Josua 12 - Nobonob Baibel

King Israel ag eɗadppig, ag onilkadnu lista

¹ Israel danab ag matu king aɗit laa Jodan le laih kaɗag uɗitteppanu eɗatna, wan ahilah aoppig. Wan amuam oolnu noak onig Arnon, appa digma ukke, qauko Hermon batak. Aria, atu onig Araba, Jodan leppanu kaɗag uɗitteppanu, wan amu ele. ⌊King aɗit eɗatppig ele amuam Sihon, Og ele.⌋

² King Sihon nug am Amo ted. Nug Hesbon dayeye, Israel ag eɗidna, nuhig ban daup ele eɗadppig. Wan nuhig tom am, Arnon oolnu noak, aab Aroer am oolnu noak amu daugppa dayom, amu wan nuhig tom am appa digma, oolnu noak amu awa ukka, le Jabok, appa waum. Le naɗi amuam wan tom Sihonnu, amu Amon ele dilag dayom. Wan laa onig Gileat, wan amunu maha laa am ele Sihonnu dayom. Wan maha amuam, Gileat wan maha laa le Jaboknu, laih yawalti uɗitteppanu daatte.

³ Sihon nug Jodan leppanu kaɗag uɗitteppanu atu Araba ele gumom. Atu amunu tom laih yawalti uɗitteppanu daatte, amuam Galili le ameg, tom laih yau uɗitteppanu daatte, amuam Mauhak Le. Tom laa am aab Bet Jesimot, amu appanu ukka, qauko laa onig Pisga batak.

⁴ King Og nug Basan dilag king dayom. Nug Repaim buɗubppan dimnunab, nug Astarot, amu Edrei ele appa dayaya, king dayom.

⁵ Nuhig wan tom yawalti uɗitteppanu amu, amuam qauko onig Hermon appa digma ukke, Saleka batak dayom. Nug wan onig Basan ele gumom, amge wan onig Basan am oh ii gumom. Iitta. Gesur danab, Maka danab ele ag wan amu laih gumappig amunu, Ognu wan am ukka, tom amuppa batom. Og amu oh gumama, nug Gileatnu wan maha ele gumom. Laih nug gumom ele am ukka, Hesbon dilag king Sihon, nug laih gumom, laih amunu tomppa batom.

⁶ Yawenu maɗi nid Moses, am Israel danab ele ag King Sihon, am King Og ele, ahilti danab ah ele eɗadppig. Eɗadna amu, Moses nug ahilag wan amu otia, Israel dilag huu okkai Ruben, Gad ele, amu Israel dilag huu okkai Manase mahaib ele ahilag daakkunu ag mattom.

⁷ Imuam Josua nug Israel ele ag king ag Jodan leppanu qaban uɗitteppanu daaegeg, Israel eɗadppig, ag onilkad. Ag Balgatnu Lebanonnu oolnu noakppa dayom, appanu ukke ukke, qauko Halak, appa batak daappig. Halak am Seir guguittak. Josua nug wan amu, Israel aulag daakkunu, Israel dilag huu okkai anen anen, ahilag daakkunu ahilagppa otia mattom.

⁸ Wan amuam wan maha qauko qauko ele, amu wan maha qauko nakok qauko okkai diigppa, Kanan wan ooppa qaban uɗitteppanu daatteb, amu atu onig Araba, aria qaukoppa wan laih laih oh qauko igippa tette, am atu taɗak Juda wanppa daatte, amu wan onig Negeb ele. Kanan danab ag aben amu ohppa daappig, ag am Hit danab, Amo danab, Kanan danab, Peres danab, Hiwi danab, amu Jebus danab ele. Imuam king anen anen Israel ag eɗadppig.

⁹ Jeriko dilag king, amu Ai dilag king ele; Ai am Betel guguittak dayom.

¹⁰ Jerusalem dilag king, amu Hebron dilag king ele.

¹¹ Jarmut dilag king, amu Lakis dilag king ele.

¹² Eklon dilag king, amu Geser dilag king ele.

¹³ Debir dilag king, amu Geder dilag king ele.

¹⁴ Horma dilag king, amu Arat dilag king ele.

¹⁵ Lipna dilag king, amu Adulam dilag king ele.

¹⁶ Makeda dilag king, amu Betel dilag king ele.

¹⁷ Tapua dilag king, amu Heper dilag king ele.

¹⁸ Apek dilag king, amu Lasaron dilag king ele.

¹⁹ Madon dilag king, amu Hasor dilag king ele.

²⁰ Simronmeron dilag king, amu Aksap dilag king ele.

²¹ Tanak dilag king, amu Megido dilag king ele.

²² Kedes dilag king, amu Jokneam dilag king, Karmel appanu ele.

²³ Dor dilag king, aab okkai Napot Dor, appanu, amu Gilgal appanu Goyim dilag king ele.

²⁴ Amu Tirsa dilag king ele. Amu oh am king ebqak 31. Ag king amu eɗadna, amu ag ahilkad aab oh ele diippig.