Josua 16 - Nobonob Baibel

Josua aɗi ag Israel dilag huu okkai Epraim, amu Israel dilag huu okkai Manase mahaib wan madappig

¹ Israel dilag huu okkai Epraim, amu Israel dilag huu okkai Manase mahaib, ag oh am Josep buɗuppud. Amu Josua, nuhig ehanittak ele ag om ena yaakppa Israel dilag huu okkai Epraim, amu Israel dilag huu okkai Manase mahaib, ag Jodan leppanu qaqan uɗitteppanu wan aoppig amu, ag wan imu ag madappig. Wan ahilagnu tom ena yau uɗitteppanu am Jodan leppa Jeriko guguittak digma ukkak daatte. Appanu amu tom amuam ukka, Jerikonu kaɗag uɗitteppanu le qeppuɗia betteppa wana ukka, atu taɗak obata wana ukka, wan Betel guguittak, qauko qauko daattebppa, am appa waum.

² Betel, onig laa Lus, appanu tom amu ukka, Atarot waum. Atarot am Ark danab dilag wannu tomppa dayom.

³ Appanu amu tom amuam qaban uɗitteppanu ukka, Japlet buɗub dilag wanppa ta, wan atu Bethoron honap daatteppa, appa batom. Appanu amu tom ukka, Geser wana ukka, Mediterenia yuppa noum.

⁴ Josep bekoɗ Manase, Epraim ele aa alalti ag wan aakku ag aulag daakkunu aoppig.

Josua aɗi ag Epraim wan madappig

⁵ Josua, nuhig ehanittak ele ag wan imu Israel dilag huu okkai Epraim baegppan, ag aulag daakkunu madappig. Ahilag tom yau uɗitteppanu am Atarot Adar, appa digma ukkak. Atarot Adar am wan amu ooppa, laih kaɗag uɗitteppanu dayom. Appanu amu tom nug ukka Bethoron Attan appa teum.

⁶ Appanu amu Mediterenia yuppa noum. Yawalti netteppan tom am Mediterenia appa digmeum. Appanu tom nug kaɗag uɗitteppan ukka, Mikmetat wana talilitta, Tanatsilo guguitta ugakka ukka, Janoa waum.

⁷ Janoanu amu yau uɗitteppanu ukka, Atarot wana ukka, Nara waum. Appanu amu Jeriko ukka noa, Jodan leppa batom.

⁸ ⌊Yawalti uɗitteppanu tomnu nai laa am, tom amu kaɗag uɗitteppanu digma, qaban uɗitteppanu uɗiaknu nai, am nai amuam inam.⌋ Tapua, appanu tom amuam qaban uɗitteppanu ukka, oolnu noak onig Kana, appa ukka, oolnu noak amu dim lamitta ukka, Mediterenia yuppa ukkom. Wan amu Josua nuhig ehanittak ele ag Israel dilag huu okkai Epraim baelkadppa, ag aulag daakkunu madappig.

⁹ Ag amu mattanna, ag aab laala ele, aab naunau aab amu taliliattak ele Epraim madappig; amu aab amu laa ag Israel dilag huu okkai Manase mahaibnu wan, wan amuam ag aulag amu, am appa daappig.

¹⁰ Josua, nuhig ehanittak ele, ag wan amu Epraim madappig, amge Epraim ag Kanan danab Gesernu ii lamadppig amunu, danab Gesernu ag Epraim oolagppa daaeg uɗie, gemu ⌊nai imu yaak haenppa⌋ ele, ag ahilag maɗi nid bia daatteb.