Namba 29 - Nobonob Baibel

Trampet Iwalattak hobulnu nai

¹ Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Kalam eblaih aɗitppa, deɗ digmakppa, deɗ amuppa, ag Yawe noobppa qagmena dup nona Nug binag meig! Uɗat ag hanhan hetteb amu, ag aib heppig. Deɗ amuam ag trampet iwaladppeg, baag bekkunu deɗ.

² Yawe Nug mana mettak amunu muttuɗignu ooppa ena dookkunu, ag makau gaiɗ laippu laa, sipsip dawai laippu, sipsip gaiɗ eblaih aɗit ele maɗ laippu awak, doɗ oh beɗulagppa eheɗ laa iitta ele amu, ag amu manan, Yawe mettaglag. Amuam manaknu ofa aakku.

³ Makau dawai ele oohoak haknu amu, ag ee aegnu ofa ele hekkulag. Amu hekkulagnu, ag 3 kilogram plaua enanag, goɗen ele kaboliglag. Sipsip dawai ele oohoak haknu amu, ag ee aegnu ofa ele hekkulag. Amu hekkulagnu, ag 2 kilogram plaua enanag, goɗen ele kaboliglag.

⁴ Sipsip gaiɗ anen anen ele oohoak haknu amu, ag ee aegnu ofa ele hekkulag. Amu hekkulagnu, ag 1 kilogram plaua enanag kilogram laippu, goɗen ele kaboliglag.

⁵ Amu ahilag eheɗ haknu nob nau doɗ tiigppa iitta meeb elele medakkunu amu, ag ib etta hipunin haknu ofa henana, ag meeme dawai laippu manan, Yawe mettaglag.

⁶ Amu ag deɗ oh hanhan manaknu ofa, amunu ee aegnu ofa ele hetteb, amu kalam bau digmettenu mana mettak, amunu ee aegnu ofa ele hetteb, ahilag wain gokkaɗaknu ofa ele hetteb amu, ag amu hekkulag, amge ag mana mettak laala imu ele hekkulag. Mana mettak amuam Yawe mettaknu aab aɗunu ofa; ahilag muttuɗignu Yawe Nug ooppa ena dootte. Ag mana mettak amu henana, Yawe mettaglag,” awa aum.

Eheɗ haknu nob nau tiigppa iitta meeb elele medakkunu deɗ okkai

⁷ Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Ag kalam ebqak eblaih aɗit ele, kalam amunu deɗ eblaih tanig eleppa, deɗ amuppa, ag Yawe noobppa qagmena dup nona Nug binag meig! Ag ee ohnu kud mena daanna, uɗat aib heppig.

⁸ Yawe Nug mana mettak amunu muttuɗignu ooppa ena dookkunu, ag makau gaiɗ laippu laa, sipsip dawai laippu, sipsip gaiɗ eblaih aɗit ele maɗ laippu awak, doɗ oh beɗulagppa eheɗ laa iitta ele aon, Yawe gumidna wana, Nug mettaglag. Amuam manaknu ofa aakku.

⁹ Makau dawai ele oohoak haknu amu, ag ee aegnu ofa ele hekkulag. Amu hekkulagnu, ag 3 kilogram plaua enanag, goɗen ele kaboliglag. Sipsip dawai okkai mak ele oohoak haknu amu, ag ee aegnu ofa ele hekkulag. Amu hekkulagnu, ag 2 kilogram plaua enanag, goɗen ele kaboliglag.

¹⁰ Sipsip gaiɗ eblaih aɗit ele, maɗ laippu awak ele anen anen ele oohoak haknu amu, ag ee aegnu ofa ele hekkulag. Amu hekkulagnu, ag 1 kilogram plaua enanag, goɗen ele kaboliglag.

¹¹ Amu ahilag eheɗ haknu nob nau doɗ tiigppa iitta meeb elele medakkunu amu, ag ib etta hipunin haknu ofa henana, ag meeme dawai laippu ele manan, Yawe mettaglag. Am ag deɗ oh hanhan manaknu ofa, amunu ee aegnu ofa ele hetteb, amu ahilag eheɗ haknu nob nau tiigppa iitta meeb elele medakkunu, ag ib etta hipunin haknu ofa ele hetteb amu, ag amu, amu wain gokkaɗaknu ofa amunu ele hekkulag, amge ag mana mettak laala imu ele hekkulag,” awa aum.

Pehppa Dayaknu Hobulppa mana mettak digdig hak

¹² Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Kalam eblaih aɗitppa, deɗ 15ppa, deɗ amuppa ag Yawe noobppa qagmena dup nona Nug binag meig! Ag uɗat hanhan hetteb amu, ag aib heppig. Ag Yawe dabmenana, qagmak gamag ahak ele deɗ eblaih aɗit ele hekkulag.

¹³ Deɗ digmakppa ag aab aɗunu ofa hekkulag. Mana mettak amunu muttuɗignu Yawe Nug ooppa ena dookkunu, ag makau gaiɗ 13 laa, sipsip dawai aɗit, sipsip gaiɗ 14 maɗ laippu awak ele, doɗ oh beɗulagppa eheɗ laa iitta ele amu aon, Yawe gumidna wana, Nug mettaglag. Amuam manaknu ofa aakku.

¹⁴ Aria, makau gaiɗ 13 ele anen anen oohoak haknu amu, ag ee aegnu ofa ele hekkulag. Amu hekkulagnu, ag 3 kilogram plaua enanag, goɗen ele kaboliglag. Amu sipsip dawai aɗit anen anen ele oohoak haknu amu, ag ee aegnu ofa ele hekkulag. Amu hekkulagnu, ag 2 kilogram plaua enanag, goɗen ele kaboliglag.

¹⁵ Amu sipsip gaiɗ 14 anen anen ele oohoak haknu amu, ag ee aegnu ofa ele hekkulag. Amu hekkulagnu, ag plaua enanag kilogram laippu, goɗen ele kaboliglag.

¹⁶ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

¹⁷ Aria, hobul imunu deɗ laa, deɗ aɗitppa amu, ag mana mettak imu ele hena, Yawe mettaglag: makau gaiɗ 12, sipsip dawai aɗit, sipsip gaiɗ 14 maɗ laippu awak ele; ag beɗulagppa eheɗ laa iitta ele.

¹⁸ Makau gaiɗ, sipsip dawai, sipsip gaiɗ ele oohoak haknu amu, ag ee aegnu ofa, wain gokkaɗaknu ofa ele, ahilag ebqak epeɗiak daatte, amuppaib hekkulag.

¹⁹ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa ele hetteb amu, ag amu ele anamib hekkulag. Ahilah wain gokkaɗaknu ofa ele hekkulag.

²⁰ Aria, hobul imunu deɗ laa, deɗ ewamppa amu, ag mana mettak imu ele hena, Yawe mettaglag: makau gaiɗ 11, sipsip dawai aɗit, sipsip gaiɗ 14 maɗ laippu awak ele; ag beɗulagppa eheɗ laa iitta ele.

²¹ Makau gaiɗ, sipsip dawai, sipsip gaiɗ ele oohoak haknu amu, ag ee aegnu ofa, wain gokkaɗaknu ofa, ahilag ebqak epeɗiak daatte, amuppaib hekkulag.

²² Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

²³ Aria, hobul imunu deɗ laa, deɗ waɗeleppa amu, ag mana mettak imu ele hena, Yawe mettaglag: makau gaiɗ eblaih laih ele, sipsip dawai aɗit, sipsip gaiɗ 14 maɗ laippu awak ele; ag beɗulagppa eheɗ laa iitta ele.

²⁴ Makau gaiɗ, sipsip dawai, sipsip gaiɗ ele oohoak haknu amu, ag ee aegnu ofa, wain gokkaɗaknu ofa, ahilag ebqak epeɗiak daatte, amuppaib hekkulag.

²⁵ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

²⁶ Aria, hobul imunu deɗ laa, deɗ tanig eleppa amu, ag mana mettak imu ele hena, Yawe mettaglag: makau gaiɗ eblaih waɗele, sipsip dawai aɗit, sipsip gaiɗ 14 maɗ laippu awak ele; ag beɗulagppa eheɗ laa iitta ele.

²⁷ Makau gaiɗ, sipsip dawai, sipsip gaiɗ ele oohoak amu, ag ee aegnu ofa, wain gokkaɗaknu ofa, ahilag ebqak epeɗiak daatte, amuppaib hekkulag.

²⁸ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

²⁹ Aria, hobul imunu deɗ laa, deɗ eblaih laippuppa amu, ag mana mettak imu ele hena, Yawe mettaglag: makau gaiɗ eblaih ewam ele, sipsip dawai aɗit, sipsip gaiɗ 14 maɗ laippu awak ele; ag beɗulagppa eheɗ laa iitta ele.

³⁰ Makau gaiɗ, sipsip dawai, sipsip gaiɗ ele oohoak amu, ag ee aegnu ofa, wain gokkaɗaknu ofa, ahilag ebqak epeɗiak daatte, amuppaib hekkulag.

³¹ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

³² Aria, hobul imunu deɗ laa, deɗ eblaih aɗitppa amu, ag mana mettak imu ele hena, Yawe mettaglag: makau gaiɗ eblaih aɗit ele, sipsip dawai aɗit, sipsip gaiɗ 14 maɗ laippu awak ele; ag beɗulagppa eheɗ laa iitta ele.

³³ Makau gaiɗ, sipsip dawai, sipsip gaiɗ ele oohoak amu, ag ee aegnu ofa, wain gokkaɗaknu ofa, ahilag ebqak epeɗiak daatte, amuppaib hekkulag.

³⁴ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

³⁵ Deɗ laa, deɗ eblaih ewamppa ag qagmena, dahil mettid henana, ag deɗ oh hanhan uɗat hetteb bia aib heppig.

³⁶ Ag deɗ amuppa Yawe, Nug mana mettak amunu muttuɗignu ooppa ena dookkunu, ag aab aɗunu ofa hekkulagnu, mana mettak amunu doɗ aon, Yawe gumidna wana, Nug metteg! Amuam manaknu ofa daakku. Ag amu hekkulagnu ag doɗ inam manadna, Nug mettaglag: makau gaiɗ laippu, sipsip dawai laippu, sipsip gaiɗ eblaih aɗit ele maɗ laippu awak; ag beɗulagppa eheɗ laa iitta ele.

³⁷ Makau dawai, sipsip dawai, sipsip gaiɗ ele oohoak haknu amu, ag ee aegnu ofa, wain gokkaɗaknu ofa, ahilag ebqak epeɗiak daatte, amuppaib hekkulag.

³⁸ Deɗ amuppa ag ele ib etta hipunin haknu ofa henana, ag meeme dawai laippu ele manan, Yawe mettaglag, amge ag deɗ oh hanhan manaknu ofa, amunu ee aegnu ofa, wain gokkaɗaknu ofa ele hetteb amu, ag amu ele anamib hekkulag.

³⁹ Hobul dayaknu haen epeɗiak, haen amuppa ag nai genab ana qakkaknu ofa, amu ag ɗo hamu mettaknu ofa ele Yawe mettanna, ag doɗ laala ele manadna, Yawe mettaglag. Nug mana mettak amunu ag ippuanattom ele, mana mettak amuam; manaknu ofa, ee aegnu ofa, wain gokkaɗaknu ofa, amu laippu dayaknu ofa ele,” awa aum.

⁴⁰ Yawe Nug Moses amegppa anam aum amunu, Moses nug Israel amelagppa keeke oh Yawe ab dooglagnunab aum amu, nug mattiom.