Jeremaia 38 - Nobonob Baibel

Ag Jeremaia buɗieg, le moɗ lekkohib dayom eleppa noum

¹ Aria, deɗ laa Matan bekka Sepatia, Pasur bekka Gedalaia, Selemia bekka Jehukal, amu Malkiya bekka Pasur ag Jeremaia nug Juda danab ah amelagppa aɗi aɗi nai mattiom amu, ag dooppig.

² Ag Jeremaia nai mattieye, Juda danab ah doyegeg dooppig am inam. “Yawe Nug inam atte. ‘Aun nug aab okkai imu ooppa tuɗitta daakku, nug qep elabppa mauhkku, o iitta nug enugppa mauhkku, oo iitta nug oɗe nau danab kuɗum aqe mauhtteb ele awa mauhkku. Anam mauhkkulag, amge aun nug aab uua ukka, nug nukka nug beɗu Babilon eppelagppa mekku amu, nug bau daakku. Nug mauhak ib qe-eɗidkku. Nug bau daakku,’ awa atte.

³ Amu Yawe Nug imu ele atte. ‘Da heppi, Babilon dilag kingnu daup ag aab okkai imu eɗidppeg, ag Juda ag eppelagppa daaglag,’ awa atte.” Jeremaia nug Juda danab ah amelagppa anam a dooppig.

⁴ Kingnu ehanittak anuqak danab waɗele amu ag amu doon, ag gona, King Sedekaia amegppa appig. “Ig Jeremaia qepput mauhkku am ena. Aɗinu? Nug nuhig naippa nug he, ihinkad daup danab aab okkai imuppa daatteb ele, ag oolagppa gai-iitta daatteb, danab ah ele anamib. Nug mauhkkunu diig laa ele amu, danab amu nug Juda danab ah ag ena daaglagnu ib ii maditte. Iitta. Nug ag nauhkkulagnu hette,” aon appig.

⁵ Ag anam aeg, King Sedekaia nug aum. “Nug ag eppelagppa daatte. Da ahilag ib oo nekkulnu elele iitta amunu, ag keeke hekkulagnu oolag hette amu, ag hekkulag,” awa aum.

⁶ Sedekaia anam aum amunu, danab amu ag muɗi aon, le moɗ laa daup king gumappig laulag haɗap-ppa dayom, le moɗ amuam king bekka Malkiyanu amu, ag muɗi amuppa Jeremaia paɗaeg no, le ii dayeye, lekkoh gai-iittaib dayom amunu, Jeremaia beɗu laih am lekkohppa noum.

⁷ Ag amu heeg, Jeremaia anam dayom, amge Ebetmelek, nug Kus danab, nug Juda dilag kingnu lag enanagnabppa king ehanitta, uɗat heum amu, nug ag Jeremaia le moɗppa meppig doya, king nug aabnu aɗ od onig Benyaminnu Od, nug amuppa heɗep na dayeye,

⁸ Ebetmelek nug kingnu lag enanagnab uua, dimittim uɗia, king dayomppa ukka, amegppa aum.

⁹ “O dahil naɗi, na king, danab ag propet Jeremaia, nuhigppa kobol digdig heppig amu, ag nau heppig. Ag nug aon, le moɗppa buɗieg noum daatte. Nug le moɗppa daatte amunu, aab okkai imuppa ee iitta meeb, nug aakku enugppa mauhkku,” awa aum.

¹⁰ Kus danab Ebetmelek nug anam a, king doya, nug haknunab nai ana, Ebetmelek amegppa aum. “Na danab 30 diippe, ag oh gona, propet Jeremaia mauhmanu, ag nug le moɗppanu eeɗppeg baɗ!” awa aum.

¹¹ King anam aum amunu, Ebetmelek nug danab laala diie gona, kingnu lag enanagnabppa oo laa, en maknu oo waappa dayom amu, ag amuppa wana, appan lamen alag laala, aria lamen nauhna autna aoppig laala ele aon, ag lamen amu oh aon gona, le moɗ Jeremaia dayom eleppa gona, lamen amu muɗippa paɗaeg noppig.

¹² Ag anam hena, Ebetmelek, nug Kus danab, nug Jeremaia amegppa aum. “Muɗi beɗun heeb nauhmanu, na lamen alag, amu lamen nauhna autna aoppig ele imu aon, eppen waappa dibittinppa mee!” awa aum. Ebetmelek nug anam a, Jeremaia nug anam he,

¹³ ag muɗippa nug eeɗeg ba, dimittim beum. Nug ba, dimittim uɗia, nug aakku daup king gumappig laulag haɗap-ppa dayom.

King Sedekaia nug baula Jeremaia Yawe oɗenu oɗ mettom

¹⁴ Aria, amu dimppa King Sedekaia nug he, danab laa ag gona, propet Jeremaia omalna, Yawenu mettid lagnu od ebqak ewamppa ukkaeg dayeye, king nug Jeremaia amegppa aum. “Da na keeke laanu oɗ medakkulnu hettem. Da anam oɗ medappi, na amunu nob laih nakok laa dahilnu aib lokkume!” awa aum.

¹⁵ Sedekaia nug Jeremaia amegppa anam a, Jeremaia nug nob ma aum. “Aakku, amge da nahip oɗmaknu nob medakkul dayeb amu, diig amunu na da iuppe, da iite mauhkkul? O da ulum nai medakkul dayeb, diig amunu na dim lamidkkutnu dabmak okkai ii aomna. Iitta. Na hamu bia doon ii dim lamidmana,” awa aum.

¹⁶ Jeremaia nug anam aum, amge King Sedekaia nug eɗua, aɗi hekkunu nuhig nai ɠagattag qetta, Jeremaia amegppa aum. “Iitta! Yawe, Nug ig oh bau megatte amu, Nug genab bau daatte, genab amubia da iikku attem. Da na ii nidappi mauhmana. Laa ag nidappeg mauhkkutnu hetteb ele amu, da ag eppelagppa ele ii meidpa,” awa aum. Sedekaia nug nai amu Jeremaiaib dookkunu aum. Danab laa ii doyom.

¹⁷ Sedekaia nug anam a, Jeremaia nug eɗua, amegppa aum. Yawe, Kayak Nukka Ɠagattag Oh Ele, Israel dilag Kayak, Nug inam atte. “Na gona, na nakka beɗun Babilon dilag kingnu daup ikki eppelagppa mekkut amu, ag nidappeg ii mauhmana. Ag aab okkai imu ele manappeg ii eoma. Na, amu na baenadppa ele ag bau daaglag

¹⁸ Amge na nakka, na beɗun Babilon dilag kingnu daup ikki eppelagppa ii mekkut dayeb, da heppi, Babilon dilag daup ag aab okkai imu eɗidna aon, ag eppelagppa dayebeb, ag maippeg eweb, na ele ag eppelagppa daakkut,” awa atte.

¹⁹ Jeremaia nug Sedekaia amegppa anam a, King Sedekaia nug eɗua nug amegppa aum. “Amge Juda laala ag akka ag gona, ag beɗulag Babilon eppelagppa meppig daatteb amu, Babilon ag da ag eppelagppa meiɗkkulag dayeb, ag da eheɗ heiɗkkulagnu baɗattem,” awa aum

²⁰ Sedekaia anam a, Jeremaia nob ma aum. “Iitta! Babilon ag Juda laa eppelagppa ii meidmana. Yawe Nug da oɗelppa na aɗi aɗi hekkutnu ippunidtte amu, na amu hekkut dayeb, na ena daakkut. Babilon ag heppeg, na ii mauhmana. Iitta.

²¹ Amge na nakka, na gona, na beɗun Babilon eppelagppa ii mekkut dayeb amu, Yawe Nug imu bekkunu ippuniɗom.

²² Na Juda dilag king, amu ah oh ag gemu nahip lag enanagnab, appa daatteb amu, Babilon dilag daup ag ag diin, Babilon dilag kingnu ehanittak anuqak danab eppelagppa maadppeg, ag Babilon eppelagppa daanna, ah amu ag na amenppa akkulag. ‘Laa na ahilagnu, “Da lailadnab, da ahilagnu oolppa genab doottem,” doome amu, amu oh ag ulum nai eheɗ mettanna, ag na eɗidna heeg, na ahilag nai dim lamidme amu, gemu na baen aɗit oh am lekkohppa qataqak daattep. Na anam daattem, amge na laipad amu oh ag na uuidna goppig, laa ehanidkkunu ii daatte,’ aon akkulag.

²³ Na nakka, na beɗun Babilon eppelagppa ii mekkut dayeb amu, nahipad ah oh, nahipad nid oh ele ag Babilon eppelagppa daaglag. Na ele, na ag eppelagppa daamnanu ib laa anidna, oolna laih ii gomana. Iitta. Babilon dilag king nug na aɗaitteb, na nug eppegppa daappe, Babilon dilag daup ag aab okkai imu manappeg eokku.” Jeremaia nug Sedekaia amegppa anam aum.

²⁴ Jeremaia nug anam a, Sedekaia nug amegppa aum. “Na appe, laa nug i attem attem mattimuɗ am aibnab doyom. Na appe, laala ag dooglag dayeb amu, ag heppeg, na mauhkkut bia.

²⁵ Am laa amu, dahilad ehanittak anuqak danab ag da na ele nai mattimuɗ doon, ag uɗin, na amenppa, ‘Na king amegppa ame, king nug na amenppa aum ele amu, na appe dootu! Na ii akkut dayeb amu, ig na nidapput mauhkkut,’ aon akkulag dayeb amu,

²⁶ na, ‘Da king nug heeb, da Jonatan laugppa eɗue ukken, appa mauhpan nug oo doyakppa unuqitten daami,’ appe doyeg!” awa aum

²⁷ Sedekaia nug Jeremaia amegppa anam a ukke, nuhikkud ehanittak anuqak danab ag nug aum bia uɗin, Jeremaia nug king ele aɗi aɗi nai madipiɗnu oɗ mettaeg, king nug Jeremaia aɗi akkununab aum amu, Jeremaia nug amuib ag amelagppa aum. Nug ag amelagppa aum, laa nug king Jeremaia ele aɗi madipiɗ am ii doyom amunu, ag baula nug amunu oɗ ii medappig.

²⁸ Anam aakku Jeremaia nug daup king gumappig laulag haɗap-ppa maniguittak daye ukke, deɗ Babilon ag Jerusalem eɗidna aoppig, deɗ amu batak.