Jeremaia 41 - Nobonob Baibel

¹ Aria, Gedalaia nug anam a daaeg te, maɗ amuppaib kalam eblaih aɗitppa Netania bekka Ismael, nug Elisama alag, nug king tiigppan laa, nug Juda dilag kingnu daup dilag okkai laa aakku, nug danab eblaih tanig ele diie, ag oh Ahikam bekka Gedalaia gumidna Mispa goppig. Ag gona teeg, ag Gedalaia ele ee lanana,

² Netania bekka Ismael nug danab eblaih laih ele, nug ag ele oh ahan, Ahikam bekka Gedalaia, nug am Sapan alag, ag nug qep elabppa qeeg mauhom. Ge, ag laa Babilon dilag king nug Juda wannu gawana daakkunu tituanom amu, ag nug qeeg mauhom.

³ Ismael nug Gedalaia qe mauhe, nug Juda laa oh Gedalaia ele Mispa appa daappig, Babilon dilag daup Gedalaia ele daappig ele oh aqe mauhppig.

⁴ Ismael nug Gedalaia qe mauhe, deɗ amu uue wagɗe, laa nug heumnu ii doyom amu,

⁵ deɗ amuppa danab 80 ag Sekemnu, Silonu, amu Samarianu ele uɗippig. Ag ee aegnu ofa hekkulagnu, ag kalu danab ile muttuɗig enanag bette, amu mana, Kayak mettaknu ele aon uɗippig. Ag akkaɗilag hoin, lamen pattiɗadna, gaɗalkad ele otaɗadna, ag Yawe laugppa gokkulagnu uɗippig.

⁶ Ag ibppa uɗiegeg, Netania bekka Ismael nug Mispanu aha, ⌊hambuppua⌋ gayaya ukka, ag uɗalag teum. Haen nug uɗalag ta amu, nug ag amelagppa aum. “Ag uɗippeg, ig oh gota, Ahikam bekka Gedalaia anidkkunig,” awa aum.

⁷ Nug anam a, ag Mispa aab okkai ooppa ukkaeg, Netania bekka Ismael nug danab nug ele daappig ele ag ahan, aqaeg mauheg, ag moɗ laa, danab le aoglagnu buuppig amu, ag aqadppig gaɗalkad amuppa buɗiatteg noppig.

⁸ Amge danab uɗippig ele oolagppanu danab eblaih laih ele ag Ismael amegppa appig. “Aib iqappeg mauhmut! Aɗinu? Ig wit aeg, bali aeg, olip goɗen am uppuh leppu ele aab dimittim, aben laappa lokkummut daatte ⌊amunu na ii iqakkut dayeb, ig na mettagnig⌋,” aon appig. Ag anam aeg, nug laa oh aqappig, amge nug danab eblaih laih ele amu ii aqom.

⁹ Le moɗ Ismael aɗi ag danab amu gaɗalkad, Gedalaia aɗi gaɗalkad ele amuppa buɗiatteg noppig, le moɗ amuam Juda dilag king Asa, nug anukka he buuppig. Nug Israel dilag king Basa ban heeb, Mispa danab ah, nuhikkud daup amuppa daappig ele ag le iitta daamnanu, ag le aon lakkulagnu nug le moɗ amu babaittom. Amu Netania bekka Ismael, nug mauhppig gaɗalkad amuppa buɗiatte noeg, le moɗ ambeum.

¹⁰ Nebusaradan, nug daup Nebukatnesar gumappig dilag okkai amu, nug Judanu king aɗekkud, danab ah laala ele Mispa appa uuatta, Ahikam bekka Gedalaia nug ahilag okkai daakkunu he ukke, ag aakku daappig. Ag daappig, amge Netania bekka Ismael nug Gedalaia aɗi aqe mauheg, nug laala ele oh aɗalatta diia, Jodan le mataɗa, Amon wanppa gokkunu ukkom.

¹¹ Ag ukkaegeg, Karea bekka Johanan, daup dilag okkai laa oh nug ele daappig ele ag kobol eheɗ nau oh Netania bekka Ismael heumnu doon,

¹² ag ahilkad daup diin, Netania bekka Ismael ele ban hekkulagnu nug dim lamidppig. Ag dim lamidna gonana, Gibeon appa le gottu okkai laa daatte, ag le amu guguittak Ismael gukkuidna wappig.

¹³ Haen ag gumidna waeg amu, danab ah Ismael Mispanu diia ukke, nug eppegppa daappig, ag Karea bekka Johanan, daup dilag okkai laa nug ele daappig ele anadna, ag gamalag ahom.

¹⁴ Danab ah Ismael Mispa appanu aɗalatte, nug eppegppa daappig, ag gamalag ahe, ag eɗun, Karea bekka Johanan gumidna wappig.

¹⁵ Ag anam heppig, amge Netania bekka Ismael, nuhikkud danab eblaih ewam ele ag Johanan eppegppanu oolna, Amon wanppa gona daappig.

Johanan nug he, danab ah Nebusaradan uuatte, Mispa daappig ag Isip goppig

¹⁶ Ismael aɗi ag oolna ukkaeg, Karea bekka Johanan, amu daup dilag okkai laa nug ele daappig, ag danab ah Mispanu, Ismael nug Ahikam bekka Gedalaia qe mauhe, laa imu ii aqom amu, ag amu eɗun diippig. Mispanu ag am daup laala, ah, nid naunau, amu kingnu ehanittak anuqak laala ele. Netania bekka Ismael nug Ahikam bekka Gedalaia qe mauhe, danab, ah, nid naunau amu ele diia ukke, Johanan aɗi ag Gibeon appa eɗun diin, appanu diin goppig.

¹⁷ Ag eɗun diin, ag gona, ag Isip gokkulagnu Gerut Kimham tena, nakok daappig. Gerut Kimham am Betlehem guguittak dayom.

¹⁸ Ag Isip gokkulagnu diig am, ag Babilon dilag king aɗi ag ahilagnu aɗi hekkulagnu dabmenan baɗappig. Aɗinu ag anam dabmeppig? Babilon dilag king nug Ahikam bekka Gedalaia nug Juda wannu gawana daakkunu tituane, Netania bekka Ismael nug Gedalaia qe mauhom, am diig amunu ag Babilon dilag king nug aɗi hekkunu baɗan, ag oolna Isip wanppa gokkulagnu goppig.