Josua 22 - Nobonob Baibel

Israel dilag huu okkai Jodan heqo laihnu eɗun goppig

¹ Aria, Josua nug Israel dilag huu okkai Ruben, Gad, amu Israel dilag huu okkai Manase mahaib ele ag uɗippeg qagmekkulagnu onilagppa eum.

² Nug e uɗieg, nug ag amelagppa aum. “Ag Yawenu maɗi nid Moses nug ag anamnab hekkulagnunab aum amu, ag aakku amu hena, da ami bia ele, ag da oɗel tutukku dim lamidna heppig.

³ Ban imu haen matu iitta ii meum, amge ag huu laala ag ahilkad kekeɗ ele ban heegeg amu, ag ii uuadna goppig. Ag Yawe, ahilag Kayak, nuhig ɗo tutukku dim lamitteg uɗie, haen gemu ele anamib daatteb.

⁴ Amu Yawe, ahilag Kayak, Nug he, gemu Israel dilag huu okkai laa imu oh ag kekeɗ dilag ii baɗan, ag maɗoɗ, enaib daatteb. Nug ahilagnu aɗi hekkunu nai qakka aum amu he, ag ahilag wan aon daatteb amunu, ag ahilag wan, wan amuam Jodannu le kaɗag uɗitteppanu daatte amu, ag ahan, ahilag wan amuppa gona daaglag. Yawenu maɗi nid Moses, nug ag wan amu mattom.

⁵ Ag gona, appa daaglag, amge ag dabmettan autnanab aonna, ag Yawenu maɗi nid Moses, nug haknunab anak, ɗo ele ag mattom amu, ag amu tutukku dim lamitteg! Amuam ag Yawe, ahilag Kayak, ag nuhignu oolag mauheb, ag nuhig kobol oh dim lamidna oinna, nuhig haknunab anak oh ele dim lamidnan, ag Nugib waappa daaglagnu Nug ouqak ele daan, amu ag meulag ohppa, oolag ohppa ele Nug waappa daan, Nug oɗe dim lamitteg!” awa aum.

⁶ Josua nug nai amu mattia malowa, nug Israel dilag huu okkai Ruben, Gad, amu Israel dilag huu okkai Manase mahaib ele itattowa, nug maatte, ag appalagppa goppig.

⁷ Amu Moses nug matu Basan wan, wan amuam laih Jodannu kaɗag uɗitteppanu daatte amu, nug wan amu Israel dilag huu okkai Manase mahaib ag mattom. Amu Josua nug Israel dilag huu okkai Manase mahaib laa, am wan laa laih Jodannu qaban uɗitteppanu, ag lailkad oolagppa ag mattom. Aria gemu amu, Josua nug Ruben, Gad, amu Israel dilag huu okkai Manase mahaib ele, nug danab amu oh maatteb gokkulagnu heum amunu, ag anam gokkulagnu daaegeg, nug ag itattowa,

⁸ nug imu ele aum. “Ag ahilkad kekeɗ eppelagppan enulag ippanu huanaknab aoppig; amuam makau, sipsip keeke huanak, silwa, gol, brans, aen, lamen ele amu, amu ag keeke amu oh aon, ag appalagppa gona, ag amu oh otin, laih ag lailkad laa ele matteg!” awa aum.

⁹ Josua ag gokkulagnu aum, amunnu Ruben danab, Gad danab, amu Israel dilag huu okkai Manase mahaib danab ele, ag aakku Israel dilag huu okkai laala, Kanan wanppa Silo appa uuadna, ahan goppig. Ag ahan, ahilag wanppanab, wan onig Gileat, appa gokkulagnu goppig. Moses nug Yawe, nug anam hekkununab aum amu, nug anam aakku ha mattom.

Israel dilag huu okkai laa, ag Jodan heqo laih kaɗag uɗitteppanu daatteb, ag dabmettaknu at laa bappaidppig

¹⁰ Ag ahan, ahilag wanppa gokkulagnu goppig, amge ag gona, appalagppa ii teppig, haen ag Kanan wanppa daanna, Jodan le ii mataɗppig daanna amu, Ruben danab, Gad danab amu Israel dilag huu okkai Manase mahaib danab ag Jodan le guguittak, ag appa qaɗab naɗinab laa heppig. Ag aben onig Gelilot, appa heppig.

¹¹ Ag qaɗab naɗi amu qeeg, haen Israel danab ah laa oh ag danab amu ag Kanan wanppa, Gelilot appa, Jodan lenu laih qaban uɗitteppanu, Jodan le guguittak qaɗab naɗi qeppig doona,

¹² Israel danab laa amu oh ag Silo appa qagmena, ag Israel danab ah Jodan le laih daappig, ag appa banelag gokkulagnu bappaidppig.

^13-14 Ag anam heppig, amge ag ii goppig daanna, ag Eleasar bekka Pinias, nug mana mettak danab amu, ag nug, aria Israel dilag ikki danab ebqak eblaih laih ele, ag nug ele Gileat wanppa gona, ag Ruben danab, Gad danab, amu Israel dilag huu okkai Manase mahaib danab ele, ag ag ele nai mattiglagnu maatte goppig. Danab okkai eblaih laih ele amu, ag am Israel dilag huu okkai eblaih laih ele anen anen dilag ikki danab. Ag Israel ooppan baelkadppan anen anen dilag ikki danab aakku.

¹⁵ Ag gona, Gileat wanppa tena amu, ag Israel dilag huu okkai Ruben, Gad, amu Israel dilag huu okkai Manase mahaib ele, ag amu amelagppa appig.

¹⁶ “Yawenu danab ah oh, ag ag Ruben, Gad, am Manase mahaib danab ah dilagnu, ag heppignu diig dooglagnu oolag daatte. Ag aɗi diignu ag Israel dilag Kayak ippunattomnu oo metta ii uuak kobol ii dim lamidna, Nug oɗe tappaeg neum? Ag attem hena, Yawe dimettan, nuhig nai tappaeg ne, qaɗab laa, Nug ii aum bia heppig?

¹⁷ Ig hipunin, Peor appa hemut amu, ig amuppa bu awak elele iite aomut? Ig hipunin amu heut, Yawe Nug he, oɗe nau danab kuɗum aqe mauhtteb ele amu ig, Yawenu danab ah, ihinigppa beum, amge ig oonigppa laala ag hipunin amuppa eɗun nena qekkulagnu daatteb.

¹⁸ Anam aakku, amu gemu ag baula eɗun, Yawe dim lamidmananu hetteb. Ag gemu Yawenu nai tabappeg nekku dayeb amu, geha butti amu, Nug ig Israel, Nug ihinig ohnu oo nauhkku.

¹⁹ Anam amu, wan ag aoppig ele, wan amuam Kayaknu neekkakppa dubuttid tak ele daatte dayeb, ag uɗippeg, ig ele le imu heqo laih, Yawenu wanppa, appa daatu! Yawenu mettid haknu peh lag amu ihinigppa appa ana daatte. Doppeg ig ihinig wan otit, ag laa mattagnig, amge ag qaɗab ahilagnu laa imu henana, Yawenu nai tabappeg neeb, Nug ele kekeɗ daan, ig ele kekeɗ daat, laippu ii daagnignu aib heppig. Yawe, ihinig Kayak, nukka nuhig qaɗab genab laippu aakkuib daatte.

²⁰ Am haen Sera bekka Aakan, nug keeke Yawenuib nuhig pelemppa dayom amu, nug amunu Yawe ippunittomnu oo metta ii uuak kobol ii dim lamitte, Yawe Nug Israel danab ah ig oh bu iite mekkom? Nug nukka aakkuib hipunin amunu ii mauhom,” aon appig.

²¹ Pinias laikkud ele ag anam Israel dilag huu okkai Ruben, Gad amu Israel dilag huu okkai Manase mahaib ele amelagppa anam aeg, ag oɗelagppa aon inam appig.

^22-23 “Yawe Nug nukka aakkuib am Kayak! Yawe Nug nukka aakkuib am Kayak! Ig Yawe waappa daagnignu uut, nuhig nai tabapput nekkunu qaɗab imu ii hemut. Ag ig genab Yawe waappa daat, nuhig nai tabapput nekkunu hemut anigtteb dayeb amu, ag gemu ig iqappeg mauhtu! Amge anam iitta. Yawe Nug ig Nug dimettata, kayak laa dim lamidkkunignu ikka ihinignu qaɗab imu ii hemut dootte. Nug dootte amu, ig ag Israel laa oh ele amu dooglagnu oonig daatte. Ig qaɗab amu hemut, amge ig manaknu ofa, o ee aegnu ofa, o laippu dayaknu ofa amuppa ii hemata. Yawe Nug neekka, ig kobol laa amu hekkunignu hemut anigkku dayeb amu, Nug ig bu megakkunu oonig daatte, amge anam iitta.

²⁴ Ig qaɗab imu qemutnu diig am, butti aɗi ag alalkad ag ig alankad dilag inam amananu baɗat hemut. ‘Ag Yawe, Israel dilag Kayak, ag aɗinu Nug noobppa dup nona binag metteb? Nug am ahilag Kayak iitta.

²⁵ Yawe Nug ig danab, amu ahilag danab ele dilag tom am Jodan le meum daatte. Ag Ruben buɗub, Gad buɗub, ⌊amu Manase mahaib buɗub ele,⌋ ag am Yawenu danab iitta.’ Ag anamtai akkulag. Ag alalkad ag anam akkulag dayeb, amuppa ag heppeg, ig alankad ag Yawe noobppa ii dup nona binag memana.

²⁶ Ig anam dabmemut amunu, ig ikka, ihinignu ig amut. ‘Ig aakku ahata, qaɗab qekkunig, amge ig qaɗab amuppa manaknu ofa hekkunignu, o mana mettak laala hekkunignu ii hemata.’

²⁷ Iitta! Qaɗab amuam dabmettaknu at laa. Amu geha ag buɗulkad, ig buɗunkad ele ag qaɗab amu anidna, ag oh ig Yawe noobppa dup noa binag mak kobol nuhignu hetata, ig manaknu ofa, amu mana mettak laala, amu laippu dayaknu ofa nuhignu ele nuhig mettid haknu peh lakka hekkunignu elele daattem dabmekkulag. Anam dayeb, ag buɗulkad ag ig buɗunkad dilagnu inam ii amana, ‘Yawe Nug ahilag Kayak iitta.’

²⁸ Ag anam ii amana, amge ag anam ig amenigppa, o ig buɗunkad amelagppa akkulag dayeb amu, ig ag nob mattat, inam akkunig. ‘Antteg! Qaɗab imu, ig mamenkad aɗi heppig amu, am ihinig Yawenu qaɗab bia, amge qaɗab imuam manaknu ofanu, o mana mettak laalanu iitta. Iitta! Qaɗab imuam ag ig ele, ig oh am Yawenu danab ah daattem epponigkkunu at daatte.’

²⁹ Ig ikka ig manaknu ofanu, o ee aegnu ofa, o mana mettak laala haknu ig ihinig qaɗab laa buuta, Yawe uut, Nug oɗe tabapput nekkunu, o Nug dimettagnignu amu, ig uuaknab doottem. Qaɗab laippuib, Yawe, ihinig Kayak, Nug noobppa mettid haknu peh lag odppa daatte amu, qaɗab amuppaib amu haknu aakkuib daatte,” aon appig.

³⁰ Ag anam aeg amu, haen mana mettak danab Pinias, amu Israel dilag ikki danab ele ag Ruben, Gad amu Manase huu mahaib elenu danab dilag nai doona amu, ag oolagppa ena dooppig.

³¹ Ag oolagppa ena, elele doona, mana mettak danab Pinias, Eleasar bekka, nug nai nob ma, Ruben, Gad amu Israel dilag huu okkai Manase mahaib dilag danab amelagppa aum. “Ag Yawe ippunikkomnu oo metta ii uuak kobol dim lamidkkulagnu ii uun, kobol nau ii heppig amunu, gemu ig doottem, Yawe Nug ig oh oonigppa aakku daatte. Amu gemu ag heeg, Yawe Nug ig Israel bu ii iqama,” awa aum.

³² Aria, mana mettak danab Pinias, Eleasar bekka, nug danab okkai eblaih laih ele ag Gileat wanppa appa Ruben, Gad, ⌊amu Manasenu huu mahaib⌋ danab ele uuadna, eɗun Kanan wanppa Israel danab ah laa oh amelagppa aɗi aɗi madippig amu appeg dooglagnu gona, amelagppa appig.

³³ Ag eɗun gona, aɗi nai, Ruben, Gad amu Manase huu mahaib ele madippig amu, ag Israel oh amelagppa mattieg, ag oh nai amunu oolag ena dayom. Ag amunu oolag ena daye, ag Kayak binag menana, ag Ruben, Gad, ⌊Manase huu mahaib⌋ ele, ag ahilag wan heppeg nauhkkunu ban hekkulagnu nai ii madippig.

³⁴ Ruben danab, Gad danab, ⌊Manase huu mahaib danab⌋ ele ag qaɗab onig ataɗna, “Dabmettaknu At,” appig. Am ag appig. “Qaɗab imuam dabmettaknu at ig gamanigppa daatte. At imuam Yawe, Nug ihinig Kayak, ahilag ele ippunigtte,” appig amunu, diig amunu ag onig amu ataɗppig.