Maika 5 - Nobonob Baibel

Danab okkai, wan oh gumakkunu, Nug Betlehem appanu bekku

¹ Kekeɗ ag uɗin, oo mekkan iqaglagnu daatteb amunu, Juda dilag anuqak danab, ag appeg, ban danab, ag ban hekkulagnu babaittak dayeg! Kekeɗ ag Israel dilag okkai hippeg buppa makkuɗkkulag.

² Amu Yawe Nug atte. “Amge ag danab ah Betlehem Eprata daatteb, ag Juda wanppan aab ikki laa oh oolagppa aab ikki nakoknab daatteb, amge dimppa laa Nug ag oolagppanu, Nug Israel dilag okkai danab dayaya, gumak uɗat amu ha meɗakkunu bekku. Laa amu hekku, Nug mamekkud huu am tumaiib ii digmeppig; iitta, Nug mamekkud am anukkanab digmeeg uɗie uɗie, gemu ele daatteb. Nug huu amuppa bekku.” Yawe Nug anam atte.

³ Laa amu, Nug dimppa dokku amunu, haen gamag imuppa Yawe Nug heeb, kekeɗ ag Israel eɗadppeg, Israel ag ag eppelagppa daappeppeg, laa nug nid amu menukkun daatte am menueb, Israel lailkad laa piɗe piɗe daatteb ele eɗun uɗin, lailkad ele oh laippu daaglag batakku.

⁴ Amu laa Israel gumadkku Nug hibaitta, nuhikkud danab ah, sipsip gumak danab sipsip nuhikkud gumadtte, amubia nuhikkud danab ah gumadkku. Nug Yawenu ɠagattagppa nuhikkud danab ah gumadkku. Ao, Yawe, Nug dagom onig ɠagattag okkai ele, Nug am laa Israel gumadkkunu Kayak; amu laa Israel gumadkku amu, Nug Yawe onigppa nuhikkud danab ah gumadkku. Nug ag gumadkku amunu, ag ena, baɗak iitta eleppa daaglag. Aɗinu? Haen amuppa Nug onig, ɠagattag elenu nai am aha ukkeb, wan ohppa gokku.

⁵ Am danab amu Nug heeb, maɗoɗ daakku. Asiria ag ig Israel eɗigkkulagnu uɗiglag. Ao, ag ihinkad aab aɗ ɠagattagnab eleppa laippu tappa ukkakppa oiglag. Amu diig amunu ig danab sipsip gumadtteb, ig gumak danab amubia eblaih aɗit ele otiadkkunig. Ao, ig ikki danab eblaih ewam ele otiadkkunig.

Ehanittaknu, bu mettaknu nai ele

⁶ Ig otiadpput, danab okkai amu ag Asiria wan qep elabppa heppeg nauha auta aokku. Ao, ag Nimrot appag diig, am Asiria, ag ahilag qep elab ag eppelagppa daappeg, wan amu heppeg nauha auta aokku. Laa Nug ig Israel gumigkku, Nug danab okkai eblaih ewam ele amu eppelagppa heeb, ig Asiria eppelagppa ii daamta. Aɗinu? Asiria ag ig Israel eɗigkkulagnu uɗiglag. Ao, ag ihinig wan tom ooppa laippu tappa ukkakppa uɗiglag.

⁷ Amu dimppa amu, oɗo yaak danab Jakop buɗubppanu amu, ag danab ah laa oh oolagppa daaglag. Baito Yawe me nette amu, baito amuam danab amelag ii mette. Ao, gu nakok gikkiɗahppa nette, gu amuam laa dilag ameg mak ii hette. ⌊Amubia Jakop buɗub ag Yawenu ehanittak aakkuib dabmekkulag, danab dilag iitta⌋.

⁸ Jakop buɗub ooppan oɗo yaak danab amu, ag wanppan wan ohppa daaglag. Ao, ag danab digdig oolagppa daan oiglag. Ag anam daan, ag laion atuppan doɗ dakkuɗ oolagppa daatte, ag amubia daaglag. Ao, ag laion bau sipsip oolagppa daatte, ag amubia daaglag. Laion bau anam amu, nug oiyaya, sipsip aqaaqa, guittak okkai madatta gotte, am aun laa nug sipsip amu ehanadkkunu elele? Laa iitta.

⁹ Laa iitta, am amubia, ag Jakop buɗub oɗo yaak danab daatteb ele, ag kekeɗ ahilag huan eɗadkkulag. Ao, ag ahilag kekeɗ hadappeg, ag padal mekkulag.

¹⁰ ⌊Israel ag oɗo yaak danab ah daatteb amu, ag anam hekkulag, amge tatam ahilagnu⌋ amu, Yawe Nug atte. “Deɗ amuppa amu, da ahilkad hos banppanu amu, da heppi mauhkkulag, Ao, da bannu karis ele heppi nauhna autna aoglag.

¹¹ Da heppi, ahilkad aab okkai ⌊ban haenppan aɗ ele⌋ amu nauhkkulag. Ao, da ahilag ban haknu aben ɠagattag ele heppi, loppaɗak daaglag.

¹² Da heppi, emaɗ hak maɗi ahilagppa iinab daama. Ao, da heppi, ag baula danab laa emaɗ hak kobolppa heppeg ii nauhma.

¹³ Da heppi, ahilkad kayak hambuppuak dottolkad adppa hoiyak am nauhak daaglag. Ao, da heppi, men gappi ag oolagppa daatteb ele ag baula ii daamna. Da amu heppi, ag baula keeke ag eppelagppa heppig ele noolagppa dup nona binalag ii memana.

¹⁴ Da heppi, laa ag kayak hambuppuak Aserah dabmekkulagnu biidod oh hiɗaladkkulag. Ge, ahilkad aab okkai, ⌊kayak hambuppuak dottolkad appa daatteb amu,⌋ da aab amu ele heppi nauhkkulag.

¹⁵ Amu wanppan wan laa oh dilag danab ah ag dahil nai ii dim lamittegeg uɗie, gemu ele dim ii lamidtteb amu, da oo nauhak, oppoɗi bak ele doyen, da ag eheɗ heppignu nob tutukku madakkul,” awa atte.