Nahum 1 - Nobonob Baibel

¹ Nai imuam nai meunab ele, Niniwenu. Buk imu amu, Yawe Nug Elkos danab Nahum tuleglegppa ippunittom, am nai amu.

Yawe Nug Niniwenu oo nauhak huanaknabnu nai

² Yawe Nug nuhikkudnu, dahil doya laa aomanu doyak aɗa daya, nuhikkud kekeɗ bu madatte. Ao, Kayak Nug laa eheɗ hetteb ele dilagnu oppoɗi bak doyaya, Nug bu tutukku madatte. Nug laa ag nuhignu, “Ihinig kekeɗ” dootteb ele amu, Nug ag nob tutukku madatte. Ao, Nug nuhig kekeɗ dilagnu oppoɗi bak okkai doyaya daatte.

³ Yawe Nug paha oo ii nauhtte, amge nuhig ɠagattag am okkainab daatte. Nug anam daya hette amunu, Nug danab eheɗ hetteb ele bu madakku. Nug ag uuatteb, bu ii awak ele iinab oimna. Ao, Yawe Nug oiyeye, ulah kilibob, ulah okkai laa ele oh ahatteb. Danab wan gappudppa oiyeye, baegppa gappud ahatte, lombig am anambia nug baegppa daatteb.

⁴ Yawe Nug a, yu qaɗaiedatte. Ao, Nug a, le oh ele qaɗaiedatteb. Nug a, keeke oh Basan wanppa, Karmel wanppa ele mauɗna netteb. Ao, Lebanon wanppa haɗag oh nauhtteb.

⁵ Yawe Nug oiyeye, qauko ag uɗaltteb. Ao, qauko nakok am keeke le ma, noa gotte bia hetteb. Nug dayeye, wan oh uɗaltteb. Ao, keeke oh amuppa daatteb ele hahaɗtteb.

⁶ Yawe Nug oppoɗi beeb, aun nug ii nauhma? Ao, Yawe Nug oo nauhak huanaknab doyeb, auntai laa nug ena daakku? Nuhig oppoɗi bak am aab aɗu bia. Nug he, men Nug noobppa daatteb amu, ag aoɗtteb.

⁷ Yawe Nug am ena. Ao, Nug uug nau bak haenppa Nug nuhikkud danab ah dilag padal mak eɗitteb ena dayaknu ehanittak daatte. Ge, uug bak haenppa Nug laa ag nuhignu oolagppa genab dootteb ele atognoadtte.

⁸ Yawe Nug nuhikkud dilagnu anam hette, amge ui naɗinab na, keeke he nauhtte, amubia Yawe Nug heeb, Niniwe nauha auta autanab aokku. Ao, Yawe Nug kekeɗ nuhikkud lamattebeb, ag gatatuppa wakkulag.

⁹ Yawenu kekeɗ ag aɗi dabmak eheɗ aon, nuhigppa eheɗ hekkulagnu dabmetteb ele amu, Nug heeb, dabmak amuam iitta ma autanab aokku. Ao, Yawe nug heeb, ag daanna, baula anam hekkulagnu dabmekkulagnu iinab daama.

¹⁰ Aɗinu? Ag danab muɗi qaun ele ooppa dayeye, qaun nug aɗatteb bia daaglag. Ao, ag ahilag wain labeppeg, kaaka aqakku. Ge, gikkiɗah qaɗaiettak huana eotte bia, Yawe Nug heeb, ag nauhna, padal mekkulag.

¹¹ O Niniwe danab ah, ahilag okkai laa nug Yaweppa eheɗ hekkunu maittak awom daatte. Ge, nug laa nug ehanidppeppeg, ag nau hekkulagnu atte.

¹² Amge Yawe Nug inam atte. “Laa kuɗum ag Niniwe ehanadkkulagnu nai qakkan malappig. Ao, ag ahilkad daup am huanak, amge da heppi, ag nena qena, nauhkkulag. O Juda danab ah, da hei, ag uug maotteb, amge da baula uug ii madapa.

¹³ Gemu ag Asiria waappa daan oitteb, amuam makau aɗit doɗnu duugppan tuqai qakkalatakppa uɗat heeheh, laa nug doɗnu duugppan tuqai qiia awe, makau aa hamu, uɗat ii heyaya oittep, amubia da heppi, ag Asiria dilag eheɗ hattak waappa ii daamna. Ao, da danab nug eppeg, baeg ele hippalak daatte, laa nug sen pakkua mette, nug hippalak ii daatte, amubia da heppi, ag Asiria dilag hippalakppa ii daamna.” Yawe Nug anam awa atte.

¹⁴ Yawe Nug haknunab anak imu Niniwenu aum. “Ag buɗulkad laa, ag onilkad tuɗid ele daakkunu am laa ii daama. Da ahilkad kayak hambuppuak adppa hoiyak, kayak hambuppuak gol o silwappa hak ele, dottolkad amu ag ahilkad kayak hambuppuak dilag mettid lagppa daatteb amu, da heppi, ag nauhkkulag. Ag Niniwe, ag am danab ah ahilag kobol uɗig wak ele amunu, ag aguppa niiglagnu da ahilag moɗ bappaidkkul” awa atte.

¹⁵ O Juda danab ah, ag qaukoppa neekkeg! Appanu laa nai ena awa uɗitte. Nug ahilag wanppa maɗoɗ daaglagnu nai awa uɗitte. O Juda danab ah, ag ahilag qagmak gamag ahak ele haenppa, ag gamag ahak ele daan, ag Yawe amegppa aɗi keeke genab hekkulagnu nai anan qagappig amu, ag anam heig! Aɗinu? Nau hak danab ag baula ahilag wanppa ban hekkulagnu ii temana. Iitta. Da heppi, nau hak danab ag nauhna autna aona, padal mekkulag.