Josua 19 - Nobonob Baibel

Josua aɗi ag Israel dilag huu okkai Simeon wan madappig

¹ Josua nug om ena yaak ebqak aɗit ha antta, om ena yaak ippunittom bia nug wan maha ebqak aɗit Israel dilag huu okkai Simeon baekkudppa, ag aulag daakkunu mattom. Wan amu Juda dilag wan atuppa aakkuib dayom.

² Aab Josua, nuhig ehanittak ele ag Israel dilag huu okkai Simeon madappig am, Berseba, onig laa Seba, aria Molada,

³ Hasarsual, Bala, Esem,

⁴ Eltolat, Betul, Horma,

⁵ Siklak, Bet Markabot, Hasarsusa,

⁶ Bet Lebaot, Saruhen ele. Aab amu oh ebqak amu 13. Aab naunau laala aab amu taliliattak daappig amu, ag aab amu ele ag madappig.

⁷ Josua, nuhig ehanittak ele ag Israel dilag huu okkai Simeon aab laala ele madappig. Aab amuam, Ain, Rimon, Eter, Asan ele. Aab amu oh ebqak am waɗele. Aab naunau laala aab amu taliliattak daappig amu, ag aab amu ele ag madappig

⁸ Aab naunau amu, ag daaeg ukke, yau uɗitteppanu ukka, Balatber appa batom. Balatber onig laa am Negebnu Rama dayom. Josua, nuhig ehanittak ele ag wan, aab, aab naunau ele amu, Israel dilag huu okkai Simeon baekkudppa madappig. Aab amu, wan amu ele, am ag aulag daakkunu ag madappig.

⁹ Juda dilag wan am okkainab, ag wan amu oh uɗat mettaglagnu elele iitta amunu, ag laih oppatna, Simeon buɗub madappig. Juda danab, ag ahilag wan okkainab amunu, Israel dilag huu okkai Simeon, ag wan amu ooppanu maha laa, ag aulag daakkunu aoppig.

Josua aɗi ag Israel dilag huu okkai Seblon wan madappig

¹⁰ Josua nug om ena yaak ebqak ewam ha antta, om ena yaak ippunittom bia nug wan maha ebqak ewam Israel dilag huu okkai Seblon baekkudppa, ag aulag daakkunu mattom. Sarit am Israel dilag huu okkai Seblonnu laih yau uɗitteppanu tomppa dayom.

¹¹ Sarid appanu amu, tom ukka, qaban uɗitteppanu ukka, Mareal wanppa ukka, Dabeset aab beeppa waum. Appanu amu tom ukka, atu oolnu noak nakok Jokneam guguittak waum.

¹² Israel dilag huu okkai Seblonnu tom am Saritnu kaɗag uɗitteppanu ele ukkom. Am tom nug Saritnu ukka ukka, Kislot Tabor tomppa wana ukka, Daberat wana ukkom. Kaɗag uɗitteppanu, Israel dilag huu okkai Seblonnu tom am Deberat appa digma ukka, Japia waum.

¹³ Appanu amu ukka, Gatheper wana ukka, Etkasin wana, amu Rimon wana, eɗua awa, wana Nea ukkaknu ukkom.

¹⁴ Israel dilag huu okkai Seblonnu tom Yawalti uɗitteppanu amu, tom amuam appanu digma ukka, Hanaton wana ukka, oolnu noak onig Iptahelnu Oolnu Noak, appa batom.

¹⁵ Amu wan amuppa aab onilkad Katat, Nahalal, Simron, Idala, Betlehem ele daappig. Wan amuppa, aab oh daappig amu, ahilag ebqak am 12. Aab naunau laala aab amu taliliattak daappig amu, ag aab amu ele ag madappig.

¹⁶ ⌊Wan,⌋ aab, aab naunau amu ele amu, Josua, nuhig ehanittak ele ag Israel dilag huu okkai Seblon baekkudppa, ag aulag daakkunu madappig.

Josua, nuhig ehanittak ele ag Israel dilag huu okkai Isakar wan madappig

¹⁷ Josua nug om ena yaak ebqak waɗele ha antta, om ena yaak ippunittom bia nug wan maha, ebqak waɗele Israel dilag huu okkai Isakar baekkudppa mattom.

¹⁸ Aab imu ag wan amuppa daappig; Jesril, Kesulot, Sunem,

¹⁹ Haparaim, Sion, Anaharat,

²⁰ Rabit, Kison, Ebes,

²¹ Remet, Enganim, Enhada, Betpases ele.

²² Isakarnu huu wan madappig ele tom am Tabor, Sahasuma, Betsemes ele guguittaknab ukka, nakokib awom. Tom amu aakku ukka, Jodan leppa batom. Aab wan amuppa daappig, amu oh ebqak am 16. Aab naunau laala aab amu taliliattak daappig amu, ag aab amu ele ag madappig.

²³ ⌊Wan,⌋ aab, aab naunau amu ele amu, Josua, nuhig ehanittak ele ag Israel dilag huu okkai Isakar baekkudppa, ag aulag daakkunu madappig.

Josua, nuhig ehanittak ele ag Israel dilag huu okkai Aser wan madappig

²⁴ Josua nug om ena yaak ebqak tanig ele ha antta, om ena yaak ippunittom bia nug wan maha, ebqak tanig ele Israel dilag huu okkai Aser baekkudppa mattom.

²⁵ Aab imu ag wan tom amu ooppa daappig; Helkat, Hali, Beten, Aksap,

²⁶ Alamelek, Amat, Misal ele. Amu Israel dilag huu okkai Asanu tom am, Mediterenia yuppa digma, Sihorlipnat le matta ukka, Karmel qauko diigppa teum.

²⁷ Appanu amu, tom am eɗua awa, kaɗag uɗitteppanu ukka, Betdagon waum. Amu oolnu noak onig Iptahelnu Oolnu Noak am Aser, Seblon ele dilah tom gamagppa dayom. Aser dilag tom kaɗag uɗitteppanu am laih yawalti uɗitteppanu ukka, Betemek ta ugakka, Kabul ukka, appanu Neiel

²⁸ ukka, Abdon wana, Rehop wana, Hamon wana, Kana wana, ukka ukka, Saidon aab anuqakppa waum.

^29-30 Appanu tom nug eɗua awa, Rama ukka, aab okkai ɠagattag aɗ ele onig Tair, appa waum. Appanu amu, tom am eɗua awa, Hosa ukka, Mediterenia yuppa batom. Aksip, Uma, Apek, Rehop ele amu, aab amu oh ag wan atu amu guguittak daappig. Aab wan amuppa daappig, amu oh ebqak am 22. Aab naunau laala aab amu taliliattak daappig amu, ag aab amu ele ag madappig.

³¹ Wan amu Josua, nuhig ehanittak ele ag Israel dilag huu okkai Aser baekkudppa, ag aulag daakkunu madappig; wan amu, appanu aab amu ahilkad aab naunau ele.

Josua, nuhig ehanittak ele ag Israel dilag huu okkai Naptali wan madappig

³² Josua nug om ena yaak ebqak eblaih laippu ele ha antta, om ena yaak ippunittom bia nug wan maha ebqak eblaih laippu ele Israel dilag huu okkai Naptali baekkudppa mattom.

³³ Naptalinu wan tom laa am aab Sananim, Helep guguittak daatte amu, am appa, ad okkai daatteppan ukka, Adami Nekep guguittak ukka, Japnel ele guguitta ukka, Lakum wana ukka, Jodan Leppa batom.

³⁴ Appanu tom am laih qaban uɗitteppanu ukka, Asnot Tabor wana ukka, Hukok waum. Amu Israel dilag huu okkai Naptalinu tom yau uɗitteppanu am Seblonnu tom nakok aɗa, amu laih qaban uɗitteppanu tom, amu Asernu tom ele nakok aɗom. Kaɗag uɗitteppanu tom am ukka, Jodan Le ele nakok aɗom.

³⁵ Aab okkai ɠagattag aɗ ele Naptali wanppa daappig amu Sidim, Ser, Hamat, Rakat, Kineret,

³⁶ Adama, Rama, Hasor,

³⁷ Kedes, Edrei, Enhasor,

³⁸ Iron, Mikdalel, Horem, Betanat, Betsemes ele. Josua, nuhig ehanittak ele ag Israel dilag huu okkai Naptali wan madappig. Aab wan amuppa daappig, amu oh ebqak am 19. Aab naunau laala aab amu taliliattak daappig amu, ag aab amu ele ag madappig.

³⁹ ⌊Wan,⌋ aab, amu aab naunau amu, Josua aɗi ag Israel dilag huu okkai Naptali baekkudppa, ag aulag daakkunu madappig.

Josua, nuhig ehanittak ele ag Israel dilag huu okkai Dan wan madappig

⁴⁰ Josua nug om ena yaak ebqak eblaih aɗit ele ha antta, om ena yaak ippunittom bia nug wan maha, ebqak eblaih aɗit ele Israel dilag huu okkai Dan baekkudppa, ag aulag daakkunu mattom.

⁴¹ Aab laala Josua aɗi ag wan Israel dilag huu okkai Dan, ag aulag daakkunu madappig amu, ag amuppa daappig. Aab amu laa onilkad am Sora, Estaol, Irsemes,

⁴² Salabin, Aiyalon, Itla,

⁴³ Elon, Timna, Ekron,

⁴⁴ Elteke, Gibeton, Balat,

⁴⁵ Jehud, Beneberak, Gatrimon,

⁴⁶ Mejarkon, Rakon ele. Wan ag Israel dilag huu okkai Dan madappig ele amu, wan maha laa Jopa guguittak dayom, ag amu ele ag madappig.

⁴⁷ Ag wan amu oh Israel dilag huu okkai Dan madappig, amge Dan danab ag Kanan eɗattaknu nakok uug ele amunu, ag ukkaeg, Lesem aab amu ele ban heppig. Ag eɗadna aona, danab appanu aqaeg iitta meeg, appa aben aoppig. Ag aab amu, ag alalag onig Dan ataɗppig.

⁴⁸ ⌊Wan,⌋ aab, aab naunau amu Josua, nuhig ehanittak ele ag Israel dilag huu okkai Dan baekkudppa, ag aulag daakkunu madappig.

Israel danab ag Josua wan medappig

^49-50 Josua, nuhig ehanittak ele ag wan oh panin, Israel dilag huu okkai anen anen mattaeg amu, Israel ag wan gamag laa, nug aug daakkunu Nan bekka Josua, Yawe Nug haknunab aumbia medappig. Amu Josua nug Epraim wanppa, qauko qauko daattebppa, aab onig Timnat Sera, nug amu tituane, ag aab amu nug medappig. Mettaeg amu, nug appa aab kala dayom.

⁵¹ Amu Yawe noobppa, wan maha anen anen amu, mana mettak danab Eleasar, Nan bekka Josua, amu Israel dilag huu okkai anen anen ikki danab ele, ag om ena yaak hena, Israel huu oh wan ag aulag daakkunu madappig. Ag mettid haknu peh lag danab ah appa qagmetteb ele, ag lag amu odppa, Silo appa om ena yaak heppig. Amunu ag wan amu aakku oppatna, paniadna malappig.