Lewitikas 17 - Nobonob Baibel

Tiig lanaknu aib daatte

¹ Amu Yawe Moses amegppa aum.

² “Na Aron, nug bekkod, amu Israel danab ah ele oh amelagppa nai imu appe doyeg!” awa aum. ⌊Yawe Nug anam a amu, Moses nug ag amelagppa inam aum.⌋ “Imuam Yawenu nai dim lamitta, haknunab daatte.

³ ‘Am Israel ted laa nug makau dawai ebehi ele, o sipsip nag, o meeme mana, Kayak medakkunu haaha, nug Israel dilag haen tutu dayaknu aab kalak ooppa, o dimittim amu hekku dayeb,

⁴ amge nug doɗ amu awa, mettid haknu peh lag danab ah appa qagmetteb ele, nug lag amu odppa, Yawe gumitta, doɗ amu mana, Yawe medakkunu ii uɗitte dayeb, nug am danab laa nug hipunin okkai ha, layag qe mauhtte, hipunin amubia hekku. Nug aɗi heum ele, amuam danab laa qe mauhak bia heum amunu, nug Israel oolagppanu geɗittak daakkuoitte.

⁵ Ɗo imu mak daattenu diig am, Israel danab ah ag gemu aab dimittim, dad okkaippa Yawenu mana mettak hetteb bia tuɗidna ii hemana; ag doɗ amu aon, mettid haknu peh lag danab ah appa qagmetteb ele, ag appa hekkulagnu daatte. Danab ag doɗ amu akkan, mana mettak danab toppa, amuam Yawe toppa, ag nuhig peh lag danab ah appa qagmetteb ele, ag lag amu odppa wakkulagoitte. Ag doɗ amu akkan, appa gona, laippu dayaknu ofa hekkulag.

⁶ Aakku mana mettak danab nug tiig Yawenu qaɗab, qaɗab amuam mettid haknu peh lag danab ah appa qagmetteb ele, am lag amu odppa daatte amu, mana mettak danab nug qaɗab amuppa tiig tauɗowa, nug ittag maneb eokku. Mana mettak amunu muttuɗignu, Yawe Nug ooppa ena dootte.

⁷ Am danab ah ag aben laih laih ouɗi nau dilagnu mana mettak hena, ag noolagppa dup nona binalag metteb amu, ag mana mettak hak amu uuglagoitte. Ɗo imu buɗub buɗub doobob, ahilagnu hanhan daakkunu daatte,’ ” awa aum.

⁸ Yawe Nug Moses amegppa, nug anam akkunu ana, nug ele amegppa aum. “Na inam ele appe doyeg!” awa aum. ⌊Nug anam a amu, Moses nug ag amelagppa aum.⌋ “Ɗo imuam Israel danab, wan laihnu danab, ag uɗin, ag oolagppa daatteb ele, ag oh tonadtte. Am aun laa nug manaknu ofa, o mana mettak laa ha,

⁹ nug mettid haknu peh lag danab ah appa qagmetteb ele, ag lag amu odppa Yawe mettaknu ii awa watte amu, nug Israel oolagppanu geɗittak daakkuoitte.

¹⁰ Am laa amu, da geha Israel ted laa, o wan laihnu danab, ag uɗin, ag oolagppa daatteb, ag ted laatai, nug doɗ tiig le dayebeb lakku dayeb, o nug doɗ tiig ɠagattag eppom lakku dayeb amu, da geha heppi, danab amu nug Israel oolagppanu geɗittak daakku.

¹¹ Aɗinu? Keeke oh bau daatteb ele amu, ag tiigppa bau daatteb. Qaɗabppa amu, mana mettak danab nug heeb, ahilag eheɗ haknu nob nau tiigppa iitta meeb elele medakkunu hette amunu, da ag eheɗ haknu nob nau tiigppa iitta meeb elele medakkunu hekkulagnu tiig ag mattami.

¹² ⌊Amu Yawe atte.⌋ ‘Amunu, da Israel danab ah dilag attem. Ag, amu wan laihnu danab ag uɗin, ag oolagppa daatteb ele, ag oh tiig iinab lakkulagoitte, awe attem.’

¹³ Aria haknunab nai imu ag Israel, wan laihnu danab ag uɗin, ag oolagppa daatteb ele, ahilag ohnu aakku atte. Ag doɗ dakkuɗ, o ai laa lanaknu elele gona oina aqana keeke, amu ag tiig amu heppeg neeb, wanppa tonaglagoitte.

¹⁴ Aɗinu? Keeke oh bau daatteb ele amu, ag tiigppa bau daatteb. Anam amunu, da ag Israel danab ah ag tiig iinab lamananu ami. Doɗ, o ai oh ag bau daatteb ele amu, ag tiigppa bau daatteb. Aun nug tiig lakku amu, nug ⌊Israel oolagppanu⌋ geɗittak, laih daakkuoitte.

¹⁵ Am nai keeke haknunab daatte imu am, Israel, wan laihnu danab ele, ahilag ohnu aakku daatte. Aun nug doɗ nug nukka mauhom, o nug doɗ layag laate qe mauhom, amu lakku dayeb amu, nug lamen nuhig ihalatta, le ele laakkuoitte. Amu nug aakku Kayak ele ouqa dayaknu elele iitta dayeb ukkeb, tueb meeb batakku. Amu dimppa nug am Kayaknu neekkakppa dubuttid iitta daakku.

¹⁶ Amge nug nuhig lamen ii ihalatta, nug le ele ii laakku dayeb, nug eheɗ aakku ha, nug amunu bu aokku,” awa aum.