Jeremaia 27 - Nobonob Baibel

Juda danab ah ag Babilon dilag king Nebukatnesar waappa maɗi nid daan, nuhig uɗat hekkulagnu nai

¹ Aria, Josaia bekka Sedekaia, Juda dilag king, nug king abenabppa ta dayeye, haen nakokib ukke, Yawe Nug Jeremaia nai laa mette doyom; am nai amuam inam.

² Yawe Nug da, Jeremaia, da amelppa inam aum. “Na ad maha laa, amu matagiɗ ɠagattag doɗ gaɗappa hak ele aon, doɗnu duugppan tuqai bappaidna, na duutppa qakke!

³ Aria gemu amu, danab laala ag Edomnu, Moapnu, Amonnu, Tairnu, amu Saidonnu ele ag ahilkad king ag Juda dilag king Sedekaia ele nai mattiglagnu maatteg Jerusalem uɗippig daan, amu hetteb ele amu, na amu gumadna gona, dahil nai ag eɗun aon gona, ahilkad king amelagppa nai amu akkulagnu ag eppelagppa mekkut.

⁴ Na ag ahilkad okkai amelagppa nai imu gona appeg dooglagnu amelagppa appe doyeg! ‘Yawe Nukka Ɠagattag Oh Ele, Israel dilag Kayak, Nug atte. “Ag ahilkad okkai amelagppa inam appeg doyeg!

⁵ Da Yawe, da ɠagattag okkai ele, amu da ɠagattag amuppa da wan imu, danab ah wanppa daatteb, doɗ wanppa daatteb ele oh hattami. Da amu oh hattami amunu, da aun nug keeke amunu okkai daakkunu ool hette amu, da keeke amu oh nug eppegppa mettem.

⁶ Aun nug okkai daakkunu am dahilppa daatte amunu, da ahilkad wan anen anen oh Babilon dilag king Nebukatnesar, dahil maɗi nid, da nug eppegppa meppi, ag nug waappa daaglag. Da amuib ii hepa. Iitta. Da ele heppi, doɗ dakkuɗ ele ag nug oɗe dim lamidkkulag,

⁷ Wanppan wan oh ag nug waappa maɗi nid daan, nuhig uɗat hekkulag; nug bekka, nuhignu ele anamib daanna; nug alag, nuhignu ele anamib daaglag. Aria, anam dayebeb ukkeb, Nebukatnesar alagnu haenppa Babilon bu awak haen beeb, wanppan wan anen anen kuɗum, ahilkad king ɠagattag ele ag ahan heppeg, Babilon ag waalagppa daaglag.

⁸ Anam, amge gemu wanppan wan laa, o ɗo maɗoɗ laa ag Babilon dilag king Nebukatnesar waappa maɗi nid daan, nuhig uɗat hekkulagnu uun, ag makau laa, doɗnu duugppan tuqai nug baagppa ii daamanu wagai ma hette bia hekkulag dayeb, da bu metten heppi, Nebukatnesar, nuhikkud daup ele ag wan amuppa gona, ban hena, Nebukatnesar, nuhikkud daup ele eppelagppa wan amuppan danab ah ag qep elabppa, enugppa, amu oɗe nau danab kuɗum aqe mauhttebppa ele mauhadppeppeg, wan amuam nauhakib daakku. Da anam awe attem.” ’ ” Yawe Nug anam awa atte.

⁹ Yawe Nug anam anana, Nug imu ele atte. “Da Yawe, da ag ahilkad okkai amelagppa akkulagnu imu ele attem. ‘Anam bekku amunu, ag ahilkad propet, ahilkad eman danab, danab ahilkad ag tul niiakppan meu heeg miag atitte, ahilkad mauhak ele gamag danab, amu ahilkad emaɗ hak danab ele dilag nai aib dabmeppig. Ag anen anen, ag amelagppa, “Na Babilon dilag king waappa maɗi nid ii daan, nuhig uɗat ii hemana,” aon atteb amge, ag ahilag nai amu aib dooppig; aib dabmeppig.

¹⁰ Aɗinu? Danab amu ag dimppa aɗi bekkunu nai hambuppuak aakku maditteb amunu, ag ahilag nai doon, dabmekkulag dayeb, uug naunab ahilagppa beeb, ag ahilkad wanppa baula eɗun ii daamna. Da heppi, ag wan laappa gona daanna, mauhkkulag.

¹¹ Anam, amge wan laappan danab ah ag Babilon king waappa maɗi nid daan, nuhig uɗat hekkulagnu, “Yo” akkulag dayeb, makau laa duugppan tuqai duugppa dayebeb, uɗat haknu uua ii hette bia, da heppi, wan amuppan danab ah ag ahilag wanppa daan, dad henan oiglag. Da Yawe, da anam awe attem.’ ” Yawe Nug anam awa atte.

¹² Yawe Nug da, Jeremaia, nug da amelppa anam a, da nai amu laihppan uɗiak danab amu amelagppa awoya, da Juda dilag king Sedekaia amegppa ele nai amuib ai doyom. Da nug amegppa inam ami. “Na Babilon dilag king, nuhikkud danab ele waalagppa maɗi nid daan, ahilag uɗat hekkut dayeb, makau laa doɗnu duugppan tuqai duugppa dayebeb, uɗat haknu uua ii hette bia hekkut, am na bau daakkut.

¹³ Na amu ii hekkut dayeb, na, amu nahipad danab ah ele ag qep elabppa, enugppa, oɗe nau danab kuɗum aqe mauhttebppa ele mauhkkulag. Yawe Nug wan attentai laa ag Babilon dilag king waappa maɗi nid ii daan, nuhig uɗat ii hekkulagnu hekkulag dayeb amu, ag anam mauhkkulagnu aum, amge aɗinu na, amu nahipad danab ah ele, ag anam mauhkkulag.

¹⁴ Nahipad propet laa ag na amenppa, ‘Na Babilon dilag king waappa maɗi nid daanna, nuhig uɗat ii hemana,’ atteb amu ag dimppa aɗi bekkunu nai hambuppuak aakku maditteb amunu, na ahilag nai aib doome; aib dabmeme!

¹⁵ Yawe Nug propet amu dilagnu inam atte. ‘Da ii maatti goppig. Ag da onil aon, ag dimppa aɗi bekkunu nai hambuppuak maditteb amunu, ⌊na ahilag nai dim lamidkkut dayeb amu⌋ da heppi, kekeɗ ag na omaidna, wan laappa gona meidppeg, na appa mauhkkut. Na, amu propet ag dimppa aɗi bekkunu nai hambuppuak maditteb ele, da heppi, ag oh anamib laih daan mauhkkulag,’ awa atte.” Da Sedekaia amegppa anam ami.

¹⁶ Da Sedekaia amegppa anam awoya, da mana mettak danab, danab ah laa oh ele amelagppa ami. “Yawe Nug inam atte. ‘Ag propet laa ag, “Haen elab iitta Yawe Nug heeb, Babilon dilag daup ag aɗi keeke Yawe laugppanu aon gona, Babilon wanppa meppig ele amu, laa ag keeke amu eɗun aon uɗilag,” atteb amu, ag mana mettak danab, danab ah laa oh ele, ag ahilag nai amu aib dooppig; aib dabmeppig. Aɗinu? Ag dimppa aɗi bekkunu nai hambuppuak aakku ag amelagppa maditteb.

¹⁷ Ahilag nai aib dooppig! Ag Babilon dilag king waappa maɗi nid daan, nuhig uɗat hekkulag dayeb amu, ag bau daaglag. Ag amu ii hekkulag dayeb, Babilon dilag daup ag heppeg, aab okkai imuam kinipan ameg okkai hume tak daakku, amge anam aib beum.

¹⁸ Propet amu ag genab Yawe oɗeppanu nai aoppig dayeb amu, ag Yawe Nukka Ɠagattag Oh Ele Nug heeb, Yawe laugppan keeke ena laala, daup ag akkan, Babilon wanppa ii goppig, gemu Yawe laugppa ippa ina daatte, daup ag eɗun uɗin, keeke amu, amu Juda dilag kingnu lag enanagnabppan keeke ena ele, amu Jerusalem ippanu keeke ena ele diin, Babilon ii gomananu Nug oo doyakppa unuqitteg!

^19-20 Ag anam unuqidkkulagnu diig am inam. Anukka Nebukatnesar nug uɗia, Yawe laugppan keeke laala diia ugakka, nug keeke laala uue daappig; amuam biidod okkai brasppa hak, tappiɗ naɗi okkai brasppa hak onig Yu, tappiɗ keeke me dayaknu balal laala brasppa hak, amu keeke laala ele. Haen amuppa nug keeke amu oh uue, Jerusalem ippa ina daatte. Haen amuppa Nebukatnesar nug Jehoiakim bekka Jehoiakin, Juda dilag king, nug Jerusalemnu awa ukka he, nug Babilon appa diia ukka laih me dayak danab dayom; gemu ele aakku daatte. Nebukatnesar nug Jehoiakinnu anam ha, nug Juda dilag anuqak danab, laa Jerusalemnu, laa Juda wanppa laih laihnu, nug amu dilagppa ele anamib aakku heum. Amu Yawe Nukka Ɠagattag Oh Ele Nug keeke Nebukatnesar awa, Babilon wanppa ii ukkom amu, Nug keeke amunu inam atte.

²¹ Ao, Yawe Nukka Ɠagattag Oh Ele, Israel dilag Kayak, Nug keeke ena laala Babilon dilag daup ag uueg, Yawe laugppa, Juda dilag kingnu lag enanagnabppa, amu Jerusalem ippa ele daatte amu, Nug keeke amunu inam atte.

²² “Babilon dilag daup ag keeke amu oh aon, Babilon gokkulag. Ag aon gona, maadppeg daappeg, haen laa dimppa, laa ag eɗun aon wan imuppa uɗiglagnu dabmekkul amu, haen amuppaib ag Babilon wanppa eɗun ii daamna. Haen amuppa da heppi, laa ag aon uɗin, keeke amu ag abennalagppa mekkulag,” awa atte.’ ”