Jeremaia 52 - Nobonob Baibel

Jerusalem na qeum

¹ Sedekaia nug maɗ 21 dayaya, nug king ba dayom. Nug king ba, nug maɗ 11 Jerusalem appa king dayom. Nug anig am Jeremaia aɗeg Hamutal. Nug Lipna aabppanu ah.

² Sedekaia nug Yawenu neekkakppa eheɗ heum; nug King Jehoiakim heum bia, nug heum.

³ Nug amu he, Juda danab ah, laa Jerusalemnu, laa Juda wanppa laih laihnu amu, ag ele anam heegeg, Yawe Nug ahilagnu oo nauhom amunu, Yawe Nug danab ah amu Nug noobppanu lamatte, ag ahilag wan uun, wan laappa uma gona, appa ag diia ukka laih me dayak danab ah daappig. Aria, Sedekaia nug Juda dilag king dayaya, nug Babilon dilag king waappa daakkunu uua, nug nuhig nai tappe neum.

⁴ Nug Babilon dilag king Nebukatnesarnu nai tappe neum amunu, Nebukatnesar nug nuhikkud daup oh ele ag ahan uɗin, Jerusalem danab ah ele ban heppig. Nebukatnesar, nuhikkud daup ele ag Sedekaia king dayaya, nuhig king dayaknu maɗ eblaih waɗeleppa kalam eblaih laih elenu deɗ eblaih laih eleppa uɗin, Jerusalem guguittak daappig. Ag appa haen tutu dayaknu aab kalan daan, ag Juda danab Jerusalem daappig ele ban hekkulagnu aab okkai amu talilittak bannu keeke bappaidppig.

⁵ Ag digmena aab okkai anam oo mattan aqaknu maadna daaeg ukke ukke, King Sedekaianu king dayaknu maɗ 11ppa ag Juda eɗadna, Jerusalem aoppig.

⁶ Babilon ag aab amu talilidna daappig amunu, aab okkai ooppa daappig ag dimittim gona ee aoglagnu elele iitta. Ag anam daaeg ukke, Sedekaianu king dayaknu maɗ 11ppa, kalam ebqak waɗele, kalam amunu deɗ eblaih waɗeleppa ee iittanab meum. Danab ah ag ee laa aon lakkulagnu am iittanab iitta.

⁷ Juda ag anam eheɗ daaegeg, Babilon ag aab okkainu aɗ aakku heeg, giɗo naɗi dayom. Giɗo naɗi daye, Juda dilag daup Jerusalem daappig ele ag ⌊Sedekaia ele⌋ tuqan amuppa kingnu dadppa wana gona, aab okkainu aɗ laih laih doa qal mettak daapiɗ odppa wana, dimittim gona, ag oolna, atu Araba, ag appa gokkulagnu goppig. Babilon ag aab talilidna daappig, amge Juda dilag daup ag ib amu anidna, oolna goppig.

⁸ Ag anam oolppig, amge Babilon dilag daup ag dim lamadna gona, King Sedekaia nug uɗem okkai Jeriko guguittak appa ugekke, ag nug qe-eɗidppig. Sedekaianu daup oh ag laippu nug ele ii daappig; ag oolna, matatun laih laih gona daappig,

⁹ amunu Babilon ag Sedekaia aɗappig. Ag nug aɗan, Babilon dilag king nug Hamat wanppa aab onig Ripla appa dayom amunu, daup ag Sedekaia aon gona, appa Nebukatnesar eppegppa meeg, nug ag nuhignu aɗi aɗi hekkulagnu aum.

¹⁰ Ripla appa am, Babilon dilag king nug a, Sedekaia amegppa anattette, ag bekkod oh aqaeg mauheg, Juda dilag ehanittak anuqak danab oh ele aqappig.

¹¹ Anam heeg, Nebukatnesar nug a, ag Sedekaia ameg laih laih oh ahuɗeg nauhe, ag nug qakkaknu keeke brasppa hak, ag amuppa nug qakkona, ag nug aon, Babilon wanppa goppig. Appa amu, Babilon dilag king he, ag maniguittakppa inaeg, maniguittakppaib daye ukke, mauhom.

Babilon ag Jerusalem heeg nauhom

¹² Babilon dilag king Nebukatnesar nug king dayaya, nuhig king dayaknu maɗ 18ppa, kalam ebqak tanig ele, kalam amunu deɗ eblaih laihppa Nebusaradan, nug daup Nebukatnesar gumappig dilag okkai amu, nug Babilon dilag king ehanittak anuqak laa aakku, nug Jerusalem beum.

¹³ Nug ba he, Babilon dilag daup ag Yawenu mettid lag, kingnu lag enanagnab, amu danab ah onilag ele, nug ag laulkad oh ele Jerusalem appa manatteg eoppig.

¹⁴ Amu Nebusaradan, nug daup Nebukatnesar gumappig dilag okkai amu, nug a, Babilon dilag daup ag Jerusalemnu aɗ loppaɗeg nauhom.

¹⁵ Am Nebusaradan, nug daup Nebukatnesar gumappig dilag okkai amu, nug danab daɗeknab laala, am danab ah laa haen amuppa Jerusalem appa daappig, am laa ag uɗat laala haknu doyak okkai ele, amu laa ag ban ii malom haenppa ag akka ahan gona, ag beɗulag Babilon dilag daup eppelagppa meppig ele, Nebusaradan nug ag oh diia, Babilon wanppa ukkom. Appa ag diia ukka laih me dayak danab ah daaglagnu diia ukkom.

¹⁶ Amge Nebusaradan, nug daup Nebukatnesar gumappig dilag okkai amu, nug Juda danab ah daɗeknab laa, ag wan keeke iitta ele, ag dad okkaippa, grep dad eleppa uɗat hekkulagnu uuatte daappig.

¹⁷ Amu Babilon dilag daup ag Yawenu mettid lagnu biidod okkai aɗit brasppa hak, tappiɗ naɗi okkai brasppa hak onig Yu, tappiɗ keeke me dayaknu balal laala brasppa hak ele oeg aoɗatteg, ag akkan Babilon goppig.

¹⁸ Ag amu aon gonana, ag waa, sabol naunau, lam wik eeɗaknu keeke, tiig amuppanu awa tauɗeb ukkaknu tappiɗ, tappiɗ laa, am keeke laa oh brasppa hak, Juda dilag mana mettak danab ag amuppa Yawenu mettid lag, amuppa uɗat heppig ele, Babilon ag amu ele aon goppig.

¹⁹ Nubusaradan, nug daup Nebukatnesar gumappig dilag okkai amu, nug waa okkai, tappiɗ, mana mettak danab ag amuppa kalu danab ile muttuɗig enanag bette ele manaknu uɗat hetteb, tiig amuppanu awa tauɗeb ukkaknu tappiɗ, waa laa, lam maknu balal, tappiɗ laa, kap wain gokkaɗaknu ofa hekkulagnu, keeke oh am gol ena dubuttid iitta ele, o silwa ena dubuttid iitta eleppa hak amu, nug amu oh ele awa, Babilon ukkom.

²⁰ Biidod okkai aɗit brasppa hak, tappiɗ naɗi okkai brasppa hak onig Yu, makau dawai dottog 12 brasppa hak amu maoppig, tappiɗ keeke me dayaknu, balal laala brasppa hak ele, Yawenu mettid lagppanu ag King Solomon he, heppig amu, keeke amu ohnu am brasppa hak, am uug naunab nau ele. Danab nug skelppa ma, bras amunu uug anidkkunu elele iitta.

²¹ Biidod okkai aɗit brasppa hak, elab anen anen ahilah am 8 mita. Biidod aɗit anen anen ahilah okkai am 5 mita, 30 sentimita ele. Ag amu heppig, am paip bia heppig, gamagppa oɗe dayom, amge paip amu akka amu, teppu nuhig am 7 sentimita maha ele.

²² Biidod anen anen ikkilahppa ikki tonaknu keeke laa dayom. Ikki tonaknu keeke aɗit amu oh amu, ahilah elab am 2 mita, 20 sentimita ele. Ikki tonaknu keeke aɗit amu qaɗelahppa bala brasppa hak dayom. Laa am sen lo akkak bia, laa am ad pomigranet meu dottog.

²³ Biidod anen anenppa amu, ad pomigranet meu dottog, ahilag ebqak am 96, ag biidod anen anen taliliatak daappig. Aria, sen lo akkak amu attan amu, pomigranet meu dottog 100 daappig.

²⁴ Nubusaradan, nug daup Nebukatnesar gumappig dilag okkai amu, nug Juda dilag mana mettak ikki danab Seraia, mana mettak danab Seraia waappa dayom Sepanaia, amu Yawenu mettid lag od gumak danab ewam ele maniguatta,

²⁵ nug danab ah haen amuppa Jerusalem appa daappig oolagppanu, nug daup dilag okkai ban danab gumom ele, kingnu ulum mettak danab eblaih aɗit ele, yaak danab nug danab ag kingnu daup daaglagnu daappig ele, ag onilagppa e doppig, amu danab 60 laa ele Jerusalem daappig ele amu, Nebusaradan nug ag ele oh diiom.

²⁶ Nebusaradan, nug daup Nebukatnesar gumappig dilag okkai amu, nug danab amu oh diia, Ripla ukkom. Babilon dilag king nug appa dayom.

²⁷ Ripla am Hamat wanppa dayom. Nebusaradan nug danab amu diia, Ripla ukke, King Nebukatnesar nug he, aqaeg mauhppig. Anam amu, Juda danab ah ag ahilag wan uun gona, Babilon appa diia ukka laih me dayak danab ah daappig.

²⁸ Juda danab ah Nebukatnesar nug diia ukka laih me dayak danab ah Babilon wanppa daaglagnu diia ukkom ele, ahilag ebqak am inam. Nebukatnesar nug king abenab awa, nuhig king dayaknu maɗ eblaih aɗitppa nug Juda wanppa ukka, ban ha, Juda danab ah 3,023 diia ukkom.

²⁹ Amu dimugppa, nuhig king dayaknu maɗ 18ppa nug Juda wanppa ukka, ban ha, Juda danab ah Jerusalemnu 832 diia ukkom.

³⁰ Amu dimugppa, nuhig king dayaknu maɗ 23ppa nug Juda wanppa ukka, ban he, Nebusaradan, nug daup Nebukatnesar gumappig dilag okkai amu, nug Juda danab ah 745 diia ukkom. Amu oh ahilag ebqak am 4,600.

Babilon dilag king nug Juda dilag king tatamnu ehanittom

³¹ Aria, Nebukatnesar nug Juda dilag king Jehoiakin awa, Babilon wanppa ukka laih me dayak danab daakkunu ukkom, maɗ amuppan digma ukke, maɗ 36 uue, maɗ 37 ooppa danab onig Ewil Merodak nug Babilon dilag king abenab awom. Nug awa, nug he, ag Juda dilag king Jehoiakin maniguittakppanu aon meeg, dimittim uɗiom. King Ewil Merodak nug maɗ amuppa kalam 12ppa, deɗ 25ppa anam heum.

³² Ewil Merodak nug Jehoiakin amegppa nai ena mattia, Ewil Merodak nug king laa oh nug ele Babilon daappig amu, nug Jehoiakin, amu oh dilag aben eɗittak mettom.

³³ Nug anam heum amunu, Jehoiakin nug baula maniguittak lamen ii takkom. Iitta. Nug lamen hamu maatta, hanhan nug King Ewil Merodaknu balalppa ee lattom. Nug anam ee laawo ukke ukke, nug mauhom.

³⁴ Deɗ oh Babilon dilag king nug Jehoiakin ee mette lattom. Jehoiakin nug bau dayeye, Babilon dilag king Ewil Merodak nug anamib Jehoiakin ee mette laawo ukke, nug mauhe batom.