Genesis 29 - Nobonob Baibel

Jakop, Rahel anttom

¹ Aria, Jakop ukka ukka, nug danab ah wan laa aam bedeppa daatte, ag appa daatteb ele amu, nug wan amuppa ta,

² nug neekke ukke, gikkiɗah dad okkaippa le moɗ, men okkai tonak dayeye, amu sipsip ameg ewam ele, ag le moɗ amu guguittak niiegeg anattom. Sipsip gumak danab ag haen oh le moɗ amuppa le itaeg, sipsip ladappig amunu, ag gukkuidna niippig.

³ Sipsip gumak danab ag sipsip oh diin uɗin qagmeeg amu, ag men okkai le moɗ oɗeppanu buɗibɗib metteg ukke, le madattappig. Mattona, ag men eɗun buɗibɗib metteg ukke, le moɗ ameg tonattom.

⁴ Jakop nug ta, nug sipsip gumak danab oɗ mattom. “O lailad, ag adeppanu?” awa oɗ mattom. Oɗ matte amu, ag appig. “Ig am Harannu,” aon appig.

⁵ Ag anam aeg amu, Jakop nug baula oɗ mattom. “Ag Nahor alag Laban doottebte?” oɗ mattom. Oɗ matte amu, ag appig. “Ge, ig nug doottem,” aon appig.

⁶ Ag anam aeg, Jakop nug aum. “Laban ena daattete?” oɗ mattom. Oɗ matte amu, ag appig. “Ao, ena daatte, amu nug aɗeg Rahel am uukku, sipsip nuhig diia uɗitte,” aon appig.

⁷ Ag anam aeg, Jakop nug aum. “Antteg, aam ii noum, amu attemun? Aɗinu ag sipsip ahilag le paha ii madappig? Geha imu amu, sipsip aɗ ooppa maattak haen iitta. Le madappeg lappeg, diippeg gona, gikkiɗah laig!” awa aum.

⁸ Nug anam a amu, ag appig. “Iitta. Ig anam ii hettem. Sipsip oh qagmak daappeg, men le moɗ oɗeppanu buɗibɗib metta ukkak dayebeb, le mattagnig,” aon appig.

⁹ Ag nai anam mattiegeg amu, Rahel nug mamegnu sipsip diia uɗiom. Aɗinu? Nug haen oh sipsip amu gumadttom.

¹⁰ Haen Jakop nug Rahel antta, Labannu sipsip ele anatta amu, nug nukka ukka men le moɗppanu buɗibɗib mette ukke, nug awignu sipsip le mattom. Jakop anig Rebeka, nug Laban appinag. Laban aɗeg am Rahel.

¹¹ Jakop nug sipsip le matta mala amu, nug Rahel ootuqittowa, nug gayom.

¹² Gaya mala, nug Rahel amegppa aum. “Da am na ele tiinih laippu, da anil amu Rebeka,” awa aum. Nug anam aum amunu, Rahel nug qaiqaɗ ukka, mameg Laban amegppa aum.

¹³ Laban nug Rahel Jakopnu mattie doya, nug aha, le moɗppa qaiqaɗ gumitta ukka, Jakop aɗa, ootuqitta, omala nug laugppa ukkom. Aa goya lakka daayya, Jakop nug keeke amu ohnu awig Laban amegppa mattia male amu,

¹⁴ Laban nug aum. “Genab, na da ele i tiinih laippu,” awa aum. Aria, Jakop nug Laban ele daapiɗ.

Jakop nug Lea, Rahel ele diiatom

¹⁵ Amu Jakop nug Laban laugppa kalam laippu daye, dimppa Laban nug aum. “Genab na da ele, i tiinih laippu, amge diig amunu na uɗat dahil hamute hekkut? Iitta. Na nob aɗi aokkutnu oot heeb appe dookkul,” awa aum.

¹⁶ Amu Laban nug aɗekuɗ aɗit ele, tatamnu onig am Lea, gehanu am Rahel.

¹⁷ Lea nug ameg am neekkak ena, amge Rahel nug ah enanag, iɗu tuqak ele.

¹⁸ Aria, Jakop nug Rahelnu oo mauhom amunu, nug Laban uɗat nobnu amegppa inam aum. “Da maɗ eblaih aɗit ele uɗat nahip heppi, na aɗen gehanu Rahel meɗakkut,” awa aum.

¹⁹ Jakop anam a amu, Laban nug oɗeppa awa aum. “Da nug danab laa medakkulnu elele, amge na medakkul am ena amunu, na dahil uɗat hekkut,” awa aum.

²⁰ Anam a, Jakop nug maɗ eblaih aɗit ele Rahel aokkunu uɗat heum. Nug Rahelnu oo mauhom amunu, maɗ eblaih aɗit ele amunu amu, nug deɗ laippu laippu bia doyom.

²¹ Jakop uɗat anam he ukke, haen male amu, Jakop nug Laban amegppa aum. “Haen dahil malom amunu, na aɗen Rahel ah dahil daakkunu meɗappe oignih,” awa aum.

²² Jakop anam aum amunu, Laban nug ah awak hobul okkai ha, aben amuppanu danab ah oh onilagppa e uɗieg, ee matte lappig.

²³ Anam amge, gatatu ne, Laban nug Rahel baolia, Lea Jakop mette, Jakop nug Lea ele niipiɗ.

²⁴ Laban nug maɗi ah onig Silpa, Lea nuhig maɗi ah daakkunu mettom.

²⁵ Aria, wagɗe buttua amu, Jakop nug Lea iɗu antta, nug Laban amegppa aum. “Na aɗinu kobol imu heme? Da Rahel aokkulnu uɗat nahip hemi. Aɗinu na hambuppuiɗme?” awa oɗ mettom.

²⁶ Jakop anam oɗ mette amu, Laban nug oɗeppa awa aum. “Iitta. Ihinig ɗo amu inam daatte. Ah tatamnu nug danab awe, aria ah gehanu nug dimppa danab aotte.

²⁷ Daappe, ah awak hobul mettid laippu daatte. Hobul maleb amu, na Rahel ele aokkut. Aowona amu, na maɗ eblaih aɗit baula ele nuhignu uɗat hekkut,” awa aum.

²⁸ Laban anam a amu, Jakop nug nai amu dim lamittom. Leanu hobul male, Laban nug aɗeg Rahel Jakop mette, nug awom.

²⁹ Laban nug maɗi ah onig Bilha, Rahel nuhig maɗi ah daakkunu mettom.

³⁰ Aria, Jakop, Rahel ele oiyya, Jakop nug Rahelnu oo mauhom, amge Leanu amu, nug oo anam ii mauhom. Anam oinna, nug ah nuhig Rahelnu uɗat baula maɗ eblaih aɗit heum.

Jakop bekkod

³¹ Aria, Yawe Nug Jakop Rahelnu oo huanak mauhom, amge Leanu oo anam ii mauhom amu, Nug amu anttom. Nug anttom amunu, Nug he, Lea nug nid aokkunu elele dayom, amge Rahel nug am ah mattoi.

³² Yawe Nug anam he, Lea nug oo ele oiyaya, nug nid danab menua, nug aum. “Yawe dahil uug nau antta ehaniɗom amunu, da gamul nug dahilnu oo mauhkku,” awa aum. Nug anam aum amunu, nug nid onig Ruben ataɗom.

³³ Dimppa Jakop, Lea ele aa oiyya, Lea nug baula oo ele daya oiyaya, nug nid danab baula menua, nug aum. “Yawe Nug da gamul dahilnu oo ii mauhtte anttom amunu, nug nid danab imu ele meɗom,” awa aum. Anam ana amu, nug nid onig Simeon ataɗom.

³⁴ Aria, Jakop, Lea ele baula oiyya, Lea nug oo ele daya, nid danab menua, nug aum. “Da nid danab ewam gamulnu menuadmi amunu, nug genab gemu dahilnu oo huanak mauhkku,” awa aum. Anam anana, nug nid onig Lewi ataɗom.

³⁵ Jakop, Lea ele baula oiyya amu, nug oo ele daya, nug nid danab menua, nug aum. “Haen imuppa da Yawe menuak imunu onig humakkul,” amunu nug nid onig Juda ataɗom. Aria, nug haen amu dimppa, ⌊haen imuag amuppa⌋ nug nid baula ii menuom.