Hosea 2 - Nobonob Baibel

¹ Anam beeb, deɗ amuppa amu, ag Israel ag anen anen ag geha, ag Israel laa oh anen anen dilagnu, “Da awal,” o “Da amal,” o “Da apal,” o “Da appinal,” o “Da makkel,” anana, ag anen anen, “Da amu oh dilagnu da ool mauhtte,” akkulag.

Wau nug nau heum

² Amu Yawe Nug ⌊danab ah nuhikkud amelagppa Hosea, Gomer ele dilah oiyakppanu Nug, Israel ele dilagnu nai dottog laa⌋ mattia, inam aum. “Ag dahilad, ag anilag nug da waal dayom, amge gemu nug da waal ii daatte. Ao, da nug gamu daami, amge gemu da nug gamu ii daattem. Anam amunu, ag anilag ag daug bateg! Ge, ag daug bateg! Ag anilag nug am ah ewau pakkua gappai hette. Nug baubau amu hekkunu nug danab laa nug antteb, ameg qeeb, nug ele niiglahnu bala mette. Anam amge, ag anilag nug amubia hak uuaɗ! Ge, nug gamu uuitte, danab laa ele oittepnu hak am uuaɗ!

³ Am nug nau hak amu ii uukku dayeb amu, da geha nug bu naunab medakkul. Da heppi, nug bam iitta daakku. Ao, da heppi, nug anig ooppanu bam iitta doum bia daakku. Da heppi, nug atu taɗak bia daakku. Ge, da heppi, nug atu, le iitta, qaɗaietta auta autanab aotte, nug amubia daakku. Da heppi, nug le baag eheɗ diieb mauhkku.

⁴ Amu da geha danab nug wau danab laa ele oiyya, nid menuadttep, gamunab nug nuhikkudnab nid atognoadkku bia, nug wau, danab laa ele menuadpiɗ, nug nid amu nuhikudnab bia ii atognoadma, da amubia hekkul. Amunu diig am, nid naunau amu, ag am ewau pakkua gappai hakppa menuattak.

⁵ Ag anilag nug laa ele oiyya, ag menuattom; ag anilag nug nid amu uɗa nak nau guittak ele kobolppa nug oo noum. Ag anilag nug aum. ‘Da geha danab laala, da ahilagnu ool hette amu, da ag ele niignig. Da geha ag ele niitta, ag geha da ee, le ele, lamen sipsip uɗigppa hak, linenppa hak ele, olip goɗen, amu wain ele meɗaglag.’ Nug anam aum.

⁶ Anam amu, diig amu ohnu da heppi, nug ippu am, danab laa nug ib man laappa ad naunau qaun eleppa ib ataɗguittom daatte, nug ippu am amubia daakku. Ge, da gilil heppi, nug nuhig ib anidkkunu elele iitta daakku.

⁷ Geha da anam heppi, ag anilag nug danab nug ag ele niippig, nug ag ele baula niiglagnu dim dim lamadkku, amge nug ag aɗalatta diikkunu elele iitta daakku. Ao, nug danab nug ag ele niippig, nug ag ele baula niiglagnu mattialadkku, amge nug ag anadkkunu elele iitta. Da anam heppi, nug, ‘Da danab dahilnab ele amu, i gemu da daattem imu eɗittak enanag daamuɗ amunu, da eɗue, nuhigppa gokkul,’ akku.

⁸ Nug da, da nug keeke oh mettami amu, nug amu dab-ii-meum, gemu ele dab-ii-mette. Da nug ee, wain bau, amu olip goɗen ele mettami. Gol, silwa huanak ele da mettai, nug kayak hambuppuak Bal noobppa dup noa binag mekkunu ukka, appa uɗat mettom. Keeke amu oh da nug mettami amu, nug da mettami dab-ii-mette.

⁹ Amunu gemu da ee aeg dahil, hanhan oɗuak haenppa nug mettami amu, da eɗue aɗadppi, nug ii aoma. Ao, da wain bau dahil, grep meu awak haenppa hetteb hanhan mettami amu, da amu ele eɗue aɗadppi, nug ii aoma. Ge, da geha linen lamen dahil, lamen sipsip uɗigppa hak dahil ele, nug bam iitta daamanu tagakkunu hanhan mettami amu, da amu ele eɗue aɗadppi, nug ii aoma.

¹⁰ Amu da heppi, ag anilagnu gappai heeb baknu kobol heum amu, danab oh ag nug ele niippig, ag amu miag atiak anidna ⌊ameg iɗuak dooppeppeg, danab laa oh ele, ag ele anamib dooglag⌋. Da anam heppi, danab auntai laa ag nug ehanidkkunu laa ii daama.

¹¹ Da geha heppi, nug qagmak gamag ahak ele laa ii hema; amuam maɗ anen anennu qagmak gamag ahak ele oh, kalam baunu qagmak gamag ahak ele, Sabat deɗnu ele. Amu oh am hobul dayaknu haen epeɗiak aakku. Ao, geha nug hobul oh, da nug hekkunu tituanmi amu, da heppi, nug ii hema.

¹² Nug laa ag nug ele niippig, ag nug nob mettanna, grep dad, ad fignu dad ele medappignu aum, amu diig amunu da geha nuhig grep dad, ad fignu dad ele heppi nauhkkulag. Ao, da geha heppi, muɗi qaun ele huananab teguadkkulag, doɗ dakkuɗ aakkuib ag meulkad lakkulag.

¹³ Geha da nug bu medakkul. Nug kalu danab ile muttuɗig enanag bette ele, nug kayak hambuppuak Bal iɗu iɗu dilagnu ile muttuɗig oum. Nug eppeg doɗoppan ring maatta, beɗunu bala laala ele maatta he, nug danab ele niippig, nug ag ele baula niiglagnu mattialatta heum, amge nug dahilnu daug atiom amunu, da nug bu medakkul.” Yawe anam mattia aum.

¹⁴ Yawe Nug anam mattia, Nug tuɗitta aum. “Anam amge, da geha kobol enappa nug eɗue aokkul. Geha da nug omale ukken, atu taɗakppa nai bodoettakppa, elelenab nug amegppa nai madikkul.

¹⁵ Geha da eɗue, nuhig grep dad medakkul. Yo, da heppi, Akornu oolnu noak am ena bekkunu dabmak aɗa oiyaknu od daakku. Da amu heppi, appa nug ah bau daya, ahi ettom bia ahi edakku; nug anukka Isipnu aha uɗia, ahi ettom bia hekku.

¹⁶ Amu deɗ laa uɗieb, nug geha dahilnu, ‘Gumitta danab uɗat ɠagattag meɗatte,’ anak uua, nug dahilnu, ‘Da gamul’, akku.

¹⁷ Da heppi, geha nug kayak hambuppuak Bal iɗu iɗunu daug atikku. Ao, geha nug ag onilag diiak baula ii hema.” Yawe anam awa aum.

¹⁸ Amu Yawe Nug atte. “Haen amuppa amu, da geha doɗ dakkuɗ, ai, amu doɗ laa ag oolag wan qeeqe oitteb ele amu, da doɗ amu oh ele ag dahilad danab ah eheɗ ii hattamananu nug tituanta nai qakkagnig. Geha da heppi, dahilad danab ah ag wanelagppa qep elab, lat, amu ban hak ele ii anidmana. Da heppi, ag baɗak iittappa daan, tuqan niiak abenppa niiglag.

¹⁹ Da geha heppi, ag Israel, ag dahilad danab ah, da waal ⌊bia⌋, hanhan daaglag. Ge, da anam hein, da genab tutukku hak kobol, nai doya mala hettoɗia epeɗia elele mettak kobol, oo mauhaknab kobol, oo bodoetta le mak kobol,

²⁰ amu oo metta ii uuak kobol ele dim lamatten atognoadppi, ag dahilad daanna, ag dahilnu, ‘Nug am Yawe,’ dooiɗkkulag,” awa atte.

²¹ Amu Yawe Nug atte. “Deɗ amuppa, geha da heppi, gu neebeb, wan bauɗkku.

²² Anam amu, wan nug ee, grep meu, amu olip ad ele heeb, meu okkulag. Meu obeppeg, danab ah dahilad ag eenu elelenab daaglag.

²³ Geha da dahilad danab ah ag ahilag wanppa dahilnu bappalatten maadkkul. Geha da laa da amelagppa, ‘Da ahilagnu oo bodoetta le mak kobol ii dim lamidpa,’ ami amu, da ahilagnu oo bodoetta le mak kobol hein ippuanattette, laa da ag amelagppa ‘Ag am danab ah dahilad iitta,’ ami amu, da ag amelagppa, ‘Ag am dahilad danab ah,’ appi, ag da amelppa dahilnu, ‘Na am ihinig Kayak,’ akkulag.” Kayak Nug anam aakku atte.