Namba 21 - Nobonob Baibel

Israel Kanan danab Horma appa eɗadppig

¹ Amu haen Kanan ted laa, Arat dilag king, nug am Negeb appa daattom, nug Israel ag ib man Atarim gotte uɗitteb doya amu, nug banelag ukka, laala aɗualattom.

² Anam daye, Israel ag Yawe amegppa, genabnab hekkulagnu nai inam anan qagappig. “Na danab imu ig eppenigppa maadppe, ig geha ahilkad aab okkai amu diit hepput, ag nahipnuib, nahip pelemppa daaglag,” aon appig.

³ Ag anam unuqitteg, Yawe Nug Israel dilag unuqittak doya, Nug he, Israel ag Kanan danab eɗadna, ag danab ah amu, ahilkad aab okkai ele diin heeg, ag Yawenuib nuhig pelemppa daappig. Israel danab ag anam heppig amunu, aben amu onig Horma ataɗppig.

Moses nug mat dottog heum

⁴ Amu Israel danab ah ag Kanan wanppa gokkulagnu, ag ahan, Edom wan aiɗna wana gokkulagnu dayom amunu, ag ahan qauko onig Hor uun, ib Le Kokoɗppa gotte, ib amuppa goppig. Ag ahan ukkaeg ukkaeg, ibppa danab ah ag bahilag yom.

⁵ Ag bahilag ye, ag Kayaknu, Mosesnu ele naittuɗ menana, ag Moses amegppa appig. “Ig ee iitta. Le ele iitta. Ee imu ig hanhan aot lattem ele amu, ig ee amunu oonigppa uuaknab doottem amunu, aɗinu na hee, ig Isip wan uut, ig atu taɗak imuppa mauhkkunignu oittem,” aon appig.

⁶ Ag naittuɗ mena, anam mattieg amu, Yawe Nug he, mat nau, danab emalatteg mauhtteb ele, mat amu laa ag bena emalattegeg, Israel danab ah kuɗum mauhadppig.

⁷ Anam mat emalatteg mauhattegeg, laa ag Moses toppa gona appig. “Ig hipunin hemut. Aɗinu? Ig Yawenu, nahipnu ele nai eheɗ amut. Amge na Yawe unuqidppe, Nug heeb, mat nau imu ag ii daamnanu oɗ medattem,” anan oɗ medappig. Ag oɗ mettaeg, Moses nug Yawe danab ah amu ehanadkkunu unuqittom.

⁸ Moses nug Yawe unuqitte, Nug Moses amegppa aum. “Na mat nau dottog hena, biidod laa igippa mena, biidod amu galappe dayebeb, danab, o ah aun nug mat emaleb, nug neekka, mat dottog amu anidkku amu, nug ii mauhma,” awa aum.

⁹ Yawe Nug anam hekkunu a amu, Nug aum amubia Moses nug mat dottog brasppa ha, biidod igippa me dayeye, danab aun aɗi mat emalatteg, ag neekkeg ukke, mat dottog brasppa hak amu anidna, ag ii mauhppig. Iitta.

Israel Moap goppignu kaya

¹⁰ Amu dimppa Israel danab ah ag gona, Obot appa haen tutu dayaknu aab kalappig.

¹¹ Appanu amu, ag Obot uun, ahan gona, Iye Abarim appa haen tutu dayaknu aab kalappig. Iye Abarim nug am atu taɗakppa, laih Moapnu kaɗag uɗitteppanu dayom.

¹² Aria, Israel danab ag Iye Abarim uun, ahan gona, Seret oolnu noak appa ag haen tutu dayaknu aab kalappig.

¹³ Amu ag Seret oolnu noak uun, ahan gona amu, ag Arnon le ihippa, appa haen tutu dayaknu aab kalappig. Arnon le am atu taɗakppa dayom. Arnon le am Moap danab, amu Amo danab ele gamalagppa tom dayom amunu, atu taɗak amunu laih am, Amo dilag dayom, laih am Moap dilag dayom.

¹⁴ Diig amunu buk onig Yawenu Ban, nai yaak amuppa nai inam daatte. “Aab onig Waheb, amu Supa, am appan oolnu noak naunau ele, am appan daatte. Aria, Arnon le,

¹⁵ amu amunu oolnu noak naunau ele ag gona gona, aab onig Ar, appa notteb. Ar am Moap tomppa daatte.”

¹⁶ Anam aakku amu, Israel danab ag Arnon le uuidna, ahan gona, aben onig Ber, appa goppig. Le moɗ amuppa Yawe Nug Moses amegppa aum. “Danab ah diin qagmaadppe, geha da ag le madakkul,” awa aum.

¹⁷ Yawe anam he, aria Israel ag ahi imu edappig: “Le moɗppa amu, Nug ig le mekkom. Ig ahi edatu!

^18-20 Ao, ig anuqak danab ag le moɗ megappignu ahi edatu! Ge, ig danab ah dilag anuqak danab ag le moɗ megappignu ahi edatu! Laa ag amu heppig ele, ag am anuqak danab. Ag dudqak hokkat, kingnu qakun ele aɗan, amuppa heppig.” Ag anam hewona, Israel danab ag atu taɗak amu, Beer ele uun, ahan Matana goppig. Ag Matana uun, ahan gona, Nahaliel tena, ag Nahaliel uun, ahan gona, Bamot teppig. Aria, ag Bamot uun, ahan gona, oolnu noak, laih amunu Moap danab ag, “Wan amu ihinig,” appig ele, ag appa wappig. Qauko Pisga am aben amu guguittak dayom, amu danab laa nug qauko Pisga attan ta dayaya, nug neekke ukke, wan meu waknu nakokib elele anidtte.

Israel danab ag King Sihon, amu King Og ele ban hena eɗatppig

²¹ Israel danab ag qauko Pisga guguittak appa tena amu, ag nai awa ukkak danab, Amo dilag king Sihon nai appeg dokkunu maatteg goppig.

²² Ag gona, nai imu nug medappig. “Uuigppe, ig nahip wanppa oppat-ta gokkunig. Ig geha dad laa, o iitta, grep dad keeke, o iitta le moɗppanu laa iinab aot lamata. Ig am ib man okkai, ib amu onig am Kingnu Ib, ig ib amuppa aakkuib mattat gota gota, nahip wan uut, gokkunig.” Ag nai amu meeg ukkom.

²³ Ag nai amu meeg ukkom, amge Sihon nug Israel ag nuhig wanppa wana gokkulagnu uuom. Nug uuom amunu, nug nuhig ban daup kuɗum oh diie, ag atu taɗakppa, Israel ele ban hekkulagnu goppig. Ag gona, aab onig Jahas appa teeg, appa ag Israel ele ban heppig.

²⁴ Amge Sihon nug ban ii eɗittom. Iitta. Israel ag nug, nuhig ban daup ele eɗadna, ag nug qeeg mauhom. Ag nuhig wan, Arnon leppan digma ukka, Jabok batak amu, ag amu oh aoppig. Sihon nuhig wan amu ukka, Amon dilagppa batom, Israel ag wan nuhig amu aakkuib aoppig. Aɗinu? Amon, ag ahilag wan tom amu, ag ɠagattag aɗappig.

^25-26 Hesbon am Sihon, Amo dilag king, nuhig aab okkai. Anukka nug Moap dilag king ele ban heya, nug Moap dilag wan ukka Arnon le batak, nug wan amu oh nuhigppanu awom amunu, gemu amu, Israel ag Amo dilag aab okkai, Sihon waappa daappig ele, ag amu oh diin, ag aab amuppa daappig. Aab amu oolagppan laa am aab okkai Hesbon, am nug taliliak aab naunau oh ele.

²⁷ ⌊Sihon nug aab Hesbon awe, nuhig aab okkai dayom,⌋ diig amunu Amo danab ag nai ahi bia inam yaappig. “Ag uɗina, Hesbon eɗun babaitteg! Ao, ag uɗinna, aab ⌊gemu⌋ Sihonnu aab okkai daatte amu, ag anukka dayom bia heppeg baɗ!

²⁸ Aɗinu? Aab ewak nug atu ewa eotte bia, Hesbonu king nug ukke, Moap ele nug qeppig. Yo, aab dittiak naɗi atu eotte bia, Sihon nug nuhig aab okkai Hesbon uua ukke, Moap ele nug qeppig. Aab ewak nug atu eotte bia, nug Moap aab okkai laa Ar, he nauhom. Ao, nug danab ag Arnon le ihippa, qauko nakokppa daappig ele amu, nug ag hatte nauhppig.

²⁹ Moap danab ah, ahilagnu am gadonnab gadon! O gadon, ag kayak hambuppuak Kemos noobppa dup nona binag metteb, ag aakku nauhppig! Ahilag kayak amu nug he, nug bekkod, ⌊ag am ahilkad nid danab amu,⌋ ag oolna gona, wan laalappa, appalag diig iittappa daatteb. Ao, ahilag kayak aɗekkud, ⌊ag am ahilkad nid ahin amu,⌋ ahilag kayak nug amu dilagnu he, Amo dilag king Sihon nug aɗalatte, ag nug eppegppa daatteb.

³⁰ Ig ag eɗadmut. Ao, danab ah Hesbon daappig, amu appanu ukka, Dibon batak, ag oh nauhppig. Ig heut, Hesbonnu ukka, Nopa, Medeba guguittak daatte amu, appa batak ig heut nauhppig.” Amo danab ag nai ahi bia anam bappaidppig.

³¹ Am Israel ag Amo dilag king Sihon eɗidna, ag Amo danab amu dilag wan aoppig amunu, Israel ag ahilag wan amuppa daappig.

³² Aria, Moses nug lokkumakppa atu italak danab maatte gona, Jaser italeg, dimppa Israel ag aab okkai amu, nuhig talilittak aab naunau daappig ele ohppa, ag Amo danab ah appa daappig amu lamadppig.

³³ Israel ag Jaser eɗittona amu, ag eɗun, aon Basannu ib ukkak, amu goppig. Ag ukkaegeg amu, Basan dilag king Og, nug nuhikkud ban daup oh ele ag Edrei appa, ag ele ban hekkulagnu uɗippig.

³⁴ Ag ban hekkulagnu uɗieg amu, Yawe Nug Moses amegppa aum. “Genabnab da ag ehanadppi, ag danab amu eɗadkkulag amunu, ag aib ahilagnu baɗappig. Geha da ag ehanadppi, ag nuhig ban daup oh eɗadppeg, da geha ahilag wan ag madakkul. Ag Amo dilag king Sihon, Hesbon dayaya gumak heum ele, ag nuhigppa heppig bia hetteg!” awa aum.

³⁵ Yawe anam aum amunu, Israel ag King Og, nug bekkod, am nuhikkud ban daup oh ele aqappig. Ag laippu laa ii uuitteg dayom. Anam hena, ag nuhig wan ahilag daakkunu aoppig.