Lewitikas 9 - Nobonob Baibel

Mana mettak danab ag maɗi ahilag digmeppig

¹ Baɗ awak dimppa, deɗ eblaih ewam amuppa, Moses nug Aron, nug bekkod, amu Israel dilag ikki danab ele onilagppa e uɗin, qagmeppig.

² Nug he, ag qagmeeg, Moses nug Aron amegppa aum. “Ib etta, hipunin haknu ofa nahipnu haknu, na makau gaiɗ laa, amu manaknu ofa nahipnu haknu, na sipsip dawai laa ele, doɗ aɗit amu oh aa beɗulahppa eheɗ laa iitta ele amu, na doɗ amu diiatna, Yawe gumidna wana, Nug mette!

³ Anam henana amu, Israel danab ah appe, ag akka ahilagnu, ib etta hipunin haknu ofa hekkulagnu, ag meeme dawai laa aon, ag manaknu ofa haknu, ag makau gaiɗ, maɗ laippu awak ele, amu sipsip gaiɗ maɗ laippu awak ele, doɗ amu, aa oh am laippu laa beɗuppa eheɗ laa iitta ele amu, aria

⁴ ag laippu dayaknu ofa haknu makau okkai ebehi ele laa, amu sipsip dawai laa ele aon, doɗ amu oh diiadna Yawe toppa wana, ag plaua, olip goɗenppa kaboliak ele, ee aegnu ofa haknu ele aon wakkulag. Am Yawe Nug ag noolagppa gemu tula dokku amunu appe, ag mana mettak amu oh akkan, Yawe toppa waig!” awa aum.

⁵ Moses nug Aron anam amegppa a, nug Israel danab ah ele ag keeke amu oh akkan, mettid haknu peh lag danab ah appa qagmetteb ele, ag lag amu odppa, Moses nug ag haknunab aum bia heppig. Israel dilag tamaniak oh ag uɗin, Yawe noobppa appa hippaidna daappig.

⁶ Daaegeg, Moses aum. “Yawenu binag amahlak oppiaawak ele miag atieb anidkkulagnu amu, Yawe Nug ag inam hekkulagnunab ag amelagppa aum,” awa aum.

⁷ Nug anam awowa, Moses nug Aron amegppa aum. “Nahip ib etta hipunin haknu ofa, manaknu ofa ele dilah doɗ amu diiatna, qaɗabppa wana, mana mettak hee! Nahipnu eheɗ haknu nob nau doɗ tiigppa iitta meeb elele medakkunu, na amu hekkut. Aria, Yawe Nug haknunab aum bia, na doɗ keeke, danab ah diin doppig ele, amuppa ahilag eheɗ haknu nob nau doɗ tiigppa iitta meeb elele medakkunu, na doɗ, ee aeg amu ele manan Yawe mette!” awa aum

⁸ Anam aum amunu, Aron nug qaɗabppa wana, nug makau gaiɗ awa, ib etta hipunin haknu ofa nuhignu haaha, baag otaɗowa, nug mana Kayak mettom.

⁹ Nug bekkod ag tiig aon doeg, nug eppeg doɗo laa me, tiig amuppa no, taula awa, qaɗabnu qeqeɗi waɗeleppa meum. Nug tiig laa oh amu qaɗab diigppa gokkaɗom.

¹⁰ Anam hewowa, nug ittag, aɗitta doɗo aɗit, gamagnu maha nakok ele, doɗ ib etta hipunin haknu ofa daakkunu, nug doɗ amuppanu awa, qaɗabppa manatte eoppig. Am Yawe Nug Moses amegppa anam haknunab aum bianab heum.

¹¹ Nug maha amu oh qaɗabppa manattom, amge nug teppu, gaɗa ele haen tutu dayaknu aab kalak dimittim, appa manatte ewom.

¹² Amu hewowa amu, Aron nug manaknu ofa hekkunu doɗ baag otaɗom. Nug bekkod ag tiig aon mettaeg, nug awa, qaɗab gigin waɗele ohppa tauɗ qettom.

¹³ Nug amu ha male amu, ag manaknu ofanu doɗ maha qak, ikki ele oh hubhub aon mettaegeg, nug awa, qaɗabppa maatta mane eoppig.

¹⁴ Aria, nug gamagppan keeke, amuam oo, biig, gamag, keeke, amu baekkud ele, nug amu oh leppa ihowa, nug awa, manaknu ofa qaɗeppa mewowa, nug qaɗabppa mane ewom.

¹⁵ Anam hewowa amu, Aron nug Israel danab ah dilag mana mettak awa, Yawe toppa waum. Nug meeme dawai, danab ah dilag amu awa, ib etta hipunin haknu ofa haaha, baag otaɗowa, nug mana Yawe mettom. Nug mana mettak amuam nukka nuhignu heum bia heum.

¹⁶ Aria, nug aakku manaknu ofanu doɗ awa, Yawe toppa ukka, amu Yawe nug anam haknu aum, ib amu dim lamitta heum.

¹⁷ Nug ee aegnu ofa amu ele awa, Yawe toppa ukka, nug plaua eppeg laippuppa appua, qaɗabppa ma, mane ewom. Doɗ manaknu ofa buttua haen oh tuɗid ele hetteb, amuam mana mettak laa. Ag amu hena, ag imu ele heppig.

¹⁸ Anam hewowa amu, Aron nug danab ah dilagnu laippu dayaknu ofa haaha, makau okkai ebehi ele dawai, amu sipsip dawai ele baalah otaɗate mauhpiɗ. Nug bekkod ag tiig aon mettaeg, nug tiig amu awa, qaɗab gigin waɗele ohppa tauɗ qettom.

¹⁹ Aria, nug makau okkai ebehi ele dawai amu, sipsip dawai ele boolah ittag ele, amu ittag ooppan keeke aɗak daatte oh, aria aɗitta doɗo aɗit, amu gamagnu maha nakok ele diia,

²⁰ nug ittag amu awa, doɗ amu momolah qaɗeppa ha malowa, nug eɗua awa, ittag amu qaɗabppa mane ewom.

²¹ Aron nug doɗ momolah, amu baelah tuɗi naɗiap ele awa, nug huma epponitta mettaknu ofa Yawe noobppa heum. Moses nug anam haknunab aum bia amu, nug heum.

²² Amu dimppa Aron nug danab ah dilagppa eppeg huma itattom. Aria, ib etta hipunin haknu ofa, manaknu ofa, amu laippu dayaknu ofa ele hak dimppa, nug qaɗabppanu honap neum.

²³ Aron anam he, Moses nug Aron ele aa mettid haknu peh lag danab ah appa qagmetteb ele, aa lag amu ooppa nopiɗ, amu haen aa eɗuya dimittim beya, danab ah itatteh, amu Yawenu binag amahlak oppiaawak ele am, danab ah oh dilagppa miag atiom.

²⁴ Aakku, Yawe toppan aab aɗu na, manaknu ofa, amu ittag ele qaɗabppa dayom, am laippun ewa iitta meum. Haen danab ah ag amu oh anidna, ag maɗoɗppan gamag ahak doon ena, ag laippun gatelag qaun ona, gomelna, iɗulag wanppa meppig.