Hibru 1 - Nobonob Baibel

Kayak Nug Bekka oɗeppa nai aum

¹ Kayak Nug anukka ig mamenkad amelagppa nai haen kuɗum ib laalappa ele propet oɗelagppa aum,

² amge Nug gemu, gog tak haen imuppa amu, Nug Bekka oɗeppa ig amenigppa nai mattiom. Kayak Nug Bekka Nug aug daakkunu Nug keeke oh aokkunu aum, amu nuhigppa Nug keeke oh ele hattom.

³ Aam lettod ye, amahlak amia ukke, danab ah anidtteb, amubia Kayak Bekka Nug Kayak binag amahlak oppiaawak ele he, danab ah anidtteb, amu Nug Mameg daatte, amubianab daatte. Nug keeke oh nuhig naippa ɠagattag aqadtte. Nug nuhig mauhakppa Nug danab dilag hipunin uhuqa mattaknu ib ooɗom. Nug ib amu ooɗowa, Nug eɗua hab aabppa ta, Nug Kayak, Nug dagom onig ɠagattag ele, Nug Nug eppeg naɗiap-ppa daatte.

Kayak Bekka Nug engel eɗattak

⁴ Engel ag am onilag ele, amu Jesus ele onig ele, amge Nug onig amu engel onilag huana eɗidtte, amubia Jesus Nug engel eɗadtte.

⁵ Kayak Nug engel dilag inam iinab aum. “Na am da Bekkal, gemu da na Mamen bemi daattem.” Iitta. Laa amu Kayak Nug engel laippu laa nuhignu, “Da nug Mameg daakkul; nug da Bekkal daakku,” ii aum amunu, ig nai amuppa Jesus Nug engel eɗadtte anidttem.

⁶ Laa ele amu Kayak Nug Bekka naanaeg wanppa meeb uɗikkunu haaha, Nug inam ele aum. “Kayaknu engel oh ag Nug noobppa dup nona binag meig!” awa aum.

⁷ Kayak Nug engel dilag madikkunu ha, Nug inam aum. “Nug he, engel ag ulah bia daatteb. Ao, Nug he, nuhikkud maɗi nid ag amemɗi bia daatteb.”

⁸ Amge Kayak Nug Bekka amegppa inam aum. “O Kayak, ɗo maɗoɗ na kalame ele am hanhan daakku. Ao, nahip ɗo maɗoɗppa amu, genab tutukku hak kobol am anuqak daakku.

⁹ Na genab tutukku hak kobolnu oot mauhom, gemu ele oot mauhtte, kobol naunu amu, na nau ninig ele doome, gemu ele na anam doottem. Anam amunu, ⌊O king,⌋ Kayak, Nug am nahip Kayak, Nug goɗen gokkaɗakppa tituanitta, maɗoɗppan gamag ahak okkainab, king laa oh eɗattak, na mettom.”

¹⁰ Kayak Nug baula ele Nug Bekka amegppa inam aum. “O Naɗi, keeke oh digmak haenppa, na wan heme. Ao, na eppenppa hab ele heme.

¹¹ Na hatame, amge aa iitta mekkulah. Aa am iitta mekkulah, amge na hanhan daakkutib. Aa geha lamen alag mette bia, alag meya, iitta mekkulah.

¹² Geha na danab lamen elab mapitteb bia hatakkut. Amu geha na danab lamen baolin, laa metteb bia hatakkut, amge na amu, na ii baolittem. Ele amu, nahip dayak am ii iitta mette.”

¹³ Kayak Nug Bekka amegppa anam aum, amge Nug anukka engel nuhig laa amegppa inam laa iinab aum. “Na da eppel naɗiap-ppa daappe ukkeb, da nahip kekeɗ na waatppa maadkkul.” Iitta! Nug Jesus amegppa aakkuib amu aum.

¹⁴ Nug engel laa amegppa anam ii aum. Iitta! Engel ag am ouɗi, ag am Kayaknu uɗat hetteb. Kayak Nug ag gona, danab ⌊ag Jesusnu oolagppa genab dooppig amunu,⌋ ag Padal ii maknu ehanittak aoglagnu daatteb ehanadkkulagnu maatte gotteb.