Namba 4 - Nobonob Baibel

Lewi bekka Kohat buɗubppan uɗat

¹ Amu Yawe Nug Moses, Aron ele amelahppa aum.

^2-3 “Aa danab oh ag Lewi bekka Kohat buɗub daatteb, ag ahilag maɗ 30 ukka 50 batak amu, aa danab amu oh ebaqeɗ! Aa ag onilkad, ahilag aab ikki, ag baelkadppa ele waappa yeiɗ! Danab ag ahilag maɗ anam ele amu, ag dahil mettid haknu peh lag danab ah appa qagmetteb ele, ag appa uɗat hekkulagnu elele.

⁴ Uɗat imuam Kohat buɗubppan danab ag dahil mettid haknu peh lag danab ah appa qagmetteb ele, ag appa hekkulagnu daatteb. Ag keeke, dahilnu tituanaknab daatteb, ag keeke amu oh atognoadkkulagnu aakku daatte.

⁵ Haen danab ag ahan laih gokkulagnu heppeg amu, Aron nug bekkod ele ag mettid haknu peh lag ooppa nona, ag Oo Gun Ele, Oo Gunnab Ele makkulaknu lamen, ag amu autppeg neeb, ag Tituanak Nainu Kunup kontrak inak ele amuppa hautppeg daakku.

⁶ Anam hewona, ag Oo Gun Ele, Oo Gunnab Ele makkulaknu lamen, ag amu kakai maoi gaɗappa amu hautona, ag lamen ed, teppu ele laa, amu qaɗeppa ele hautona amu, ag tuqai aɗit aben ahilahppa aɗualatppeg wakkulah.

⁷ Aria, ag lamen ed laa balal, mana mettak danab ag bret Yawenu metteb ele amu, ag amu qaɗeppa otalkkulag. Ag anam hewona amu, ag tappiɗ digdig, kopi, kap, ag wain gokkaɗaknu ofa amuppa inatteb ele, ag keeke amu oh amu qaɗeppa mekkulag. Bret balal amuppa hanhan daatte ele am anamib daakku.

⁸ Keeke amu oh qaɗeppa amu, ag lamen kokoɗnab laa otalona, amu ag kakai maoi gaɗa amu hautona, ag tuqai aɗit aben ahilahppa aɗualatppeg wakkulah.

⁹ Aron, bekkod ele ag lamen ed laa aona, lam maattaknu balal, amuppa amahlak lag ooppa daatte amu, balalnu lam ele, lam wik eeɗaknu keeke, amu nippud, goɗen amuppa dayaya maadtte ele amu, ag amu oh hautadkkulag.

¹⁰ Ag anam hewona, ag lam mattaknu balal, nuhig keeke laa oh ele kakai maoi gaɗappa hautona, ag qaɗeppa maknu tuqaippa mekkulag.

¹¹ Ag lamen ed laa qaɗab golppa hak amu qaɗeppa otalona, ag kakai maoi gaɗappa hautona, ag tuqai aɗit aben ahilahppa aɗualatppeg wakkulah.

¹² Ag aɗi keeke, mana mettak danab ag amuppa dahil mettid haknu peh lagppa dahil ɗo maɗoɗnu uɗat hekkulagnu uɗat madatteb amu, ag amu aon, lamen edppa hautona, amu kakai maoi gaɗappa ele hautona, qaɗeppa maknu tuqaippa mekkulag.

¹³ Ag uhuɗ qaɗab brasppa hak, ag amuppa mautppeg na ukkeb, amu ag lamen perpel laa qaɗeppa otalkkulag.

¹⁴ Anam dayeb amu, Aron, bekkod ele ag keeke oh mana mettak danab ag qaɗab brasppa hak, ag amuppa daanna, dahil ɗo maɗoɗnu uɗat amuppa hetteb ele amu, ag amuppa maadkkulag. Keeke amuam iikku; tappiɗ aab mawa oiyaknu, huɗup teppu yaaknu, sabol, amu tiig amuppanu awa tauɗeb ukkaknu tappiɗ. Ag keeke amu oh qaɗab tonaknu lamen qaɗeppa mewona, ag kakai maoi gaɗa otalona, ag tuqai aɗit aben ahilahppa aɗualatppeg wakkulah.

¹⁵ Aria, Aron, bekkod ele ag qaɗab, balal keeke, amu keeke naunau oh dahil mettid haknu peh lag danab ah appa qagmetteb ele, ag peh amu ooppanu keeke Yawenu tituanak daatteb amu hautna malappeg, haen danab ag gokkulagnu bappaidna daanna, amu Kohat buɗubppan danab ag keeke mawadkkulag. Amge ag tuqai aakkuib aɗaglag. Ag keeke dahilnu tituanak daatteb amu iinab lauɗidmana. Ag lauɗidna amu, ag mauhkkulag. Amu Kohat buɗubppan ag keeke amu, mettid haknu peh lag ooppanu mawadkkulagnu daatte.

¹⁶ Aron nug mana mettak danab daatte. Nug bekka Eleasar nug geha goɗen amahlaknu, kalu danab ile muttuɗig enanag bette, goɗen ee aeg kabolina manan Yawe medatteb ele, amu laittaknu goɗen, nug amu oh dilag italak danab anuqak daakku. Nug dahil mettid haknu peh lag, amu lag amu ooppan keeke, keeke oh dahilnu tituanak daatteb, nug amu dilag gumak anuqak italak danab daakku,” awa aum.

¹⁷ Amu Yawe Nug Moses, Aron ele amelahppa aum.

^18-20 “Kohat buɗub, ag Aron buɗub ii daatteb, ag keeke Yawenu tituanaknab daatteb ele ii hautak daatteb, ag amu gukkuidna aib wappig. Ag daappeg ukkeb, Aron, bekkod ele dahil mettid haknu peh lag ooppa gona, ag keeke amu oh hautppeg, ag wakkulag. Ag ii hautak haenppa wakkulag amu, ag mauhkkulag. Amunu ag ii mauhmananu, Lewi buɗub oolagppa ii daamnanu, ag bau daaglagnu amu, Aron, nug bekkod ele ag hautna malappeg, ag Kohat buɗub ele, ag oh pehppa nona, Aron, nug buɗub ele, ag Kohat buɗub ag aɗi aɗi mawadkkulag amu, ag tutukku ippunadkkulag,” awa aum.

Gerson buɗubppan danab dilag uɗat

²¹ Amu Yawe Nug Moses amegppa aum.

^22-23 “Na Lewi bekka Gerson buɗub danab, ag ahilag maɗ 30 ukka 50 batak amu oh ebaqe! Ag onilkad, ahilag aab ikki, baelkadppa ele waappa ye! Danab ag ahilag maɗ anam ele amu, ag dahil mettid haknu peh lag danab ah appa qagmetteb ele, ag appa uɗat hekkulagnu elele.

²⁴ Gerson buɗubppan danab ag uɗat hekkulagnu, ag keeke mawadkkulagnu am iikku.

²⁵ Ag dahil mettid haknu peh lag, amuam dahil mettid haknu peh lag danab ah appa qagmetteb ele, ag lag amu ooppan lamen enanag, mettid haknu peh lag tonaknu lamen laa, amu mettid haknu peh lagnu lamen dimittimnu, kakai maoi gaɗappa heppig, ag keeke amu oh maoglagnu daatte. Ag mettid haknu peh lagnu odppan lamen, ag amu ele maoglagnu daatte.

²⁶ Ag haɗap, dahil mettid haknu peh lag amu qaɗab ele talilitta daatte, lamen aɗ bia amu talilidtte, aɗnu odppan lamen, mettid haknu peh lag qappaknu muɗi, lamen amunu keeke laa oh ele, ag maoglagnu daatte. Gerson nug buɗubppan ag uɗat amu oh hekkulagnu aakku daatte.

²⁷ Ag aɗi aɗi hetteb, iitta ag mawak uɗat hettebte, o iitta ag uɗat laala hekkulagte, amu oh am Aron, nug bekkod ele ag abeppeg hekkulag. Ag mana mettak danab, ag aɗi aɗi keeke maoglag, ahilag uɗat amu, ag appeg doyeg!

²⁸ Uɗat imu amu, Gerson buɗubppan danab ag dahil mettid haknu peh lag danab ah appa qagmetteb ele, ag appa hekkulag. Aron bekka Itamar, nug geha ag gumadkku. Aron nug am mana mettak danab.

Merari buɗubppan danab dilag uɗat

^29-30 Na Lewi bekka Merari buɗub danab ag ahilag maɗ 30 ukka 50 batak, na amu oh ebaqe! Ag onilkad, ahilag aab ikki, baelkadppa ele waappa ye! Danab ag ahilag maɗ anam ele amu, ag dahil mettid haknu peh lag danab ah appa qagmetteb ele, ag appa uɗat hekkulagnu elele.

³¹ Ag dahil mettid haknu peh lag danab ah appa qagmetteb ele, ag ahilag uɗat appa henana, ag peh lagnu ebehi, pehnu ebehi emaitak daatteb, pehnu biidod, amu pehnu biidod ɠagattag eppaknu tatap, ag amu oh maoglagnu daatte.

³² Ag haɗap, mettid haknu peh lag talilidtte ele amu, ag amunu biidod, biidod ɠagattag daakkunu tatap, pehnu pin elab, muɗi, keeke oh aɗ amu qappaglagnu uɗat madatteb ele amu, ag amu oh maoglagnu daatte. Danab anen anen ag keeke amu anen anen maoglagnu tituanattak daatteb amu, ag anamib maoglag.

³³ Dahil mettid haknu peh lag danab ah appa qagmetteb ele, appanu uɗat imu am, Merari buɗubppan ag hekkulagnu daatte. Aron bekka Itamar, nug geha ag gumadkku. Aron nug am mana mettak danab,” awa aum.

Lewi buɗub ebaqak

^34-35 Yawe Nug aa anam hekkulahnu aum amunu, Moses, Aron, amu Israel danab ah dilag ikki danab ele ag Lewi buɗub danab, Lewi buɗubppan alag laa Kohat, ag huu amuppanu danab ebaqappig. Ag onilkad amu, ag ahilag aab ikki, ag baelkadppa ele waappa yaappig. Ag danab ahilag maɗ 30 ukka 50 batak amuib ebaqappig. Danab amu ag gona, mettid haknu peh lag danab ah appa qagmetteb ele, ag appa uɗat hekkulagnu elele.

³⁶ Danab aab ikki amuppanu am ebqak 2,750 dayom.

³⁷ Ebqak amuam Lewi buɗubppan alag Kohat huuppan aab ikki anen anennu aakku. Ag mettid haknu peh lag danab ah appa qagmetteb ele, ag appa Yawenu uɗat heppig. Yawe Nug Moses oɗeppa haknunab aum bia, Moses, Aron ele ebaqapiɗ.

^38-39 Anam hena malona amu, ag Lewi buɗubppan huu, alag laa Gerson, ag danab amu ebaqappig. Ag onilkad amu, ag ahilag aab ikki, ag baelkadppa ele waappa yaappig. Ag danab ahilag maɗ 30 ukka 50 batak aakkuib ebaqappig. Danab amu ag uɗin, mettid haknu peh lag danab ah appa qagmetteb ele, ag appa uɗat hekkulagnu elele.

⁴⁰ Danab aab ikki, baelkadppa ele amuppanu, am ebqak 2,630 dayom.

⁴¹ Ebqak amuam Lewi buɗubppan alag Gerson huuppan aab ikki anen anennu aakku. Ag mettid haknu peh lag danab ah appa qagmetteb ele, ag appa Yawenu uɗat heppig. Yawe Nug Moses oɗeppa haknunab aum bia, Moses, Aron ele ebaqapiɗ.

^42-43 Anam hewona amu, ag Lewi buɗubppan huu, alag laa Merari, ag danab amu ebaqappig. Ag onilkad amu, ag ahilag aab ikki, ag baelkadppa ele waappa yaappig. Ag danab, ag ahilag maɗ 30 ukka 50 batak amuib ebaqappig. Danab amu ag uɗin, mettid haknu peh lag danab ah appa qagmetteb ele, ag appa uɗat hekkulagnu elele.

⁴⁴ Danab aab ikki, baelkadppa ele amuppanu, am ebqak 3,200 dayom.

⁴⁵ Ebqak amuam Lewi buɗubppan alag Merari huuppan aab ikki anen anennu aakku. Ag mettid haknu peh lag danab ah appa qagmetteb ele, ag appa Yawenu uɗat heppig. Yawe Nug Moses oɗeppa haknunab aum bia, Moses, Aron ele ebaqapiɗ.

⁴⁶ Amunu Moses, Aron, amu Israel dilag ikki danab ele ag Lewi buɗub danab oh ebaqappig. Ag heeg, ahilkad aab ikki onilkad, ahilkad baelkadppa onilkad ele aegeg ebaqappig.

^47-48 Ag danab oh ag maɗ ahilag 30 ukka 50 batak ele, danab amu ag uɗin, mettid haknu peh lag danab ah appa qagmetteb ele, ag appa Yawenu uɗat hekkulagnu, ag lag amunu keeke ele maoglagnu elele amu, ag ag ebaqappig. Ag ahilag ebqak amu 8,580 teum.

⁴⁹ Yawe Nug Moses amegppa Lewi buɗub danab ebaqa amu, ag anen anen aɗi aɗi uɗat henana, ag maoglagnu ele, nug ag uɗat amu madakkununab aum amu, Moses anam heum. Ib amuppa amu Moses, Aron amu Israel dilag ikki danab ele, ag Yawe haknunab aum bia, Lewi buɗubppan danab ebaqappig.