Jona 3 - Nobonob Baibel

Jona, Yawe oɗe dim lamittom

¹ Aria, keeke anam beum, amu dimppa Yawe Nug baula Jona amegppa aum.

² “Na gona, aab okkainab Niniwe, appa tena, da na amenppa nai appi amu, na danab amu amelagppa appe dooglag,” awa aum.

³ Yawe Nug anam a amu, aakku Jona nug Yawe aum, amu oɗe dim lamitta, aha ukka, Niniwe teum. Niniwe amu aab okkainab, danab nug aab nob laihnu aha, nob laihppa gokku amu, nug deɗ ewam oiyaya, nug laih tekku.

⁴ Amu Jona nug aab okkai ooppa digma oiyaya, deɗ amuppa nug digma huana ewawa, danab amelagppa inam aum. “Deɗ 40 maleb, Yawe heeb, Niniwe padal mekku,” awa aum.

⁵ Jona nug anam mattieye, Niniwe danab ah ag doon, ag Kayak Nug genab anam hekkunu oolagppa genab doona, ag ee ohnu kud mena daaglagnu ɗo mena, ag lamen heɗiag ele beɗulagppa tagappig. Danab hamu ukkak, danab okkai ele, ag ohnab anamib heppig.

⁶ Ag anam heeg, Niniwe dilag king nug Jonanu nai doya, nug sia king uua, kingnu lamen elab enanag uɗa, lamen heɗiag ele awa ma, uhuɗppa dayom.

⁷ Nug anam ha, king nug Niniwe danab oh dooglagnu nai inam me ukkom. “Da, dahilad anuqak danab ele ig ɗo inam mettem. Danab ah oh, amu doɗ oh ele, ag aɗitai keeke ii lamana. Danab, ah, makau, sipsip keeke, ag oh ee, le ele ii lamana.

⁸ Laa ele amu, ag ohnab, danab, doɗ ele, ag lamen heɗiag ele maattak daana, ag Kayak amegppa ɠagattag unuqitteg! Aria, ag danab guittak nau mauhnoak mettak kobol, amu eheɗ hak laa oh ahilag uueg!

⁹ Ig anam hepput, Kayak anikka, ihinignu oo bodoetta le meeb, ihinignu oo nauhak huanak uukkutai. Ig iitai mauhmata,” awa aum.

¹⁰ King nug anam a, danab ah ag anam heeg, Kayak Nug amu antta, Nug ag ahilag eheɗ hak uuppig ele anatta, Nug ahilagnu oo bodoetta, le me, Nug he, ag padal ii meppig.