Namba 28 - Nobonob Baibel

Deɗ oh mana mettak haknu dayom

¹ Amu Yawe Nug Moses amegppa aum.

² “Na Israel amelagppa haknunab nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Ag doɗ, ee ele manan, mana mettak hekkulag amu, haen da ag meɗaglagnu ami, haen amuppa ag aon, da gumiɗna uɗin, da meɗaglagnu daatte. Mana mettak amuam dahilnu aab aɗunu ofa, nuhig muttuɗignu amu, da, Yawe, da ool ena dootte,” awa aum.

³ Amu Yawe Nug tuɗitta aum. “Na inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Deɗ anen anen oh ag doɗ, aab aɗunu ofa daaglagnu, ag aon, Yawe gumidna wana, Nug mettaglag amu, ag keeke imu maiglag: sipsip gaiɗ aɗit, maɗ laippu awak ele, beɗulahppa eheɗ laa iitta. Ag deɗ anen anen manaknu ofa daaglahnu managlag.

⁴ Sipsip gaiɗ laippu am buttua main, da meɗona, laa am tuebnab meeb maiglag.

⁵ Sipsip gaiɗ manan, da meɗaglagnu amu, ag 1 kilogram plaua enanag, am 1 lita olip goɗen ena ele kabolin, doɗ ele manan meɗeg! Amuam ee aegnu ofa aakku.

⁶ Mana mettak amuam manaknu ofa, ag deɗ deɗ hekkulagnu, Yawe Nug qauko Sinai appa anam hena mettaglagnu aum. Mana mettak amuam Yawe mettaknu aab aɗunu ofa; nuhig muttuɗignu Yawe Nug ooppa ena dootte.

⁷ Ag sipsip gaiɗ mainna amu, ag 1 lita wain aon, ag wain gokkaɗaknu ofa heig! Amuam wain gokkaɗaknu ofa aakku; ag Yawe, ag nuhig mettid haknu peh lakka appa gokkaɗna, Nug mettaglag.

⁸ Sipsip gaiɗ laippu, ee aegnu ofa, amu wain gokkaɗaknu ofa ele buttua mana mettak hekkulag. Amu haknu ippu laippu anamib amu, sipsip gaiɗ laa tuebnab mana mettak hekkulag. Mana mettak amuam aab aɗunu ofa, nuhig muttuɗignu da, Yawe, da oolppa ena doottem,” awa aum.

Sabatnu mana mettak haknu

⁹ Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Ag Sabat, deɗ amuppa amu, ag sipsip gaiɗ aɗit, maɗ laippu awak ele, beɗulahppa eheɗ laa iitta ele, ag amu aon, manan meɗan, doɗ amu, amu ee aegnu ofa ele heig! Ee aegnu ofa amu hekkulagnu amu, ag 2 kilogram plaua enanag, olip goɗen ele kabolin hekkulag. Ag wain gokkaɗaknu ofa ele hekkulag.

¹⁰ Manaknu ofa amu, am ag hanhan manaknu ofa hena, wain gokkaɗaknu ofa ele henana, imu ele Sabat deɗppa hekkulag,” awa aum.

Mana mettak, kalam bau deɗ digmakppa haknu

¹¹ Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Kalam anen anen dilag deɗ 1ppa amu, ag makau gaiɗ aɗit, sipsip dawai laippu, sipsip gaiɗ eblaih aɗit ele maɗ laippu awak, ag amu aon, Yawe gumidna wana, manaknu ofa hena, Nug metteg! Doɗ amu oh ag beɗulagppa eheɗ laa iitta.

^12-13 Makau gaiɗ anen anen ele oohoak haknu amu, ag ee aegnu ofa ele hekkulag. Amu hekkulagnu, ag 3 kilogram plaua enanag, goɗen ele kaboliglag. Sipsip dawai ele oohoak haknu amu, ag ee aegnu ofa am ele hekkulag. Amu hekkulagnu, ag 2 kilogram plaua enanag, goɗen ele kaboliglag. Sipsip gaiɗ maɗ laippu awak ele anen anen oohoak haknu amu, ag ee aegnu ofa ele hekkulag. Amu hekkulagnu, ag 1 kilogram plaua enanag, goɗen ele kaboliglag. Amuam manaknu ofa hak aakku. Mana mettak amuam Yawe mettaknu aab aɗunu ofa, nuhig muttuɗignu Yawe Nug ooppa ena dootte.

¹⁴ Doɗ anen anen mana mettak henana amu, ag wain gokkaɗaknu ofa ele hekkulag. Makau dawai anen anen elenu amu, ag 2 lita wain aon hekkulag; sipsip dawai elenu amu ag 1 lita maha ele aon hekkulag; sipsip gaiɗ maɗ laippu awak elenu amu, ag 1 lita aon hekkulag. Mana mettak amuam maɗ ooppa, kalam anen anen oh, kalam kunum digma bette, haen amuppa hekkulag. Mana mettak amu oh am, manaknu ofa aakku.

¹⁵ Ag manaknu ofa, nuhig wain gokkaɗaknu ofa ele deɗ ohppa hena amu, ag meeme dawai laippu ib etta hipunin haknu ofa daakkunu ele manan, da meɗaglag,” awa aum.

Pasowanu nai

¹⁶ Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Maɗ ooppa kalam digmakppa, deɗ 14ppa ag Yawenu Pasowanu deɗ gamag ahak ele hekkulagoitte.

¹⁷ Aria, deɗ dim lamittak, kalam amu ooppa, deɗ 15ppa, ag qagmak gamag ahak ele hekkulag. Qagmak gamag ahak ele amuppa ag bret yis iitta lakkulag. Qagmak gamag ahak ele amu digma beeb amu, ag deɗ eblaih aɗit ele qagmak amu daakku amu, ag deɗ amu oh, ag bret yis iitta aakkuib lakkulag.

¹⁸ Hobul amunu deɗ digmakppa amu, danab ah ag ahilag uɗat ag hanhan hetteb ele uuna, ag Yawe noobppa qagmena dup nona Nug binag mekkulagoitte.

¹⁹ Deɗ amuppa amu, ag Yawenu aab aɗunu ofa hena, amunu doɗ aon, Yawe gumidna wana, Nug metteg! Amuam manaknu ofa daakku. Ag mana mettak amu hekkulagnu amu, ag doɗ imu main, Nug mettaglag: makau gaiɗ aɗit, sipsip dawai laippu, sipsip gaiɗ maɗ laippu awak ele eblaih aɗit ele. Amu oh ag beɗulagppa eheɗ laa iitta.

^20-21 Amu ag makau dawai anen anen ele oohoak haknu amu, ag ee aegnu ofa ele hekkulag. Amu hekkulagnu amu, ag 3 kilogram plaua enanag, goɗen ele kaboliglag. Amu sipsip dawai ele oohoak haknu amu, ag ee aegnu ofa ele hekkulag. Amu hekkulagnu amu 2 kilogram plaua enanag, goɗen ele kaboliglag. Sipsip gaiɗ maɗ laippu awak ele oohoak haknu amu, ag anen anennu ee aegnu ofa ele hekkulag. Amu hekkulagnu, ag 1 kilogram plaua enanag, goɗen ele doɗ anen anennu kaboliglag.

²² Eheɗ haknu nob nau doɗ tiigppa iitta meeb elele medakkunu amu, ag meeme dawai laippu laa, ag ib etta hipunin haknu ofa ele hekkulagnu manan meɗaglag.

²³ Ag manaknu ofa, buttua hanhan hetteb amu henana, ag mana mettak imu oh ele heig!

²⁴ Ag Yawe, ag nuhignu doɗ amu, ee ele mana mettak heig! Mana mettak amu oh am aab aɗunu ofa. Ag deɗ eblaih aɗit amu, deɗ anen anen ohppa anamib heig! Mana mettak amunu muttuɗignu, Yawe Nug ooppa ena dootte. Ag deɗ ohppa mana mettak, manaknu ofa, amu wain gokkaɗaknu ofa henana, deɗ anen anen ohppa imu ele hekkulag.

²⁵ Deɗ eblaih aɗitppa amu, danab ah ag uɗat ag hanhan hetteb ele uuna, Yawe noobppa qagmena, dup nona binag mekkulagoitte,” awa aum.

Ee bau awak haenppa hobul

²⁶ Yawe Nug anam anana amu, Nug tuɗitta aum. ⌊“Na Israel danab ah amelagppa, ag hekkulagnunab inam appe doyeg!” awa aum. Nug anam a amu, Moses nug Israel amelagppa inam aum.⌋ “Haen ag ee bau digmena aonna amu, ag Ee Tatam Oɗue Digma Awaknu Hobul henana, ag Yawe noobppa qagmena dup nona Nug binag meig! Uɗat ag hanhan hetteb am aib heppig. Ag dad ahilagppanu ee bau aona, ee aeg baunu ofa hena, ag aon, Yawe gumidna wana, Nug mettaglag.

²⁷ Ag deɗ amuppa Yawenu manaknu ofa hekkulagnu, ag doɗ amu aon, Yawe gumidna wana, Nug metteg! Mana mettak amuam manaknu ofa daakku, amu doɗ ag manan, Nug mettaglag am iikku: makau gaiɗ aɗit, sipsip dawai laippu, sipsip gaiɗ eblaih aɗit ele maɗ laippu awak. Mana mettak amunu muttuɗignu, Yawe Nug ooppa ena dootte.

^28-29 Makau gaiɗ anen anen ele oohoak haknu amu, ag ee aegnu ofa ele hekkulag. Amuam 3 kilogram plaua enanag, goɗen ele kabolin hekkulag. Sipsip dawai okkai mak ele oohoak haknu amu, ag ee aegnu ofa ele hekkulag. Amuam 2 kilogram plaua enanag, goɗen ele kaboliglag. Sipsip gaiɗ, maɗ laippu awak ele anen anen ele oohoak haknu amu, ag ee aegnu ofa ele hekkulag. Amuam 1 kilogram plaua enanag, goɗen ele kabolin hekkulag.

³⁰ Eheɗ haknu nob nau doɗ tiigppa iitta meeb elele medakkunu amu, ag meeme dawai laippu laa manan, Yawe mettaglag.

³¹ Ag mana mettak amu henana, ag wain gokkaɗaknu ofa ele hekkulag. Ag manaknu ofa hanhan hetteb amu henana, ee aegnu ofa ele oh hena, ag mana mettak amu hena, ag imu ele oh hekkulag. Doɗ laippu laa beɗu nauhak laa ele daamanu dabmena autna aweg!” awa aum.