Namba 36 - Nobonob Baibel

Ɗo laala, ah danab awaknu, amu aulag wan elenu nai

¹ Gileat nug amu Makir bekka. Makir nug am Manase bekka. Gileat aab ikkippan danab ag Josep buɗubppud. Amu Gileat aab ikkippan ikki danab ag gona, Moses, amu Israel dilag ikki danab ele amelagppa appig.

² “Yawe Nug na, ihinig naɗi, Nug na ig Israel, na om ena yaak kobolppa hena, aulag wan paniadna, ihinig daakkunu megakkutnunab aum. Amu Nug na ig lainig Selopehad aug wan amu, ig nug aɗekkud madakutnunab ele aum.

³ Amu ena, amge Selopehad aɗekkud ag Israel dilag huu okkai laappanu danab diippeg dayeb, aɗekkud amu ag mauhppeg amu, ahilag wan, ag aulag amu, ihinig huu okkaippanu am aona, danab ag Israel dilag huu okkai amuppanu diippig ele amu, ahilag ele ouaqadkkulag amunu, ig aunig wan ig megappig ele amu, maha laih laa obate ukkak daakku,” aon appig.

⁴ Maɗoɗnu gamag ahak dayaknu maɗ tituanak daatte, maɗ amuppa wan amu nug eɗua wan mameg toppa wakku, amge Selopehad aɗekkud ag danab Israel dilag huu okkai laalappanu diippeg amu, ig ag aulag wan maɗ amuppa, ig eɗut ii aomta. Amuam nug aɗekkud ag huu atten attenppan danab diippig ele, ahilagppa daakkuib; ig aunig wan ii daama.

⁵ Ag anam aeg amu, Yawe Nug Moses, nug Israel danab ah amelagppa oɗmak amunu nob ma, ab dooglagnunab inam a doya, Moses nug ag amelagppa aum. “Josep buɗub ag atteb amu tutukkunab.

⁶ Amu Yawe Nug Selopehad aɗekkud dilag inam atte. Ag mamelag, nug am Israel dilag huu okkai Manase ted, amu nug aɗekkud anen anen ag danab aun ele ewau matulak aoglagnu oolag heeb, ag aoglag. Keeke laippu aakkuib, danab amu ag Israel dilag huu okkai Manase, ag amu ooppan aab ikki laa danab dayeg! Selopehad aɗekkud ag Israel dilag huu okkai laappanu danab aib diippig.

⁷ Wan da ag madattem imu, amuam aulag wan. Israel ooppa wan Israel dilag huu okkai laanu, am Israel dilag huu okkai laappa ii oma. Aɗinu? Anamppa danab anen anen Israel dilag huu okkai anen anenppanu amu, ag alalkad aulag wan am ahilagppaib daakku.

⁸ Ah aun aɗi ag Israel dilag huu okkai laa, Israel ooppa Selopehad aɗekkud bia daatteb, ag mamelag aug aoglag dayeb amu, ag mamelkad dilag huu okkainu aab ikki, amuppa ag danab aoglagoitte. Anamppa Israel oh geha wan ag mamelkad aulag aoglag amu aɗaglag.

⁹ Wan amu, am ag aulag aakku; wan amuam Israel dilag huu okkai laappan, am Israel dilag huu okkai laappa ii wama. Aɗinu? Israel ooppa huu okkai anen anen ag wan akka ahilkad daappeg gumadkkulag.” Yawe Nug anam a, Moses nug anam mattiom.

¹⁰ Moses nug anam aum amunu, Selopehad aɗekkud, ag Yawe Nug Moses amegppa ag hekkulagnunab aum amu, ag amu heppig.

¹¹ Selopehad aɗekkud onilag amu inam: Malah, Tirsah, Hoglah, Milkah amu Noa ele. Ag Yawe aum bia hena, ag mamelag, nuhigppan danab lailkad diippig.

¹² Danab ag diippig ele, ag am aab ikki Manase, Josep bekka, nug buɗubppan amunu, ahilkad wan, ag aulag amu, wan amu ag mamelagnu aab ikki, amu Israel dilag huu okkai nuhig ele, amuppaib dayom.

¹³ Haknunab nai imu dim lamittaknu nai imu ele amu, Yawe Nug Moap uɗemppa, Jodan le ihippa, laih Jerikonu ukkakppa, appa Moses mette, nug Israel mattom.