Jeremaia 34 - Nobonob Baibel

Jeremaia nug Sedekaia nau aomanu dabmettak nai mettom

¹ Amu Babilon dilag king Nebukatnesar nug, nuhikkud daup, wan atu laala ag Nebukatnesar waappa daan, nug ehanidppig ele dilag daup oh ele ag Jerusalem ele ban henana, ag aab naunau Jerusalem talilittak daappig, amu dilagppa ele ban heppig, haen amuppa Yawe Nug Jeremaia nai laa imu mette doyom.

² “Da Yawe, da Israel dilag Kayak, da inam attem. ‘Jeremaia, na ahan, Juda dilag king Sedekaia toppa gona, na inam appe doyaɗ! Yawe Nug inam atte. “Da heppi, Babilon dilag king nug aab okkai imu eɗitteb, nug eppegppa dayeb, nug amoteb eokku.

³ Na genabnab genab king amu eppegppa daakkut. Na uug amu ii eɗidmana. Iitta. Babilon dilag kingnu daup ag na aɗaidna, aidna gona, nug eppegppa meidkkulag. Na Babilon dilag king amenppanab anidna, nug noobppa daappe, nug aɗi aɗi oɗ medakku amu, na nai amunu nob nug medakkut. Amu na Babilon gokkut,” ’ ” awe attem.

⁴ Anam, amge O Juda dilag king Sedekaia, Yawe Nug nahipnu atte amu, na nai nuhig amu doye! Nug nahipnu inam atte. “⌊Na nakka na Babilon dilag king eppegppa na beɗun mekkut amu,⌋ na qep elabppa ii mauhmana.

⁵ Na maɗoɗ ele mauhkkut. Amu anukka Juda danab ah ag na mamenad aɗi king daappig, ag mauhattegeg, binalag mattaglagnu ag ahilag kobolppa aab okkai ilappig, amubia na mauhppe, laa ag na binan mekkulagnu anam hekkulag. Ag amu henana, ag akkulag. ‘O dahil okkai, gadonnab gadon,’ aon akkulag. Aɗinu? Da Yawe, da anam aakku heppi bekkunu nai attem.” Yawe Nug Jeremaia, Sedekaia amegppa anam akkunu aum.

⁶ Yawe Nug anam he, propet Jeremaia nug nai amu oh awa ukka, Juda dilag king Sedekaia, Jerusalem dayom amu, nug amegppa aum.

⁷ Jeremaia nug nai amu Sedekaia amegppa aum, haen amuppa Babilon dilag king Nebukatnesar nug Jerusalem, amu Juda aab aɗit laa, aa ii neya qepiɗ ele, amuam Lakis, Aseka ele, nug aab ewam amuppa ele ban heum. Aab ɠagattag, aɗ ele Juda ooppa daappig amu, aab amu oolagppa aab ewam amu aakkuib ag ii nena qeppig; Nebukatnesar eppegppa ii daappig.

Jerusalem danab ah ag ahilkad begbeg maɗi nid uhuqadkkulagnu appig

⁸ Amu King Sedekaia nug he, Juda danab ah Jerusalem daappig ele ag anen anen ahilkad begbeg maɗi nid uhuqadppeg, ag ahilkad okkai waalagppa baula ii daamnanu nug tituana nai qakkak laa heppig. Ag amu heppig dimppa Yawe Nug Jeremaia nai laa mette doyom.

⁹ Nug tituana nai qakkak Jerusalem danab ah, Sedekaia ele heppig amu, nai amuppa ag ohnab anen anen ag ahilkad Hibru begbeg maɗi nid, danabtai o ahtai, ag amu oh uhuqadppeg, hamu daappeg, ag oolagppa laippu laa nug Hibru nug begbeg maɗi nid daakkunu ii hema. Ag nai amu qagappig.

¹⁰ Kingnu ehanittak anuqak danab oh, danab ah laa oh ag nug tituana nai qakkak amunu oolag dayom amunu, ag ahilkad begbeg maɗi nid maɗi ah ele uhuqadppeg, ag ag waalagppa tuɗidna ii daamnanu appig. Ag oh anamnu oolag daye, amu hekkulagnu appig amunu, ag ahilkad maɗi nid uhupadppig.

¹¹ Amge amu dimppa kingnu ehanittak anuqak danab, danab ah ele ag anukka heeg, laa ahilkad begbeg maɗi nid daappig, ag haen amuppa ahilkad begbeg maɗi nid ii daappig amu, gemu danab amu ag dabmak eɗun heeg, danab ah ahilkad begbeg maɗi nid tatam daappig, ag eɗun, ag waalagppa ahilkad begbeg maɗi nid daappig.

¹² Ag anam heeg, aria haen amuppa Yawe Nug nuhig nai imu Jeremaia mettom.

¹³ “Da, Yawe, da Israel dilag Kayak, da inam attem. ‘Anukka ag mamelkad aɗi ag Isip wanppa begbeg maɗi nid daan oiyegeg, da ag Isipnu diien, omalatti uɗippig, haen amuppa da hei, da ag ele ig nug tituanta nai qakkamut. Nug tituana nai qakkak amuppa da ami.

¹⁴ “Maɗ eblaih laippu ele ukkeb, maɗ eblaih aɗitppa Hibru danab, o Hibru ah auntai nug he, nug ag oolagppanu laa waappa nuhig maɗi nid daatte amu, ag anen anen ag danab ah amubia uhuqadppeg, ag ag waalkadppa, ahilkad maɗi nid tuɗidna aib daappig. Ag uhuqak dayeg! Danab o ah amubia ag maɗ eblaih laippu ele ahilkad maɗi nid daan, ahilag uɗat hekkulag, amge maɗ eblaih aɗitppa ag tuɗidna ahilkad maɗi nid ii daamna. Ag uhuqak aon, hamu daaglag, amu ag laa ag uhuqadkkulagoitte ami. Da anam ami, amge ag mamelkad aɗi ag da oɗel ii dooppig. Ag daulag human, nai doon, elele ii dabmedappig.

¹⁵ Tumaiib ag oolag eɗue, ag kobol laa dahil neekkakppa am kobol tutukku, ag amu dim lamidna heppig. Ag anen anen ag Hibru danab ah ahilkad maɗi nid daappig ele, ag ag uhuqatteg, ag aakku uhuqak aon, hamu daappig. Ag kobol ena amu heppig ele amu, ag hamu dabmenan, ii heppig. Iitta. Ag amu hekkulagnu lag laa, lag amuppa da onil daatte amu, ag lag amuppa ag amu hekkulagnu nug tituanna nai qagappig.

¹⁶ Amge gemu ag aakku dabmak eɗun heeg, laa ag da onil oppiaawak elenu hamu bia dootteb. Kobol ag heeg, laa ag da onilnu am keeke hamu bia dootteb amu, kobol amuam ag anen anen ag tatam begbeg maɗi nid, o begbeg maɗi ah ag uhuqatteg, uhuqak daan, ag adeppa adeppa gokkulagnu oolag dayom amu, ag aakku appa gokkulagnu elele daappig, amge ag tatam ahilkad begbeg maɗi nid uhuqadppig ele, ag ahilag dabmak eɗue heeg, danab o ah ag ahilkad begbeg maɗi nid daappig amu, ag eɗun, waalagppa, ahilag begbeg maɗi nid daatteb.” ’ ” Yawe Nug anam atte.

¹⁷ Nug anam atte amunu, Yawe Nug ele inam atte. “Ag dahil nai ii dim lamidppig. Ag laa, ag ag ele tiilag laippu, ahilkad maɗi nid daatteb amu, ag uhuqatteg, ag uhuqak aon, hamu ii daatteb. Iitta! Ag ag waalagppa ahilkad maɗi nid daatteb amunu, ag da dahil nai ii dim lamidppig ele, da ag uhuqak laa madakkulnu hettem. Uhuqak amuam ag qep elabppa mauhkkulag. Uhuqak amuam ag oɗe nau danab kuɗum aqe mauhtteb, ag amuppa mauhkkulag. Uhuqak amuam ag enugppa mauhkkulag. Amu da heppi, wan ohppa danab ah ag ahilagnu oolagppa uuaknab dooglag.

¹⁸ Ag nug tituana nai qakkak dahil tippalppig. Ag ahilkad maɗi nid uhuqadkkulagnu nug tituanna nai qagappig ele, ag nai amu okkulna, ii dim lamidppig. Ag nug tituana nai qakkak heppig, haen amuppa ag nai amu ɠagattag qettalagnu makau nag laa qeeg mauhe, gamagppa oppateg, maha aɗit daye, ag nug tituanna nai qagappig amu ag makau nag beɗu oppateg maha aɗit daapiɗ, ag beɗu laih aɗit amu gamalahppa tappan oippig. Ag amu heppig, amge ag nai amu aɗan oinna hekkulagnunab appig amu, ag ii heppig amunu, da ag makau nag beɗuppa heppig bia ahilagppa hekkul.

^19-20 Da heppi, Juda dilag ikki danab, laa Jerusalemnu, laa Juda wanppa laih laihnu, amu kingnu ehanittak anuqak danab, mana mettak danab, amu Juda danab oh ele ag makau nag beɗu oppatak, maha aɗit laih laih daaeh, ag gamagppa oippig ele amu, danab amu oh ag kekeɗ eppelagppa, kekeɗ ag aqappeg mauhkkulagnu hetteb amu, da ag eppelagppa maadkkul. Da heppi, ag kekeɗ eppelagppa daappeg, kekeɗ ag aqappeg mauhppeg, gaɗalkad ai hagagaɗna oitteb, doɗ dakkuɗ wanppa oitteb ele, ahilag ee daaglag.

²¹ Gemu Babilon dilag king nug Jerusalemnu aha, laih ukkom, amge nug eɗua uɗikku. Amu da heppi, laa ag Juda dilag king Sedekaia, nuhikkud ehanittak anuqak danab ele aqappeg mauhkkulagnu hetteb, amuam Babilon dilag king, nuhikkud daup ele, ag ag eppelagppa daaglag,

²² Da appi, Babilon dilag king, nuhikkud daup ele ag eɗun, aab okkai imuppa daanna, ban hekkulag. Ag aab imu eɗidna aon, ag manappeg eokku. Amu da heppi, Babilon dilag daup ag Judanu aab heppeg nauhattakib daappeg, danab ah laala ag amuppa daaglagnu elele iitta daaglag.” Yawe Nug anam awa atte.