Josua 3 - Nobonob Baibel

Israel danab ah Jodan le mataɗppig

¹ Lokkumakppa atu italak danab aɗit aa eɗuya uɗiya, Josua gumidya uɗieh, deɗ amu uue, wagɗe buttua Josua ahe, nug Israel danab ah oh ele ag ahan, Sitim uun, Jodan leppa goppig. Ag gona, nakok dimppa ag Jodan le mataɗkkulagnu amu, ag aguppa haen tutu dayaknu aab kalan daappig.

^2-3 Ag anam daaegeg, deɗ aɗit uue, deɗ ewamppa amu, ikki danab ag gona, haen tutu dayaknu aab kalakppa oinna, ag danab ah amelagppa haknunab appig. “Haen ag Israel, ag mana mettak danab, ag Lewi buɗub amu, ag Yawe, ahilag Kayak, ag nuhig Tituanak Nainu Kunup kontrak inak ele, ag, ag kunup amu maoppeg anadna, ag daattebppanu ahan, dim lamatteg!

⁴ Ag anukka ib imuppa ii uɗippig amunu, danab amu ag ukkaknu ib ippunadkkulag. Amge ag aib Tituanak Nainu Kunup gukkuittak wappig. Lewi buɗub ag Tituanak Nainu Kunup maon, anuqna gona, 900 mita keeke gobeppeg, ag ahan, dim lamadna ukkeg! Ag gukkuittak aib goppig!” aon appig.

⁵ Ikki danab ag danab ah anam amelagppa ana malaeg amu, Josua nug danab ah amelagppa aum. “Yawe Nug butti uɗat ɠagattagnab ele ag oolagppa hekku amunu, ag Yawenu tituana mettak daaglagnu hena dayeg!” awa aum.

⁶ Josua nug danab ah amelagppa anam a, deɗ amu uue, wagɗe, deɗ amuppa nug mana mettak danab dilag aum. “Ag Tituanak Nainu Kunup kontrak inak ele, ag amu aon, maon anuqna gobeppeg, danab ah dim lamadna ukkeg!” Nug anam a amu, ag anam heppig.

⁷ Amu Yawe Nug Josua amegppa aum. “Da gemu aɗi hekkul amu, Israel danab ah ag amu anidna, ag da Moses ele daamuɗ bia, da gemu na ele daattep doon oolag maidkkunu amu, da amu heppi ba heeb, ag na danab binan okkai ele digmen anidkkulag.

⁸ Amu na mana mettak danab aun aɗi ag Tituanak Nainu Kunup kontrak inak ele, ag kunup amu maotteb amu, na ag amelagppa inam appe doyeg! ‘Haen ag Jodan le giginppa gona amu, ag laa ele wana, le ooppa hibaitteg!’ ” Yawe Nug Josua amegppa anam aum.

⁹ Yawe Nug Josua amegppa anam a, Josua nug Israel danab ah amelagppa aum. “Ag inam dona, ag Yawe, ahilag Kayak, ag nuhig nai doyeg!

¹⁰ Kanan danab, Hit danab, Hiwi danab, Peres danab, Girgas danab, Amo danab, Jebus danab ele ag wan Jodan le imu heqo laihppa daatteb. Ag amuppa daan, wan amu gumatteb, amge Kayak bau daatte, Nug ag Israel oolagppa daatte, Nug heeb, ag Israel, ag danab amu lamadkkulag. Nug ag amu miagib ippuanatteb anidkkulagnu amu,

^11-13 ag neegna antteg! Mana mettak danab ag Naɗi, wan atu oh gumadtte, ag nuhig Tituanak Nainu Kunup kontrak inak ele, ag amu maon anuqppeg, Jodan nokkulag. Haen mana mettak danab ag Yawe, Nug am Naɗi wan atu oh gumadtte, ag nuhig Tituanak Nainu Kunup maotteb ele, haen ag baelag Jodan le ooppa tabakku amu, Yawe Nug heeb, le noa gotte ele amu ii noma. Le ii goma, amge le nug titiɗa, qauko bia bekku. Anam bekku amunu, ag gemu amu, ag Israel dilagppanu danab 12, laib laib Israel dilag huu okkai anen anen dilagppanu tituanadppeg, ⌊ag am bapaidna, Yawe Nug ag aɗi hekkulagnu ab, ag hekkulag⌋,” awa aum.

^14-16 Haen Israel ag goppig amu, amuam ee meu awak haen dayom. Maɗ ohppa amu, haen amuppa le ui otte amunu, le ui oum. Haen danab ah aben uun, Jodan mataɗkkulagnu heeg, aria mana mettak danab ag Tituanak Nainu Kunup kontrak inak ele, ag amu maona anuqppig. Anuqna gona, haen mana mettak danab ag leppa tappaeg amu, Yawe Nug he, le ag daappigppanu attan, appa amu, le amu nakok laa doa, noa gokkunu ii ha dayaya, uma tak aab onig Adam guguittak, appa le amu qagmaama, titiɗa qauko bia dayom. Adam am aab laa onig Saretan daugppa daatte. Jodan le baeg amu, nug noa ukka, Mauhak Leppa notte, amu oh otaɗa awom amunu, danab ah ag mataɗna, Jeriko gukkuidna wappig.

¹⁷ Israel danab ah ag le letan, laih wan qaɗaiettakppa ukkaegeg, mana mettak danab ag Yawenu Tituanak Nainu Kunup kontrak inak ele, ag kunup amu maoppig amu, ag Jodan le dayomppa gamagppa wan qaɗaiettakppa hippaidna daaegeg, danab ah oh mataɗna, laih wappig.