Jeremaia 43 - Nobonob Baibel

Jeremaia nug uuom, amge laa ag wagai mena, nug aɗan, aon Isip goppig

¹ Amu Jeremaia nug nai amu oh Juda danab ah amu amelagppa aum. Nai amuam Yawe, Juda dilag Kayak, nuhig nai aakku. Yawe Nug Jeremaia aɗi aɗi ag amelagppa akkunu ana me, ahilagppa ukkom amu, nug ag amelagppa aakku aum.

² Nug ag amelagppa aum, amge Hosaia bekka Asaria, Karea bekka Johanan, amu beɗuppa tak danab laa oh ele ag akka ag ahilag dabmak dim lamidkkulagnu wagai meppig amu, ag ahan, Jeremaia amegppa appig. “Na hambubuttem. Yawe, ihinig Kayak, Nug na ig amenigppa, ‘Ag Isip aib gona daan oippig,’ na ig amenigppa akkutnu meitte ihinigppa ii uɗime.

³ Iitta. Neria bekka Baruk, nug na eheɗ heigkkutnu duttunitte, na Babilon dilag daup ag uɗin, iqappeg mauhkkunignu, o iitta ag aigna, Babilon goppeg, appa ig diia ukka laih me dayak danab ah daagnignu anam ame,” aon appig.

⁴ Ag anam dabmena appig amunu, Karea bekka Johanan, daup dilag okkai laa oh, am Juda danab ah amu oh ele, ag Yawe oɗe dim lamidkkulagnu uun, ii dim lamidppig. Nug ag Juda wanppa daaglagnu anam haknunab anak ag mattom, amge ag ii heppig.

⁵ Ag Yawe oɗe ii dim lamidppig. Iitta. Karea bekka Johanan, amu ban daup ikki laa oh ele ag Juda danab ah oɗo yaak daan, matatun wan laalappa gona daan, eɗun Juda wanppa daaglagnu uɗippig amu, ag amu diieg, Isip gokkulagnu goppig.

⁶ Ag amu diieg goppig. Aria laa amu, Nebusaradan, nug Babilon dilag daup Nebukatnesar gumappig dilag okkai, nug danab, ah, nid naunau laa, amu Juda dilag king aɗekkud ele Ahikam bekka Gedalaia, Sapan alag, nug ag gumadkkunu eppegppa meum. Amu Johanan aɗi, ag danab, ah, nid naunau, king aɗekkud amu ele diin gonana, ag propet Jeremaia, amu Neria bekka Baruk aa ele diiatteg goppig.

⁷ Ag anam diin goppig amunu, ag Yawe oɗe ii dim lamidnana, ag Isip gona, ag Isip ooppa nona gona, Tapanes batak teppig.

⁸ Tapanes appa amu, Yawe Nug nuhig nai imu Jeremaia mettom.

⁹ “Jeremaia, Juda danab ah ag na neekkidna daappeg, na men okkai laala diin, mawadna gona, Paronu lag enanagnab Tapanes ippa ina iikku daatte, na lag amu odppa tappan gokkulagnu men duqe ukkak amuppa, na men amu waappa oɗe buun, aguppa boumatte!

¹⁰ Na amu hewona, na ag amelagppa inam appe doyeg! ‘Yawe Nukka Ɠagattag Oh Ele, Israel dilag Kayak, Nug inam atte. “Da dahil maɗi nid Nebukatnesar, Babilon dilag king amu, da nug onigppa eppi uɗikku. Uɗieb, men da hei, iikku iguppa boumak daatteb amu, da heppi, ag sia king nuhig men amu attan meppeg daakku. Da heppi, balal nuhig men imu attan dayebeb, nug heeb, ag aam king amu qemanu lamen laa, am kingnu, ag lamen amu balal amu attan taiettaglag.

¹¹ Babilon dilag king nug banelag uɗieb, nug Isip danab ele ban hekkulag. Ag ban hebeppeg, aun aɗi laa ag oɗe nau aon mauhkkulagnu daatteb, ag oɗe nau aon mauhkkulag. Aun aɗi laa ag diia ukka laih me dayak danab ah daaglagnu daatteb, ag gona, diia ukka laih me dayak danab ah daaglag. Aun aɗi laa ag qep elabppa mauhkkulagnu daatteb amu, ag qep elabppa mauhkkulag.

¹² Nebukatnesar nug uɗia, Isip dilag kayak hambuppuak dilag mettid lag maneb eoglag; ahilag kayak hambuppuak dottolkad amu, nug aɗualatta, diia gokku. Sipsip gumak danab nug ulahnu lamen nuhig mekkunu uɗat okkai ii hette, keeke hamu bia dootte, amubia Nebukatnesar nug Isip eɗidkkunu uug ii dooma. Nug eɗitta, nug maɗoɗ ele eɗua laih gokku.

¹³ Isip wanppa amu, nug ukka, aamnu mettid lag, amuppa nug heeb, biidod, danab ah ag biidod amunu, ‘Am ihinig kayaknu keeke,’ anan ottaitteb ele amu, nug biidod amu heeb nauhppeg, Isip dilag kayak hambuppuak dilag mettid lag manatteb eoglag.” ’ ” Yawe Nug nai anam awa, Jeremaia mettom.