Jeremaia 21 - Nobonob Baibel

Babilon dilag daup ag Jerusalem eɗadkkulag

¹ Sedekaia nug Juda dilag king dayeye, Yawe Nug Jeremaia nai laa mette doyom. Amu inam beum. Sedekaia nug king dayeye, Babilon heppeg, Juda nauhkkulagnu heegeg, Sedekaia nug Malkiya bekka Pasur amu Masea bekka Sepanaia, nug mana mettak danab amu, nug aa goya, Jeremaia keeke laanu oɗ mettaglahnu maate gopiɗ. Aa goya teya, aa Jeremaia amegppa apiɗ.

² “Babilon dilag king Nebukatnesar nug banenig uɗia, ban hette amunu, na Yawe amunu oɗ medakkutnu oɗ medattep. Anukka Yawe Nug haen laala nuhig ɠagattagppa kobol danab hekkunu elele iitta hatta, Nug ig Israel ehanikke, ena daamut. Amu na gemu Yawe anam ehanikkeb, Nebukatnesar nug ban hak uua, aha uuikka gokkutai, o iittatai, na Yawe amunu oɗ medappe, aɗi ab, appe doognihnu oɗ medattep,” aoya apiɗ.

³ Aa anam apiɗ, amge Jeremaia nug nob mata aum. “Aa eɗuya goya, Sedekaia amegppa inam apeɗ doyaɗ!

⁴ ‘Yawe, Israel dilag Kayak, Nug atte. “Ag Juda, ag gemu Babilon ele ban hetteb. Ag aab okkaippa daatteb. Babilon ag aab dimittim ag oo mattan aqadkkulagnu maadna daatteb. Ag Israel ag ban hekkulagnu lat, lat doɗo, ban haknu keeke laala ele eppelagppa daatteb, amge da heppi, ⌊Babilon dilag daup ag keeke amu ag eppelagppanu aɗualadna,⌋ ag amuppa ag Juda aqaglag. Amu da heppi, Babilon dilag daup ag aab okkai imu ooppa uɗiglag.

⁵ ⌊Juda, ag hipunin tuɗid ele henan daatteb amunu,⌋ da oo nauhak, oppoɗi bak huanak ele doyeye, da dakka, da ɠagattag dahil okkaippanab bu huanak madakkul.

⁶ Da heppi, danab, ah, doɗ ele aab okkai ooppa daatteb amu, ag oɗe naunab danab kuɗum aqe mauhtteb ele, ag oɗe amu aon mauhkkulag.” ’ Yawe Nug aa Sedekaia amegppa anam akkulah awa atte.

⁷ Yawe Nug anam atte, amge Nug Sedekaianu imu ele atte. ‘Da amu hewoya, da Juda dilag king Sedekaia, nuhikkud ehanittak anuqak danab, amu Juda danab ah ele aab okkai ooppa daan, oɗe nau danab kuɗum aqe mauhttebppa, qep elabppa, enugppa ele ii mauhkkulag amu, da amu oh diie, Babilon dilag king Nebukatnesar, nuhikkud daup ag aqappeg mauhkkulagnu hetteb ele amu, da amu eppelagppa maadkkul. Da amu heppi, Babilon dilag king nug ahilagnu oo gai-iitta doya oo matta ehanittak kobol nakok laa iinab ii hema. Iitta. Nug qep elabppa kuɗum aqadkku,’ awa atte.

⁸ Aria, nai laa amu, aa Jerusalem danab ah amelagppa inam apeɗ doyeg! ‘Yawe Nug ag amelagppa inam atte. “Antteg! Da gemu ib aɗit ippunadttem. Laa amu bau dayaknu ippu. Laa amu mauhak ippu.

⁹ Aun aɗi ag aab okkai ooppaib daaglagnu dabmenana, ag aab ooppa daanna, ag qep elabppa, enugppa, amu oɗe nau danab kuɗum aqe mauhtteb, amuppa ele mauhkkulag. Amge aun aɗi ag ahan, aab dimittim gona, akka akka ag Babilon dilag daup ag aab oo mattan, aqaglagnu maadna daatteb ele, ag akka ag beɗulag ag eppelagppa maadkkulag amu, ahilkad keeke padal mekku, amge ag ii mauhmana. Ag bau daaglag.

¹⁰ Da heppi, kekeɗ ag aab okkai imu heppeg nauhkku. Da ag Juda, da ag ehanadppi, ena ii daamna. Da amu hekkulnu dabmak aoi ɠagattag eppom daatte amunu, da uuppi, aab imuam Babilon dilag king eppegppa daakku. Nug eppegppa dayebeb, nug maneb eokku,” ’ awa atte.

¹¹ Aa Jerusalem danab ah amelagppa anam awoya, aa Juda dilag okkai, amuam king, nug baegppan ele amu, aa ag amelagppa nai imu apeɗ doyeg! ‘Ag Yawenu nai imu doyeg!

¹² Ge, ag Dawit buɗub, Yawe Nug ahilagnu inam atte. “Ag buttua haen oh ahan, nai doya mala hettoɗia epeɗia elele mettak kobol dim lamidnana, aun aɗi ag gai-iitta daan, danab ɠagattag eppelagppa daaeg, ag eheɗ hattana, ahilag keeke yab aotteb amu, ag danab amu, danab nau amu eppelagppanu eɗun diieg! Ag amu ii hekkulag dayeb, ag eheɗ hekkulag, diig amunu dahil oppoɗi bak, aab ewak, danab qauhkkunu elele iitta bia daakku,” ’ awa atte.

¹³ Yawe Nug anam anana, Nug ag amelagppa imu ele atte. ‘Ag Jerusalem daatteb, ag oolnu noak akka daugppa, men kuɗum daattebppa daatteb. Ag atteb. “Auntai nug eheɗ heigkkunu elele? Aun nug padal mak eɗitteb ena dayaknu aben ihinig imu bekkunu elele?” atteb. Ag anam atteb, amge da ahilag hak amunu eheɗ doyeye ool ii madattem.

¹⁴ Da ahilag hak naunu bu madakkulnu daatte amu, da bu anam madakkul. Da heppi, ag atuelag ewebeb, aɗi keeke ag taliliadna daatteb amu ewa malakku.’ Yawe Nug anam awa atte.” Jeremaia nug danab aɗit amu amelahppa anam aum.