Lewitikas 7 - Nobonob Baibel

Eheɗ haknu ofa, mana mettak amu haknu ippunu nai laa

¹ Nai imuam eheɗ haknu ofa haknu ɗo iikku. Mana mettak amuam Yawenu tituanaknab daatte.

² Ag eheɗ haknu ofa haknu amu, ag manaknu ofa hena, amunu doɗ baag otaɗtteb, aben amuppa appa ag mana mettak amunu doɗ baag otaɗkkulagoitte. Ag baag otaɗna, tiig amu ag qaɗab gigin waɗele ohppa tauɗ qettaglagoitte.

³ Mana mettak danab nug doɗ amu ittag oh, amuam boob ittag ele, ittag ooppan keeke aɗak daatte oh, nug amu awa,

⁴ nug aɗitta doɗo aɗit, ittalah ele, maɗog guguittak daattep, aria gamagnu maha nakok ele aokku. Danab nug aɗitta doɗo ittalah ele awawa, nug gamagnu maha nakok ele awaɗ! Nug keeke amu oh awa, nug qaɗabppa manadkkuoitte.

⁵ Mana mettak danab ag maha amu qaɗabppa manana, amuppa ag Yawe mettaknu aab aɗunu ofa hekkulag. Amuam eheɗ haknu ofa aakku.

⁶ Mana mettak danab baegppan amu, amuppan danab oh ag mana mettak amu lakkulagnu elele. Amge ag aben, Yawenu tituanak daatte ele, amuppa daanna lakkulagoitte. Ee amuam Yawenu tituanaknab daatte.

⁷ Ib etta, hipunin haknu ofa, aria eheɗ haknu ofa ele amu, mana mettak aɗit amunu doɗ teppu am mana mettak danab aun nug doɗ amuppa, eheɗ haknu nob nau doɗ amu tiigppa iitta meeb elele medakkunu hette amu, teppu amuam nuhig.

⁸ Am manaknu ofanu amu, doɗ amu gaɗa am mana mettak danab nug mana mettak amu hette ele, am nuhig daakku.

⁹ Am ee aegnu ofa oh, am manaknu tappiɗppa babaittakte, o aen mahappa manakte, amu oh am mana mettak danab aun nug awa uɗia, Yawe medatte, am nuhig aakku.

¹⁰ Aria, ee aegnu ofa laa oh amu, ag plaua olip goɗen eleppate kaboliak, o iitta, plaua qaɗaiettakte, amunu hak oh am, ag otin, mana mettak danab oh, ag bekkalkad ele mattaglag; ag oh Aron buɗub.

Laippu dayaknu ofa haknu nai laa

¹¹ Imuam laippu dayaknu ofa iɗu iɗu awa, Yawe gumitta wana, Nug mettaknu ɗo iikku.

¹² Laa nug Yawe amegppa, ‘Ena heme,’ awa akkunu ha, nug ena heme anaknu ofa hekku dayeb, nug doɗ awa, mana mettak hette haaha, nug bret batappatak, yis iitta, goɗen ele kaboliak laala, bisket teppu iitta, yis iitta, goɗen qaɗeppa laittak ele laala, amu bret batappatak, plaua enanag, goɗen ele kaboliak ele, nug amu oh mana mettak amu ele mekkuoitte.

¹³ Haen nug laippu dayaknu ofa ha, Yawe amegppa, ‘Ena heme,’ akkunu hette amu, nug bret yis ele kaboliak, amu ele awa, Yawe gumitta wana, Nug medakkuoitte.

¹⁴ Nug bret diig anen anen laib laib amu awa dokkuoitte. Nug akka ukka, Yawe, nuhig daakkunu hamu metteb amu, amuam geha mana mettak danab nug Yawe amegppa, ‘Ena heme,’ anaknu, Nug ele laippu dayaknu ofa amu haaha, doɗ mana Yawe medatte, nug doɗ amu tiig awa, qaɗab tauɗ qedatte ele amu, bret amuam nug, nuhig daakkuoitte.

¹⁵ Yawe amegppa, ‘Ena heme,’ anaknu, laippu dayaknu ofanu amu, doɗ amu teppu am deɗ nug mana mettak hette, amuppaib lanaknu daakkuoitte. Teppu laa wagɗeb lanaknu bakkalenu iinab mak daama.

¹⁶ Amge aun laa nug nai genab ana qakkaknu ofa hekkunu, o laa ɗo hamu mettaknu ofa hekkunu doɗ awa watte amu, doɗ teppu amu, deɗ amuppa lanaknu; amge laih laa daakku dayeb, wagɗeb deɗ amuppa lanaknu elele.

¹⁷ Amge doɗ teppu dayeb ukkeb, deɗ ewamppa daakku dayeb amu, teppu amu maneb ewa, iitta maknu daakkuoitte.

¹⁸ Amu doɗ teppu, laippu dayaknu ofa haknu amu, nug dayeb ukkeb, deɗ ewamppa laa lakku amu, Yawe Nug mana mettak amunu ena ii doya ii aoma. Danab nug mana mettak amu hekkunu dabmeum ele amu, Yawe Nug nuhignu, ‘Nug doɗ amu mana, da meɗom,’ ii dabmema. Deɗ ewamppa amu, doɗ teppu amuam Yawe noobppa dubuttid ele daakku. Aun nug lakku amu, nug eheɗ aakku ha, nug amunu bu aokku.

¹⁹ Doɗ teppu, laippu dayaknu ofa henana, manan, Yawe mettaeg, keeke laa Kayaknu neekkakppa dubuttid ele lauɗittak dayeb amu, teppu amu lanaknu ii daama. Amu maippeg ewa, iitta mekkuoitte. Amu laippu dayaknu ofanu teppu lanaknu daatte amu, danab ag Kayak ele ouqa dayaknu elele, ag oh lakkulagnu elele.

²⁰ Amge danab aun laa nug Kayak ele ouqa dayaknu elele iitta, nug laippu dayaknu ofanu teppu, Yawenu aon doppig ele, nug teppu amu lakku amu, nug Israel oolagppanu geɗittak daakkuoitte.

²¹ Aun laa nug aɗi keeke Kayaknu neekkakppa dubuttid ele daatte, amuam danab Yawe ele ouqak daakkunu elele iitta, o doɗ ii lanaknu epeɗiak daatte, o aɗi keeke laa Kayaknu neekkakppa dubuttid ele, laa nug amu aɗowa, nug laippu dayaknu ofa, auntai Yawenu ha mettom ele amu, nug doɗ amu teppu laa awa lakku dayeb, nug Israel oolagppanu geɗittak daakkuoitte,” awa aum.

Yawe Nug Israel danab ah ag ittag, tiig ele lamananu aib aum

²² Amu Yawe Nug Moses amegppa aum.

²³ “Na Israel danab ah amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Ag makau, o sipsip, o meeme ittag iinab lamana.

²⁴ Ag doɗ mauhak niieye anttak, o doɗ dakkuɗ ag doɗ laa aqaeg mauhppig ele amu, ag amu ittalkad aon, amuppa keeke laa hekkulagnu elele, amge ag iinab lamana.

²⁵ Aun laa nug doɗ laa, danab nug doɗ amu aab aɗunu ofa ha, Yawe mettom ele, danab aun nug doɗ amunu ittag laa awa lakku, nug Israel oolagppanu geɗittak daakkuoitte.

²⁶ Ag adeppa adeppa daatteb ele amu, appa ag ai tiilag, o doɗ tiilag iinab lakkulagoitte.

²⁷ Aun laa nug tiig lakku amu, nug Israel oolagppanu geɗittak daakkuoitte,” awa aum.

Teppu mana mettak danab dilag epeɗiak daakku

²⁸ Amu Yawe Nug Moses amegppa aum.

²⁹ “Na Israel danab ah amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Aun laa nug laippu dayaknu ofa awa, Yawe toppa dotte amu, nug maha laih awa, Yawe toppa dokku.

³⁰ Nug Yawe mettaknu aab aɗunu ofa amu hekkunu haaha, nug eppegppanab nuhig mana mettak, amunu laih awa doa, Yawe medakku. Nug awa dokku, amuam doɗ ittag, momo ele. Nug momo amu awa doa, nug huma epponitta mettaknu ofa, Yawe noobppa hekku.

³¹ Nug anam heeb, mana mettak danab nug ittag amu qaɗabppa manakku, amge momo amu Aron, bekkod ele dilag daakku.

³² Ag laippu dayaknu ofa hetteb amu, amuppanu ag tuɗi naɗiap aon, ag mana mettak danab hamu mettaglag.

³³ Ag tuɗi naɗiap amu hanhan aoppeg, teppu amuam mana mettak danab, Aron buɗub aun nug laippu dayaknu ofappan tiig qaɗabppa tauɗowa, ittag ele mana Kayak medatte amu, teppu amuam nuhig daakkuoitte.

³⁴ ⌊Nai amunu amu, Yawe atte.⌋ ‘Aɗinu anam daakkuoitte? Israel danab ag laippu dayaknu ofa hekkulagnu doɗ akkan dotteb ele amu, da amuppanu doɗ momo, tuɗi naɗiap ele huma epponitta mettak ele, da teppu amu haen oh mana mettak danab dilagnu epeɗiatmi daatte,’ ” awa atte.

³⁵ Doɗ danab ag amuppa Yawenu aab aɗunu ofa hetteb ele amu, amuppanu laih Aron, bekkod ele dilag epeɗiak daatte am aakku. Haen Moses ag Yawenu mana mettak danab daaglagnu diiatta, Yawe gumitta wana, Nug mettom, haen amuppa epeɗiak amunu aakku beum.

³⁶ Mana mettak danab ag goɗen gokkaɗakppa tituanak aoppig, haen amuppa amu, Israel ag ahilkad teppu epeɗiak amu hanhan mana mettak danab mattaglagnunab, Yawe Nug ag ɗo mattom. Ɗo amu buɗub buɗub doobob, ahilagnu hanhan daakkunu daatte.

³⁷ Mana mettaknu ɗo amu oh, Yawe, Moses mettom amu, amuam dim lamitta haknu ɗo, manaknu ofanu, ee aegnu ofanu, ib etta hipunin haknu ofanu, eheɗ haknu ofanu, baɗ awaknu ofanu, laippu dayaknu ofanu ele; am amu oh dilag ɗo aakku.

³⁸ Yawe Nug Sinai qaukoppa Moses amegppa haknunab nai amu, Israel ag Sinai atu taɗakppa, ag mana mettak Yawenu aon wakkulagnu mattom.