Job 3 - Nobonob Baibel

Jobnu nai tatamnu

^1-2 Ag anam daaeg, deɗ, tuqan ele amu oh iitta me, Job nug deɗ nug doum, nug deɗ amunu ena iinab doya, ii daalonu nai mattiaya, nug aum.

³ “Deɗ da domi, deɗ amu iitta mekkunu ool daatte. Ao, tuqan laappa, laa nug aha, ‘Nid danab laa doum,’ awa aum amu, tuqan amu ii daamanu ool daatte.

⁴ Deɗ amunu amu, gatatuib deɗ amu tonakkunu ool daatte. Ao, Kayak hab attan daatte, Nug deɗ amunu, ‘Deɗ ena,’ ii dabmemanu ool daatte. Ge, deɗ amuppa amahlak ii daamanu ool daatte.

⁵ Menuaknu deɗ dahilnu amu, gatatunab deɗ amuppa daakkunu, lombig deɗ amu tonakkunu, gatatu hinqaknab deɗ amunu amahlak heeb, iitta meeb, amahlak nakok laa deɗ amuppa ii daamanu ool daatte.

⁶ Deɗ da domi amu, tuqan amuppa gatatunab, gatatu teppu ele daakkunu, tuqan amu iitta mekkunu, deɗ da domi amu, danab nug maɗ amunu deɗ ebqekku, nug ebqeeb ukkeb, menuak deɗ dahilppa ta, nug deɗ amu tippala, ii ebqeeb, ii daamanu, laa nug deɗ amu kalam ooppan ebqak ii memanu ool daatte.

⁷ Deɗ da domi, deɗ amunu tuqan am, ah mattoi, nid aokkun gamag ahak ii dootte ele amu, tuqan amu, am anam daakkunu, oo gamag ahak nakok laa amuppa ii daamanu ool daatte.

⁸ Laa ag laanu, nug eheɗ laa awaknu anak waappa daakkunu daatte hetteb ele amu, ag deɗ da domi amu, ag deɗ amu eheɗ laa awaknu anak waappa daakkunu akkulagnu, laa ag ɠagattag ahilagppa heeg, nauhak naɗi okkai bette amu, ag heppeg, deɗ da domi am anam daakkunu ool daatte.

⁹ Deɗ da domippa, deɗ amunu buttuanu hoɗoppai ii amahalmananu, aam ii beeb, amahlak ii daamanu, aam diigppan ii bemanu ool daatte.

¹⁰ Deɗ da domi, deɗ amuam anam daalonu ool daattenu diig am, deɗ amuam he, da dokkulnu ib keldoak ii daye, deɗ amu ele ii he, da uug digdig kuɗum iikku anidttem.

¹¹ O gadon, anai menuiɗom, da paha haen amuppanab mauhlom am ena. Ge, anai da menuiɗebeb mauhlom am ena.

¹² Aɗinu anai nug menuiɗa, atognoiɗom? Ao, aɗinu anai nug menuiɗowa, huh meɗe, da ena memi?

¹³ Da amu madittemnu diig am, anai nug anam ii helo amu, gemu da moɗppa maɗoɗ ele daalom. Ge, da moɗppa niieye, hik awen daalom.

¹⁴ Da anam mauhlom amu, gemu da king laala, ahilkad ulum mettak danab ele ag lag enanag, okkainab ele ahilagnu babaitteg ukke, ag mauheg, lag amu ele nauhppig, da ag ele niilom.

¹⁵ Ge, da danab okkai, ag gol ag laulagppa mena, silwa huanaknab ele aon, aguppa meppig, da ag ele niilom.

¹⁶ O anam iitta amu, haen da anai ii menuiɗom, da haen amuppa nug ooppa dayeye mauhppi, nug da mauhmi menuiɗeb, moɗppa boumiɗlob am ena. Ge, da nid mauha doa, amahlak nakok laa ii anidtte, da anambia dolom am ena.

¹⁷ Nami aabppa amu, danab nau ag baula nau ii hetteb; appa danab beɗu maidadaɗak ele amu, nug hik aotte.

¹⁸ Appa danab ban heegeg, kekeɗ eɗatteg, kekeɗ eppelagppa daaeg heeg, ag laa dilag begbeg maɗi nid daan, uɗat huana hetteb ele amu, Nami aabppa ag hik aon daatteb; ag ahilkad okkai baalag okkaippa uɗat huanak hekkulagnu ewak amu, ag baula ii dootteb.

¹⁹ Danab hamu, danab okkai ele oh Nami aabppa daatteb; appa begbeg maɗi nid nug nuhig okkai waappa ii daatte, nug hamu daatte.

²⁰ Aɗinu danab ag oolagppa uug naunab doon oitteb ele ag wanppa bau daan, amahlak anidtteb? Ge, aɗinu laa ag bau dayaknu nau ninig ele dootteb amu, ag wanppa bau daan oitteb?

²¹ Danab anam amu, ag mauhkkulagnu oolag naɗi daatte, amge ag ii mauhtteb. Ao, ag danab en okkainab mattia anidkkunu mattiak okkai hette bia mauhkkulagnu mattiak hetteb, amge ag ii mauhtteb,

²² Ge, ag mauhkkulagnu oolag huana heehe, ag daan, mauhkkulagnu hena, moɗppa nonana, ag gamag ahak okkai dootteb.

²³ Aɗinu danab nug nuhig ib anidkkunu elele iitta, ⌊da daattem bia,⌋ nug bau daatte? Ao, danab ⌊da daattem bia,⌋ Kayak he, nug maniguittakppa daatte amu, aɗinu nug wanppa bau daatte?

²⁴ Da ee ii lattem. Iitta. Da mahiak okkaiib hettem. Ge, da le huana noa gotte bia, da huana aiqagekke daattem.

²⁵ Aɗinu? Da keeke laa dahilppa bemanu baɗen oimi amu, keeke amu aakku da iwom. Yo, keeke da iumanu oolppa uuaknab doomi amu, keeke amu dahilppa aakku beum.

²⁶ Diig amunu amu, da maɗoɗ laa ii doottem. Dabmak dahil toetta ii daatte. Da hik awen iinab daattem. Da oolppa elele iittanab iitta aakkuib doottem.” Job nug anam aum.