Jeremaia 47 - Nobonob Baibel

Pilistia danab ah dilagnu nai

¹ Paro nug ahe, Pilistia danab Gasa daappig ele ban heppig, amge nug amu ii heppig haenppa Yawe Nug propet Jeremaia nai laa mette doyom. Nai nug doyom am inam.

² “Yawe Nug inam atte. ‘Ag neegna, kekeɗ yawalti uɗitteppanu daatteb, ag uɗitteb antteg! Ag le titiɗa, le okkainab daatte bia uɗitteb. Ao, ag le ui oa, keeke kuɗum tonatte bia uɗitteb. Le titiɗa okkainab dayaya, wan oh tonatte, ag uɗin amubia hekkulag. Ao, le titiɗa okkai naɗi, aab keeke tonatte, amubia ag ahilkad aab ele aoglag. Pilistia danab ah ag gaaglag. Ge, laa oh Pilistia wanppa daatteb, ag mahiglag.

³ Kekeɗ ag uɗippeg, hos dawai ag qaiettan gobeppeg, oqotti ob dooglag. Daup ag bannu karisppa gobeppeg, bannu karis oqotti ob, ag dooglag. Nid mamelkad ag anadna, eheɗ baɗan, ag eppelag am gai-iitta luɗua nak dayeb, ag eɗun, nid ii ehanadmana.

⁴ Aɗinu uug amu bekku? Pilistia danab ah oh iitta mekkulagnu haen aakku uɗiom. Ao, laa ag Tair danab ah, Saidon danab ah ele ehanadkkulagnu daatteb, ag oh iitta mekkulagnu haen aakku beum daatte,’ ” awa atte. Yawe Nug heeb, Pilistia danab ah ag nauhkkulag. Ao, Nug heeb, Pilistia danab, ag Kritnu uɗin daan, gemu ag oɗo yaak daatteb amu, ag nauhkkulag.

⁵ Uug amu beebeb, danab ah Gasa daatteb doon, ag ikkilag uɗug hoiglag. Ao, danab ah Askelon daatteb, ag oɗelag qamuttak daaglag. O Pilistia oɗo yaak danab, ag uɗem naɗippa daatteb, ag akka ag ⌊ahilag kayak hambuppuak ag ag dabmattaglagnu ag⌋ beɗulag guittak medatteb; amu haen gane laa ele ukkeb, ag amu uuglag?

⁶ Ag gaanna, ⌊kekeɗ ag Yawenu qep elab bia daatteb dabmena, qep elab nai doolo bia qep elab amegppa⌋ akkulag. “O Yawenu qep elab, na hik ii aottem. Na danab ah aqadkkutnu ii uuttem; amu haen gane laa ele ukkeb, na hik aon, aqaknu uɗat uukkut? Na eɗun, gaɗan nahip-ppa nona daye! Ao, na toettan, manin daye!” aon akkulag.

⁷ Amge Yawe Nug qep elab amu Pilistia heeb nauhkkulagnu haknunab aum amunu, qep elab amuam attem ha, hamu daakku? Ao, Yawe Nug qep elab amu Askelon, Pilistia yu ihippa daatteb ele aqakkunu, ag ele ban hekkulagnu haknunab aum amunu, qep elab am attem ha, amu ii hema?