Genesis 33 - Nobonob Baibel

Jakop, Esau ele aa ibppa nug humidya hepiɗ

¹ Jakop nug autaut ugakka, nug ameg huma, Esau, nuhikkud danab 400 ele uɗiegeg anattom. Anatta, nug nid nuhikkud oh otiatta, Lea, Rahel, amu nug wauuɗ amge wauuɗnab iitta aɗit, ag mattom.

² Mattowa amu, nug wauuɗ amge wauuɗnab iitta aɗit, amu nid ahilti ele anuqakppa maattowa, nug Lea, nuhikkud nid ele ag dimulagppa maatta, nug Rahel, nug bekka Josep ele amu dimnab, ag oh dimulagppa maatom.

³ Maattowa, Jakop nukka anuqa ugakka, haen eblaih aɗit gateg qaun o, gomela, iɗu wanppa mak haaha, awag guguitta waum.

⁴ Jakop anam he amu, Esau nug qaiqaɗ gumitta uɗia oɗokkia, ootuqitte, aa oh gaapiɗ.

⁵ Anam gayoya, Esau nug ameg huma, nid naunau, anilkad ele anatta, oɗ meum. “Umu am aun aɗi?” oɗ meum. Oɗ me amu, Jakop nug aum. “Nid naunau umu, Kayak Nug nahip maɗi nid da, Nug dahilnu oo bodoette enanag maɗoɗ ele ha, da meɗom,” awa aum.

⁶ Awa a amu, Jakop wauuɗ amge wauuɗnab iitta aɗit, aa, ahilti nid naunau ele wana, Esau noobppa gomelna autna aoppig.

⁷ Gomelna autna aoeg amu, Lea, nug nuhikkud nid ele, ag ele wana, Esau noobppa gomelna autna aoppig. Aria, dim amu Josep, nug anig Rahel ele waya Esau noobppa gomelya autya aopiɗ.

⁸ Anam heeg, Esau nug aum. “Da doɗ ameg laala ibppa anadmi amu, aɗinu?” awa aum. A amu, Jakop oɗeppa awa aum. “O naɗi dahil, na oot dahilnu ena daakkunu mei, aon goppig,” awa aum.

⁹ Nug anam aum, amge Esau nug aum. “O aman, da keeke oh elele amunu, na keeke amu oh nahipnu aɗe!” awa aum.

¹⁰ Awa a amu, Jakop nug aum. “Iitta. Na oot dahilnu ena daatte dayeb amu, keeke da mettami am diikkutnu ool naɗi daatte. Aɗinu? Da Kayak iɗu anidlom amu, da ool okkai gamag ahalo. Amu na ena humiɗme amunu, da na iɗun anidttem, am da Kayak anidlom bia doottem.

¹¹ Da na keeke imu aokkutnu ool daatte. Aɗinu? Kayak Nug dahilnu oo bodoette enanag maɗoɗ ele ha, dahil keeke oh da meɗe, da elele daattem,” awa aum. Anam anana, nug wagai ma he, Esau nug keeke amu diiom.

¹² Aakku Esau nug aum. “Ahappeg omaladppi gotu!” awa aum.

¹³ Awa a amu, Jakop nug aum. “O naɗi dahil, na doottem. Nid naunau dahilad ag ɠagattagnab iitta, amu ele, da sipsip, makau ele ag nalkad yuɗ ele huh latteb amunu, da dabmatte aute aokkuloitte. Ig deɗ laippuib doɗ huanak lamadpput amu, doɗ amu oh ag mauhkkulag.

¹⁴ Anam aakku amunu, na, dahil naɗi, na anuqna gobeppe, da, nahip maɗi nid, da nid naunau, doɗ ele omaladppi, qinonob gota, na Seir appa anidkkunig,” awa aum.

¹⁵ Jakop anam a amu, Esau nug aum. “Akku amunu, da dahilad danab laa na medappi, na ele daanna, na omaidna gokkulagnu ool daatte,” awa aum. A amu, Jakop aum. “Na, dahil okkai, na oot dahilnu ena daakkunu ippuniɗme, am aakku elele,” awa aum.

¹⁶ Aa anam apiɗ amu, deɗ amuppaib Esau nug eɗua Seir gokkunu ukkom.

¹⁷ Ukke amu, Jakop aha, Sukot ukkom. Ukka, nug laug, amu doɗ dilag lag naunau ele appa hattom. Diig amunu aben amu onig Sukot appig.

¹⁸ Amu Jakop nug Mesopatemianu aha, Kanan wanppa Sekem enaib uɗiowa, nug aab okkai amu nakok guguittak haen tutu dayaknu aab kala dayom.

¹⁹ Nug kala daya, nug Sekem mameg Hamor, nug danab amu baekkudppanu wan nug haen tutu dayaknu aab kala dayom, nug wan amu ahilagppanu daden meum. Wan amu, nuhig nob am silwa maha 100.

²⁰ Wan amuppa nug qaɗab qa, onig El Elohe Israel ataɗom.