Lewitikas 12 - Nobonob Baibel

Nid menuowa, anig beɗu oppiaawak dayaknu ippunu nai

¹ Amu Yawe Moses amegppa aum.

² “Na Israel danab ah amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Ah laa nug oo ele daya, nug nid danab menutte amu, nug deɗ eblaih aɗit, nug kalam oɗe antta, Kayak ele ouqa dayaknu elele iitta daatte, amubia nid awak dimppa ele nug deɗ eblaih aɗit ele Kayak ele ouqa dayaknu elele iitta daakku.

³ Deɗ eblaih ewamppa amu, nid nug gaɗa otaɗak daakkuoitte.

⁴ Amu hak malak dimppa, ah nug deɗ 33 baula ameg mak daakku. Amuam nug nid awom haenppa tiig ne beɗu aɗom amu, nug amuppanu Kayaknu neekkakppa oppiak daakkunu daatte. Nug Kayaknu neekkakppa oppiak daakkunu daatte, haen amuppa amu nug keeke laa Kayaknu tituanak daatte iinab lauɗidkkuoitte. Nug dahil mettid haknu peh lag ooppa ele ii nokkuoitte. Nug keeke aɗit amu ii heeb ukkeb, nug eɗua Kayaknu neekkakppa oppiak daya amu, nug eɗua hekku.

⁵ Am ah laa nug nid ah menutte amu, nug deɗ eblaih aɗit ele, nug kalam oɗe antta, Kayak ele ouqa dayaknu elele iitta daatte, amubia nid awak dimppa nug mettid aɗit Kayak ele ouqa dayaknu elele iitta daakku. Amu dimppa nug deɗ 66 laa ameg mak daakku. Amuam nug nid awom haenppa tiig na beɗu aɗom amu, nug amuppanu Kayaknu neekkakppa oppiak daakkunu daatte.

⁶ Nid danabte, iitta nid ahte menuak, nug amunu Kayaknu neekkakppa oppiak daakkunu haen dob, amu ah nug sipsip gaiɗ maɗ laippu awak ele, manaknu ofa hekkunu awa, amu uppuɗil beɗulag okkai nag, o iitta uppuɗil beɗulag nakok laa, nuhig ib etta hipunin haknu ofa daakkunu ele awa dokkuoitte. Nug nuhig mana mettak amu, mana mettak danab toppan mettid haknu peh lag danab ah appa qagmetteb ele, nug lag amu odppa awa wakkuoitte.

⁷ Amu mana mettak danab nug doɗ amu mana, Yawe metta, nug ahnu eheɗ haknu nob nau doɗ amu tiigppa iitta meeb elele medakkunu hekku. Anam heeb amu, ah amu nug nid menuom haenppa tiig ne, beɗu aɗom amu, nug amuppanu Kayaknu neekkakppa oppiak daakku. Nid danabte, nid ahte menuak dimppa nai imu dim lamitta haknu nai aakku.

⁸ Am ah laa nug sipsip laa awa dokkunu elele iitta dayeb amu, nug uppuɗil beɗulag nakok aɗit, o uppuɗil beɗulag okkai nag aɗit awa dokkuoitte. Laa amu manaknu ofa haknu, laa amu ib etta hipunin haknu ofa daakku. Ib amuppa, mana mettak danab nug doɗ amu mana, Yawe metta, nug heeb, ahnu eheɗ haknu nob nau doɗ amu tiigppa iitta meeb elele medakku, amu ah amu nug Yawenu neekkakppa oppiak daakku,” awa aum.