Josua 5 - Nobonob Baibel

¹ Amo dilag king oh ag Jodan lenu qaban uɗitteppanu daappig, amu Kanan danab ah dilag king Mediterenia yu daugppanu ele, haen ag Yawe Nug he, Jodan le qaɗaiette, Israel danab ah ag mataɗeg dooppig amu, ag baɗak okkai doon, ag Israel danab ele ban hekkulagnu oo ɠagattag qak ii dooppig.

Israel danab ah ag Kayak oɗe gaɗa otaɗaknu, Pasowanu Hobul ele haknu Nug oɗe dim lamidppig

² Israel danab ah ag Jodan le mataɗeg dimppa, haen amuppa Yawe Nug Josua amegppa aum, “Na menppa qep hattona, na heppe, Israel danab ag tatam gaɗalkad ii otaɗppig amu, ag gaɗa otaɗak aweg!” awa aum.

³ Yawe Nug anam Josua amegppa aum amunu, Josua nug qep menppa hatta, Israel danab laa ag tatam gaɗalkad ii otaɗppig amu, ag gaɗa otaɗak aoppig. Nug Gibert Haralot, appa anam heum.

^4-7 Josua nug amu heumnu diig am inam: Israel danab oh ag ban hekkulagnu maɗ elele daan, Isip uun uɗippig ele, ag atu taɗakppa uɗinna, ag mauhadna malappig. Danab amu, ag Isip uun uɗippig amu, ag oh gaɗa otaɗak matu aon malappig, amge ag atu taɗakppa oinna, ahilkad nid danab doppig amu, ag ag gaɗalkad ii otaɗadppig. Danab ag ban hekkulagnu maɗ elele daan, Isip uun uɗippig amu, ag Yawe oɗe ii dim lamidppig amunu, Nug ag wan laa, wan amuam wan enanag, wan ittag ele, amuppa ee meu huana otte amu, Nug ag wan amu ii anidmananu Nug onigppa nuhig nai ɠagattag qetta aum amunu, danab ag Israel atu taɗakppa maɗ 40 oinna, danab amu ag mauhegeg ukke ukke, ag oh mauhadna malaeg, ag bekkalkad aakku daappig. Wan ag mauhna, ii anidppig am Kanan wan. Yawe Nug danab ag Nug oɗe ii dim lamidppig mamelkad aɗi amelagppa wan amu ig megakkunu nuhig nai ɠagattag qetta aum. Danab amu ag Yawe oɗe ii dim lamitteg, Yawe Nug ag wan amu ii anidmananu a, ag atu taɗakppa oinna, ag, ag bekkalkad gaɗalkad ii otaɗadppig ele, bekkalkad ag aakku anam daaeg, Josua nug ag gaɗa otaɗak awaknu aakku heum. Aɗinu? Ag matu gaɗa otaɗak ii aoppig; ag mamelkad atu taɗakppa oinna, ag gaɗalkad ii otaɗadppig.

⁸ Amu haen danab amu ag gaɗalkad tuqak daye amu, danab oh haen tutu dayaknu aab kalak amuppaib daaegeg, beɗulkad pahaettom.

⁹ Haen ag beɗulkad pahaette amu, Yawe Nug Josua amegppa aum. “Gemu da hei, Isip danab ah dilag uug ag qaɗelagppa dayom amu, uug amuam iitta meum,” awa aum. Nug anam aum amunu, aben am onig Gilgal ataɗppig. Ag anam ataɗeg, onig amu gemu ⌊nai imu yaak haenppa⌋ ele daatte.

¹⁰ Israel ag Gilgal appa Jerikonu uɗem okkaippa haen tutu dayaknu aab kalan daappigppa daanna, kalam amuppa, deɗ 14ppa amu, deɗ amu tueb ag Pasowanu Hobul gamag ahak ele heppig.

¹¹ Deɗ Pasowanu Hobul hekkulagnu daye heppig, deɗ amu dimugppa, deɗ amuppanab, ag wan amuppanu ee laa lappig; amuam bret yis iitta, ee aeg manik ele lappig.

¹² Ag wanppanu ee aon lappig amu, deɗ amuppa maana iitta meum. Haen amu ukkak amu, maana baula Israel danab ah dilagppa iitta dayom. Ag aɗi Kanan wanppa beum amu, ag amu aon lappig.

Josua nug danab qep elab ele anttom

¹³ Deɗ laa Josua nug ukka, Jeriko gukkuittak daya, nug ameg huma, danab laa nug Josua noobppa hibaitta dayeye anttom. Danab amu nug qep elab laa eppegppa aɗa dayom amunu, Josua nug gumitta ta, oɗ metta aum. “Na ihinig ban danab laa daattemte, iitta na kekeɗ ihinignu ban danab laate?” awa oɗ mettom.

¹⁴ Josua nug anam oɗ mette amu, danab amu nug nob ma aum. “Da ahilagnu laa iitta; da kekeɗ dilagnu laa ele iitta. Aɗinu? Da Yawenu ban daup ikki daattem,” awa aum. Nug anam a amu, Josua laippun gateg qaun o, gomela, iɗu wanppa ma, nug aum. “Da amu nahip maɗi nid laa. O naɗi, na da aɗi nahip hekkulnu oot daatte?” awa aum.

¹⁵ Josua nug Yawenu ban daup ikki amu anam oɗ mette, ban daup ikki nug nob ma aum. “Aben na hippaidme daattem ele, amuam Kayaknu tituanak daatte amunu, na baen gaɗa uɗe!” awa aum. Nug anam a amu, Josua nug anam aakku heum.