Josua 6 - Nobonob Baibel

¹ Jerikonu aɗnu od am ɠagattag manattak dayom. Aɗinu? Danab ah ag Israel dilag baɗappig. Laa aab dimittim ii ukkom; laa ooppa ele ii ukkom.

² Amge Yawe Nug Josua amegppa aum. “Antte! Da Jeriko, nuhig king, nuhig ban danab ɠagattag ele oh na eppenppa aakku mettem.

³ Na amu ban danab oh ele, ag oh tappa ukkak laippuppa aab okkai amu deɗ eblaih laippu ele, deɗ anen anenppa talilittak laippu taliliglag.

⁴ Na heppe, mana mettak danab eblaih aɗit ele ag anen anen ag trampet sipsip qeqeɗippa hak mawadna, Tituanak Nainu Kunup noobppa daana, anuqna gokkulag. Aria, deɗ eblaih aɗit amuppa amu, mana mettak danab ag ahilkad trampet amu aɗan iwaladppeppeg, ag, amu ag laa oh ele, ag aab okkai amu laippu tappa ukkak hena talilidppeg, haen eblaih aɗit ele batakku.

⁵ Ag amu henana, haen mana mettak danab ag iwalak eeɗak elab heppeg doon amu, ban daup oh ag huananab eig! Ag anam heppeg, aɗ aab okkai taliliak daatte amu, aɗ amuam loppaɗa, na qekku. Aɗ loppaɗa neeb, ban danab anen anen, ag noolkadppa tutukku aab okkai ooppa nokkulag,” awa aum.

⁶ Yawe Nug anam aum amunu, Nan bekka Josua nug mana mettak danab onilagppa e uɗieg, qagmaatta aum. “Ag Tituanak Nainu Kunup kontrak inak ele maon, mana mettak danab eblaih aɗit ele ag kunup amu nob aon, trampet ele anen anen aɗualadna, anuqppeg gokkulagnu otiadppeg heig!” awa aum.

⁷ Josua nug anam hewowa, nug ban danab ag aɗi hekkulagnu ag amelagppa haknunab inam aum. “Ag ahan ukkeg! Ag aab okkai amu talilidna, laippuppa tappan gokkulag. Ban danab laala ag Yawenu Tituanak Nainu Kunup nob aon anuqna gobeppeg, ⌊laa ag amu dim lamadna gokkulag⌋,” awa aum.

⁸ Josua nug danab amu amelagppa mattia male amu, mana mettak danab eblaih aɗit ele ag ahilkad trampet eblaih aɗit ele aɗualadna, ag digmena, trampet amu iwaladnana, ag Yawe noobppa laippuppa tappan goppig. Ag anam heegeg, mana mettak danab laa ag Yawenu Tituanak Nainu Kunup kontrak inak ele maonna, ag dim lamatteg ele goppig.

⁹ Ban danab laala ag mana mettak danab trampet iwaladppig ele noolag aon anuqna laippuppa tappa ukkak hena ukkaegeg, daup laala ag Tituanak Nainu Kunup kontrak inak ele amu dim lamidna ukkaegeg, mana mettak danab ag trampet iwalattegeg, oh goppig. Mana mettak danab ag haen amu oh trampet amu iwalattegeg gaappig.

¹⁰ Amge ag ii goppig daanna, Josua ag aɗi hekkulagnunab anana aum. “Ag gonana, ag aib eppig. Nai nakok laa ele aib madippig. Ag gobeppeg, deɗ laa da ag ekkulagnu appi, ag muttub qeig!” awa aum.

¹¹ Anam amunu deɗ amu Yawenu Tituanak Nainu Kunup amu, ag maon aab okkai talilittona, ag oh eɗun, haen tutu dayaknu aab kalappigppa tuqan amu appa daappig.

¹² Ag anam heeg ukke, deɗ amu uue, wagɗe buttuanab Josua ahe, amu mana mettak danab ag baula Yawenu Tituanak Nainu Kunup maoppig.

¹³ Mana mettak danab eblaih aɗit ele, ag trampet eblaih aɗit ele aɗaladppig, ag Yawenu Tituanak Nainu Kunup amu noob aon anuqna, ag laippuppa tappa ukkak gonana, ag trampet amu iwaladppig. Daup laa ag mana mettak danab trampet amu iwaladppig ele ag noolag aon anuqna tappa ukkak heegeg, daup laa ag Yawenu Tituanak Nainu Kunup maoppig ele, ag ag dimulagppa tappa ukkak heppig. Haen amu ohppa mana mettak danab ag trampet iwalegeg gaappig.

¹⁴ Deɗ ebqak aɗit amuppa ag laippu tappa ukkak hena, ag aab okkai haen laippuib talilittona, ag eɗun haen tutu dayaknu aab kalappigppa goppig. Ag deɗ eblaih laippu ele oh kobol amu anamib heppig.

¹⁵ Ag anam heeg ukke, deɗ eblaih aɗit ele haɗaedette, Israel ag ahana, aab okkai talilidna laippuppa tappa ukkak deɗ tatam tatam heppig bia heppig. Amge haen imuppa amu, ag haen eblaih aɗit ele talilippig.

¹⁶ Ag anam hena, haen ag aab amu talilitteg, eblaih aɗit bate amu, mana mettak danab ag trampet huana iwalattegeg, Josua nug danab ewak hekkulagnunab ana, nug aum. “Yawe Nug aab okkai ag eppelagppa maattom amunu, ag eig!” awa aum.

¹⁷ ⌊Am tatam nug ag amelagppa inam aum.⌋ “Aab okkai ooppa amu, danab ah, keeke ele oh am Yawenuib nuhig pelemppa daatteb. Ib baag ah Rahap, nug ihinkad lokkumakppa atu italak danab diia atognoatom amunu, nug, nug laugppan laala ele ag aakkuib anam ii daamana.

¹⁸ Ag Yawenuib nuhig pelemppa daamnanu, ag aibnab keeke Yawenuib nuhig pelemppa daatteb, ag amu laa aɗappig! Ag keeke laa Yawenuib nuhig pelemppa daatte aoglag dayeb amu, amuppa ag akka ag hena, ag Israel oh ag Yawenuib nuhig pelemppa daan, ag hena, Israel dilag haen tutu dayaknu aab kalak nauhkkun daakku.

¹⁹ Keeke oh silwappa, golppa, bransppa, o aenppa hattak oh, amuam Yawenu tituanak daatteb, amu ag keeke amu oh akkan, mettid haknu peh lag, amuppan en maknu ooppa mekkulagoitte.” ⌊Josua nug matu danab ah amelagppa anam aum.⌋

²⁰ Amu haen Josua nug danab ag ekkulagnu a, danab ag trampet iwalegeg, danab ah ag baag doona, ag huananab eppig. Ag anam heeg amu, Jeriko aab okkainu aɗ aakku pana ne, Israel dilag daup anen anen, ag noolkadppa tutukku aab okkai ooppa ban hekkulagnu nona, aab aoppig.

²¹ Ag aab okkai aon, ag qep elabppa heeg, aabppan danab ah, keeke oh ele am Yawenuib nuhig pelemppa daappig. Ag danab o ah, bau o kaino oh, makau, sipsip, donki, keeke oh ele anam heppig.

²² Anam daye, Josua nug lokkumakppa atu italak danab aɗit amelahppa aum. “Keeke haknu nai ɠagattag qetta anak amu dabmetteɗ! Goya, ib baag ah laugppa teya, nug baegppan, am nug ele oh diiya, aab dimittim teiɗ!” awa aum.

²³ Aakku lokkumakppa atu italak danab bau amu aa goya, Rahap, nug mameg, anig ele, nug laikkud, amu nuhigppan oh, nug ele daappig amu, aa ag oh diiya uɗipiɗ. Aa nug baegppan oh diiya, Israel dilag haen tutu dayaknu aab kalak amu dimittim, appa matteh daappig.

²⁴ Aa anam heeh, Israel ag aab okkai amu, ooppan keeke oh ele manaeg ewom. Keeke silwappa, golppa, brasppa, o aenppa hattak aakkuib amu, ag keeke amu Yawenu mettid lagnu en maknu oo, amuppa daaglagnu maadppig.

²⁵ Amu Rahap nug lokkumakppa atu italak danab, Josua maate Jeriko gopiɗ ele, nug aa diiata lokkumatom amunu, Josua nug ib baag ah Rahap, am nuhigppan ele, ag nug laugppa oh daappig ele, nug ag diia atognoattom. Josua anam he, Rahap nug haen amuppa Israel oolagppa digma daye uɗie uɗie, gemu ⌊nai imu yaak haenppa⌋ ele, nug Israel oolagppa daatte.

²⁶ Haen amuppa Josua nug nau aomnanu dabmettak nai aum: “Aun laa nug Jeriko aab okkai eɗua buukkun hekku amu, nug Yawe noobppa eheɗ laa awaknu anak waappa daakku. Aun laa nug anam hekku dayeb amu, nug digma buuebeb, nug nid danab tatamnu am mauhkku, amu nug bekka dimnunab am aab okkai eɗua buua malakkun haaha mauhkku,” awa aum.

²⁷ Amunu Yawe Nug Josua ele dayeye, Josua nug danab onig, binag okkai ele, doyak amu Kanan wan ohppa ukkom.