Ikki Danab 3 - Nobonob Baibel

Danab ah Kanannu ii lamatteg daappig

¹ Yawe Nug Kanan wanppa danab huu anen anen, ahilag wan obatak laala eleppa daappig, Nug ag uuatte daappig amu, Nug ahilagppa Israel danab ag deɗ laa banelag gona, ban ii heppig ele, Nug ag ma anttak madakkunu heum.

² Amunu diig nakok laa am, Israel dilag danab ag ban nakok laa ii anidna dooppig ele amu, agib ag ban anidna dooglagnu ele Nug amu heum.

³ Amu Kanan wanppa danab huu anen anen, ahilag wan obatak laala eleppa daaegeg, Yawe uuatte daappig ele am iikku: Pilistia aab okkai tanig ele, ahilkad gumattak danab ele, amu Kanan danab, Saidon danab, Hiwi danab ele ag Lebanon wanppanu qaukoppa daappig. Ag wan amuppa qauko onig Balhermon ukka, Lebo Hamat batakppa daappig.

⁴ Yawe Nug ahilagppa heeb, Israel ag Yawenu haknunab anak, Nug Moses mette, ag mamelkad aɗi mattom amu, ag ɗo amu dim lamidkkulagte, o dim ii lamidkkulagte anidkkunu anam heum.

⁵ Yawe Nug Kanan danab amu uuatte, Israel danab ah amu, ag Kanan danab, Hit danab, Amo danab, Peres danab, Hiwi danab amu Jebus danab ele oolagppa aakku daappig.

⁶ Ag oolagppa anam daaegeg, ag ag ele ewau matulak heppig. Israel bekkalkad ag danab amu aɗelkad diiegeg, Israel aɗelkad ag danab amu bekkalkad diippig. Anam hena, Israel ag ahilag kayak hambuppuak waappa daan, ag oɗelag dim lamidppig.

Otniel nug Israel dilag epeɗiak danab ba dayom

⁷ Aakku Israel ag Yawenu neekkakppa eheɗ heppig. Ag Yawe, ahilag Kayak, ag Nug daulag atie, ag kayak hambuppuak Bal iɗu iɗu, Aserah iɗu iɗu ele waalagppa daan, oɗelag dim lamidppig.

⁸ Ag anam heeg, Yawe Nug Israel danab ah dilagnu oo huana nauhe, Nug ag diia, King Kusan Risataim eppegppa meum. Kusan Risataim nug am Aram Naharaim dilag king. Israel ag Kusan Risataim waappa maɗ eblaih ewam ele daappig.

⁹ Amge, Israel ag Yawe ehanadkkunu gaaeg, Yawe Nug danab laa ag ehanatta, Kusan Risataim eppegppan eɗua diikkunu qappom. Nug onig am Otniel, nug am Kalep amag Kenas bekka.

¹⁰ Amu Yawenu Ouɗi Otniel nuhigppa uɗia he, Otniel nug Israel dilag epeɗiak danab beum. Nug Aram dilag king Kusan Risataim ele ban hekkulahnu ukke, Yawe he, Otniel ban eɗittom.

¹¹ Amunu maɗoɗ dayak maɗ 40 wan amuppa daye ukke, Kenas bekka Otniel mauhom.

Ehud nug Israel dilag epeɗiak danab beum

¹² Otniel nug mauhe amu, Israel ag baula Yawenu neekkakppa eheɗ heppig amunu, Yawe Nug Israel danab ah Moap dilag king Eklon eppegppa me, nug Israel gumattom.

¹³ Amu bekkunu amu, Moap dilag king Eklon nug Amon dilag okkai, Amalek dilag okkai ele, ag nug ehanidkkulagnu oɗ matte, ag oolag laippu dayom amunu, Eklon, nuhikkud daup, ag ele ag aakku Israel banelag gona, ban hena, Jeriko aoppig.

¹⁴ Eklon nug anam he, Israel ag nug waappa maɗ 18 daappig. Eklon nug am Moap dilag king dayom.

¹⁵ Anam daye amu, Israel ag Yawe ag ehanadkkunu baula gaaegeg, Yawe Nug danab laa ag ehanatta, Moap eppelagppanu eɗua diikkunu qappom. Nug onig amu Ehud. Nug Gera bekka; nug am Israel dilag huu okkai laa Benyamin, amuppan danab. Ehud nug am naneh danab. Am Israel ag Ehud meeg, Moap dilag king Eklon toppa ahilag en takis bia medakkunu ukkom.

¹⁶ Ag nug uɗat amu mettaeg, Ehud nug qep nakok elab laa ha, aeg laih laih oh hoyom. Qep amu elab nuhig am 50 sentimita anam. Amu nug tuɗi laih naɗiap-ppa qakkom. Nug tuɗi laihppa qakkom amunu, lamen nuhig amu tonom.

¹⁷ Ehud nug anam ha, nug aakku en takis bia awa, Eklon gumitta ukka mettom. Am Moap dilag king Eklon nug am danab titiɗaknab.

¹⁸ Amu Ehud nug en takis bia awa, Eklon gumitta wana mettowa amu, nug laa ag en takis bia maoppig ele, ⌊nug ag ele oh ag eɗun, aabppa gokkulagnu a, ag aakku eɗun gonana, laih gona, Ehud he, laa⌋ ag aakku goppig.

¹⁹ Amge Ehud nug men dottolag hoyattak Gilgal appanu, nug eɗua ukkom. Nug ukka Eklon amegppa aum. “Da nai lokkumak laa nahipnu ele,” awa aum. Anam a amu, king nug nai laa paha ii mattimanu amegppa anana, nug maɗi nid nuhig ag lag oo amu uun, ahan laih gokkulagnu haknunab aum.

²⁰ Eklon nug oo laa attan nakok oug ele, amuppa dayom. Dayeye amu, Ehud nug guguitta wana aum. “Da nai laa nahipnu Kayak toppan iikku awe uɗimi!” awa aum. Nug anam aawo, King Eklon nug sia king nuhigppanu hibaittette,

²¹ amu Ehud nug eppeg naneh bahia, nug qep elab tuɗi naɗiap-ppan eeɗa awa, king biigppanab yom.

²² Ehud nug qep-ppa Eklon ye, qep noob hawaɗ amu beɗu atula noa ukka, qep gamagppa no, qep noob gomeppa tula do, oqaɗ amu king ittag ooppa noa dayom amunu, Ehud nug qep amu uue, king biig ooppa dayom.

²³ Ehud nug anam hewowa, lag oo amunu dimittim am oo laa veranda, amu nug lag oonab amu uua, verandappa ukka, nug oonabnu od lok qewowa ukkom.

²⁴ Ehud nug ukke amu, kingnu maɗi nid ag eɗun gona tena, od lag attannu amu manattak daaegeg anidppig. Anidna, ag appig. “King nug lag ooppa, oo unuqagppa, nug hippuɗttetai,” aon appig,

²⁵ amunu ag ameg mena daappig. Amge haen elabnab king nug ii tula do, ag oolag uug daye, ag ki laa aoppig. Ag ki aon, od matulna, amu appa ag ahilag okkai, gumunppa mauha niieye anidppig.

²⁶ Amu maɗi nid ag ameg mak daaegeg amu, Ehud nug oola ukka, men dottolag hoyadppig amu eɗitta ukka, Seira gokkunu ukka, appa teum.

²⁷ Haen nug ukka, Epraim wanppa, qauko qauko daattebppa ta amu, nug Israel danab ag oh qagmena, bannu gokkulagnu trampet iwalom. Nug trampet amu iwale, gumidna ukkaeg, nug Israel dilag bannu huu laa qauko nakok amuppanu omalatta noum.

²⁸ Nug haknunab aum. “Dim lamiɗeg! Yawe Nug ahilag kekeɗ Moap, eɗattom,” awa aum. Aakku ag nug dim lamidppig. Am Israel dilag daup amu ag Jodan leppa, le baag qak daattebppa wana, aɗualadna daappig amunu, laa ag mataɗna, appa gokkulagnu elele iitta daappig.

²⁹ Ag amu hena, ag banelag tena, Moap ban danab ɠagattag 10,000 anam aqappig. Laippu laa ii oola ukkom.

³⁰ Ag anam heppig amunu, Israel danab deɗ amuppa ag Moap danab eɗadna heeg, Moap ag waalagppa daaeg, maɗoɗ dayak, maɗ 80 wan amuppa dayom.

Samgar nug epeɗiak danab beum

³¹ Ehud dimugppa amu Samgar, nug am Anat bekka, nug Israel ehanatta, ahilag kekeɗ eppelagppan eɗua diiom. Nug Pilistia danab 600 ad laa noobppa aen ele danab ag amuppa makau okkai ebehi ele yaalatteg uɗat hetteb amu, nug ad amuppa ag aqom.