatkku amu, nug Kayak ele ouqak daakkunu elele iitta. Ikki uɗug elab amuam nug Nasarait daattenu at amunu, nug mauhak gaɗa guguittak ii wama.

⁸ Aun laa nug haen gane epeɗia, Nasarait daakkunu tituanom amu, nug haen epeɗiom ele, nug amu ohppa, nug Yawenu tituanak daatte.

⁹ Aun laa nug haen epeɗia, Nasarait daakkunu tituanom amu, haen gamag amuppa haen adekkuppa laa nug, nug noobppa dayaya mauhkku dayeb, amuppa nug ikki uɗug Kayaknu tituana mettak daatte amu, dubuttid amuppa te, Kayak Nug ooppa uuaknab dootte. Amu laa amu nug Nasarait daatte amu, nug dubuttid tak amuppanu eɗua, babaittak daakkunu, nug ikki uɗug otaɗkku.

¹⁰ Anam amunu deɗ eblaih ewamppa amu, nug uppuɗil beɗulag nakok aɗit, o uppuɗil beɗulag okkai nag aɗit diiata uɗia, mettid haknu peh lag danab ah appa qagmetteb ele, nug peh amu odppa, mana mettak danab medakku.

¹¹ Mana mettak danab nug ai laippuppa ib etta hipunin haknu ofa haaha, laappa nug manaknu ofa hekku. Mana mettak danab nug amu hekkunu diig am, mana mettak aɗit amuppa nug aun laa, nug mauhak gaɗa guguittak daakkunu ii dabmeum, amge aakku daye, dubuttid nuhigppa teum daatte amu, mana mettak danab nug ib amuppa heeb, eheɗ haknu nob nau ai tiigppa iitta mekkunu elele medakku. Am laa nug Nasarait daatte amu, nug anam hewowa, deɗ amuppaib nug baula Nasarait daakkunu nai ana qakka, nug digma, nug haen amu ukkak amu ikki uɗug aib otaɗom.

¹² Ele amu, nug baula digma, haen gane tatam epeɗia, haen amuppa nug Nasarait daakkunu tituanom amu, nug baula anam hekkunu, nug Yawenu tituana mettak daakkunu, nug nukka nug tituankkuoitte. Nug anam hekkunu amu, nug hipunin uhuqaknu sipsip gaiɗ maɗ laippu awak ele laa awa ukka, eheɗ haknu ofa haɗ! Amu tatam haen nug Nasarait oiyom amu, haen amuam haen bau imunu ebqak ooppa ii daama. Iitta. Nug baula digmekku. Amunu diig am, haen nug Nasarait oiyom amu, haen amu gamagppa keeke laa ba he, nug Yawenu neekkakppa, nug ooppa dubuttid tak ele dayom.

¹³ Amuam laa nug Nasarait daakkunu nai ana qakkak heeb, gamagppa keeke nuhigppa beeb, nug hekkunu daatte, amge ɗo imu am, laa nug Nasarait daakkunu nai qagatte, nug haen amu eɗitteb, aɗi aɗi hekkunu daattenu ɗo. Nug mana mettak danab toppa wab, mana mettak danab nug omala, mettid haknu peh lag danab ah appa qagmetteb ele, nug peh amu odppa wakku.

¹⁴ Nug sipsip gaiɗ maɗ laippu awak ele, beɗuppa eheɗ laa iitta ele amu awa, manaknu ofanu, amu sipsip balat maɗ laippu awak ele, beɗuppa eheɗ laa iitta ele, nug amu ele awa, ib etta hipunin haknu ofa hekkunu, amu sipsip dawai beɗuppa eheɗ laa iitta ele laippu dayaknu ofa hekkunu, nug keeke amu oh awa, Yawe gumitta wana, Nug medakkuoitte.

¹⁵ Nug Yawe aum bia, doɗ amu oh mana, Yawe medatta, nug ee aegnu ofa, wain gokkaɗaknu ofa ele diiata, Yawe gumitta ukka, Nug medakkuoitte. Nug kaleg bret yis iitta inak, nug amu laa ele Yawe medakkuoitte. Bret amuam diig aɗit inam dayad! Laa amu bret batappatak, yis iitta, amu plaua enanag, goɗen ele kaboliak; laa am bisket teppu iitta, yis iitta, qaɗeppa goɗen laittak ele.

¹⁶ Mana mettak danab nug mana mettak hak imu oh awa, Yawe gumitta wana, medakku. Tatam amu nug doɗ laa awa, nug doɗ amuppa ib etta hipunin haknu ofa ha, amu dimugppa nug doɗ laa awa, nug manaknu ofa amu hekku.

¹⁷ Nug anam hewowa amu, nug kaleg bret yis iitta inak, nug amu awa, Yawe gumitta wana, Nug medakku. Ukka amu, nug sipsip dawai, danab o ah laa nug laippu dayaknu ofa amu hette amu, mana mettak danab nug doɗ amu mana, Yawe medakku. Nug sipsip dawai amu mana, Yawe medatta amu, nug amunu ee aegnu ofa, wain gokkaɗaknu ofa ele hekku.

¹⁸ Mana mettak danab nug keeke amu oh qaɗabppa meeb ewebeb, aun nug Nasarait daatte amu, nug mettid haknu peh lag danab ah appa qagmetteb ele, nug peh amu odppa ikki uɗug, Yawenu tituana mettak daatte amu, nug otaɗkku. Nug ikki uɗug amu awa, ⌊mana mettak danab metteb, nug⌋ laippu dayaknu ofa hak, nug amu waappa aab ooppa mekku.

¹⁹ Amu laa nug Nasarait daatte, nug ikki uɗug, amuam Yawenu tituana mettak daatte amu, nug amu otaɗa male, mana mettak danab nug sipsip dawai amu gukka uhiak awa, amu kalegppanu bret batappatak laa, bisket teppu iitta laa ele, amu oh yis iitta amu, nug amu anen anen laa ele awa, Nasarait danab medakku.

²⁰ Mana mettak danab nug anam hewowa, nug ⌊keeke amu eɗua, Nasarait danab eppegppanu diia⌋ aɗalata, nug Yawe noobppa huma epponitta mettaknu ofa hekku. Keeke amuam Yawenu tituanak daatte. Keeke amu, amuam sipsip momo, baeg naɗiapnu tuɗi huma, Nug mettak ele amu, keeke amu oh am mana mettak danabnu daatteb. Aria, amu dimppa aun nug Nasarait ted dayom amu, nug aakku wain lakkunu elele.

²¹ Keeke imu amu, laa nug Nasarait daakkunu genabnab hekkunu nai ana qagatte ele, am amunu ɗo nug dim lamitta hekkuoitte. Aun aɗi oh ag genab amu hekkulagnu nai ana qagappig amu, ag ɗo amu dim lamidna, Yawe keeke amu metteg! Amge laa nug amu eɗittak, keeke laa ele Yawe medakkunu genab hekkunu nai ana qakkom amu, Nasarait danab amu ag hetteb bia, nug dim lamitta, aɗi aum amu, nug anamib haɗ!” Yawe Nug Moses amegppa anam aum.

Itittak nai ena, mana mettak danab ag danab ah mattaglagnu

²² Amu Yawe Nug Moses amegppa aum.

²³ “Na Aron, nug bekoɗ ele inam appe doyeg!” awa aum. ⌊Nug anam a amu, Moses nug ag amelagppa inam aum.⌋ “Ag Israel danab ah itittak ena mattaglagnu henana amu, ag inam aig!

²⁴ ‘Yawe Nug itittak ena matta, ehanattebeb, ag enaib daaglagnu,

²⁵ am Nug ag ele daan, Nug ahilagnu oo bodoette, keeke ahilagppa hette amu, nug enanag, maɗoɗ ele hekkunu,

²⁶ Yawe Nug ag enaib hatta, Nug maɗoɗ ele ag madakkunu ool daatte.’ Ag anam aon aeg!” awa aum.

²⁷ Amu Yawe Nug aum. “Aron bekkod ele ag anam hena, amuppa ag da onil Israel danab ah dilagppa mattaglag, amu da ag itittak ena madakkul,” awa aum.