Josua 11 - Nobonob Baibel

Israel ag ulah yawalti uɗitteppan king eɗadppig

¹ Haen Hasor dilag king, Jabin, nug kobol beum amu doya, nug oo qeqaɗak nai laa me, king imu dilagppa ukkom; Madon dilag king Jobab, Simron dilag king, amu Aksap dilag king ele.

² Jabin nug nai ahilagnu maama, nug nai me, king ag qauko Kanan wan ooppa yawalti uɗitteppanu daatteb, appa ele ukke, amu nug nai me, king ag Araba appa, Galili lenu yau uɗitteppanu ukkakppa daappig ele ukke, amu nug nai me, king ag qauko nakok qauko okkai diigppa daatteb, qauko amuam Kanan wan ooppa qaban uɗitteppanu daatteb, king amu dilag ele nai me ukke, nug nai Napot Dor dilag kingnu ele me ukkom. Napot Dor am Kanan wan laih qaban uɗitteppanu daatte.

³ Nug ahilagppa me ukke, amu nug ele Kanan dilag king laih kaɗag uɗitteppanu, amu laih qaban uɗitteppanu ele batak, nug ahilagnu nai me ukkom. King amu ag am, Amo dilag king, Hit dilag king, Peres dilag king, Jebus dilag king ele, ag laih qauko qauko ele daappig. Amu nug Hiwi danab, ag Hermon qauko guguittak daappig, ahilagnu ele nai me ukkom. Wan atu amu onig Mispa.

⁴ King amu oh ag Israel ele ban hekkulagnu oolag laippu daye, ag ban danab ahilkad anen anen diin qagmaadppig. Ag ahilkad daupnu ebqak am huanaknab, ihi yu ihippa daatte amubia. Ag ahilkad hos, bannu karis ele am kuɗumnab.

⁵ King amu oh ag ban daup ahilkad aɗaeg o, ag Israel ele ban hekkulagnu hena, ag gona, haen tutu dayaknu aab Merom le ihippa, appa kalappig.

⁶ Ag anam heeg, aakku Yawe Nug Josua amegppa aum. “Na aib ahilagnu baɗame. Aɗinu? Butti, haen inamppa, ag ohnab mauhak daaglag. Ge, da heppi, ag Israel ag ag oh aqadkkulag. Na nug qak amu eɗittona amu, na ahilkad hos ⌊ag banppa baula oiyak elele iitta daaglagnu,⌋ na ag baelkad bittub diɗilkad otaɗadna, kekeɗ dilag bannu karis oh manadppe eweg!” awa aum.

⁷ Amu Yawe Nug anam aum amunu, Josua nuhig ban danab ele ag laippun Merom leppa, appa ag banelag tena, king amu, ahilkad ban daup ele ban heppig.

⁸ Yawe Nug Israel ehanatta, kekeɗ ban daup amu diia, ag eppelagppa meum. Israel ag kekeɗ lamadna gona, Saidon Anuqak, appa, amu Misrepot Maim appa wana, ag lamadna gona ele, Mispa, ban digmeppigppanu kaɗag uɗitteppanu daatte amu, ag appanu oolnu noakppa wappig. Ag tuɗidna lamadnana aqaegeg ukke, laippu laa bau ii dayom.

⁹ Ag oh aqan malona amu, Josua nug hos, ⌊ag baula banppa oiyaknu elele iitta daaglagnu,⌋ nug ag baelkad bittub diɗilkad otaɗatta, nug kekeɗ dilag bannu karis oh manatte ewadppig. Yawe Nug anam aakku hekkunu a amu, nug anam aakku heum.

¹⁰ Aria, Josua nug kekeɗ lamattaknu eɗua uɗia, nug aab Hasor eɗitta, nug Hasor dilag king qep elabppa qeum. Aɗinu? Hasor am kekeɗ haen amuppa ban heppig ele amu, am ahilkad aab okkai dilag aab anuqak dayom.

¹¹ Israel ag aab amu ohnu danab ah qep elabppa aqappig. Amu oh Israel ag heeg, ag Yawenuib nuhig pelemppa daappig. Ag keeke laippu laa ulah noobppa eeɗom ele anidna, iinab uuitteg dayom. Anam daye, Josua nug aab okkai amu mane ewom.

¹² Josua nug king amu oh, ahilkad aab okkai ele eɗatta, nug qep elabppa aqom. Nug Yawenu maɗi nid Moses hekkununab aum bia, Josua nug he, king amu oh, ahilkad aab okkai ele, ag Yawenuib nuhig pelemppa daappig.

¹³ Josua, nug Israel ban daup ele ag anam henan, aab amu oh aoppig, amge ag aab okkai qauko nakokppa, wan gome gome hattak daappig amu, ag ii manatteg eoppig. Aab laippuib laa qauko nakokppa heppig ag manaeg ewom, amuam Hasor aab.

¹⁴ Ag anam hena, Israel ag keeke ena ena, am makau keeke, banppa agappig ele amu, ag amu oh diippig. Keeke amu oh am aakku ahilagnab dayom, amge ag danab ah amu oh qep elabppa aqaeg mauhadppig. Ag laippu laa iinab uuitteg dayom.

¹⁵ Am Yawe Nug nuhig maɗi nid Moses amegppa anam haknunab a, anamnab Moses nug Josua amegppa anam hekkununab aum. Amu Josua nug anamnab hekkunu, anak amubia, nug heum. Nug Yawe, Moses amegppa haknunab aum amu, nug nai amu oh tutukku dim lamitta heum.

¹⁶ Amunu Josua nug aakku wan amu oh awom. Nug laih qauko qauko ele, Negeb amu wan atu aab Gosen guguittak ele oh awom. Nug qauko nakok qauko okkai diigppa daatteb, qauko nakok amuam Kanan wan ooppa, laih qaban netteppanu, appa daatteb amu, nug amu oh awom. Amu nug wan atu onig Araba, amu Israelnu wanppan qauko, amu qauko amunu diigppan qauko nakok ele amu, nug amu oh ele awom.

¹⁷ Israel wan tom gemu am Helak qauko, Seir guguittak, appanu ukka Balgat waum. Amuam qauko Hermon guguittak. Balgat am Lebanonnu atu oolnu noakppa daatte. Josua nug wan amuppanu king oh eɗatta, aɗalatta aqom.

¹⁸ Josua nug amu hekkunu banppa haen elab dayom.

¹⁹ Wan atu amuppan aab okkai auntai laa Israel ele oolah maɗoɗppaib daaglahnu nug tituana nai qakkak laa ii heppig. Hiwi danab Gibeonnu, agib am Israel ele maɗoɗ daaglagnu anam heppig. Laa oh ag am banppa eɗattak.

²⁰ ⌊Ag oh am kayak hambuppuak uuattaknu uuppig⌋ amunu, Yawe Nug he, Amo aɗi danab amu, ag ahilag dabmak aakku ɠagattag eppe, ag Yawenu nai tappaeg ne, Israel ele ban heppig. Ag anam heppig amunu, Yawe Nug Israel ehanatte, ag hattaeg, ag oh Yawenuib nuhig pelemppa daappig. Israel dilag ban daup ag oo gai-iitta doya oo metta ehanittak laa ii epponadppig, oh aqaeg mauhppig. Yawe Nug anam aakku Moses amegppa hakknunab aum amunu, nug aum bia, hak amu aakku beum.

²¹ Haen amuppa Josua nug Anak buɗub, ag laih qauko qauko ele Hebron, Debir, Anap guguittak daappig amu, ag qauko amuppa daaegeg, amu Juda wanppa, Israel wanppa ele qauko qauko daattebppa ele daappig amu, nug ag oh hatte nauhppig. Nug he, ag, aab ahilkad oh ele, ag Yawenuib nuhig pelemppa daappig.

²² Anak buɗub laippu laa uuitte, Israel wanppa laa iinab dayom, amge laala ag Pilistia wanppa, aab Gasa, Gat, amu Asdot ele appa daappig.

²³ Amunu Josua nug Yawe, Moses amegppa haknunab aum, amubianab wan amu oh eɗattom. Nug Yawe, Moses amegppa aɗi aɗi hakknunab aum amu, nug tutukku dim lamitta heum. Nug wan amu Israel aulag daakkunu pania mattom. Nug otia, Israel dilag huu okkai anen anen, ag mattom. Israel ag wan aoeg dimppa amu, ag maɗoɗ daappig.