Esta 9 - Nobonob Baibel

Juda ag kekeɗ eɗadppig

¹ Kingnu ɗo nai wan aben aben ohppa ukkom amunu, kalam 12, kalam amu onig am Adar, kalam amuppa, deɗ 13ppa, danab ah ag king nug ɗo meum, ag amu dim lamidkkulagnu daappig. Deɗ amuppa Juda dilag kekeɗ ag hadappeg nauhkkulagnu maidppig, amge gemu amu, Juda ag eɗun aon, danab ahilagnu nau ninig ele dooppig amu, ag ag eɗadppig.

² Aakku Juda ag king wan gumadttom ele amu ohppa, aun laa ag hadappeg nauhkkulagnu heppig ele, ag amu hemananu ag aab okkai ahilkad ooppa qagmena, banelag daappig. Amge danab ah oh ag Juda dilagnu baɗappig amunu, aun aɗi ag hadappeg nauhkkulagnu dabmeppig ele amu, ag oolagppa laa anam hekkunu am ɠagattag elele iitta.

³ Amu prowinsnu anuqak danab, gumak danab anuqaknab, prowinsnu gawana, amu kingnu ehanittak anuqak danab ele, ag oh Juda ehanadppig. Ag anam heppignu diig amu, ag Mordekainu baɗappig.

⁴ Am king nug Mordekai awa me, gumak uɗat aben attannabppa ta daye, nuhig hak, nai amunu wan maha ohppa ugekke, nug binag awe, ɠagattag okkai ele naɗi meeme, nai amu ele ukkom ⌊amunu, okkai danab laa ag nuhignu baɗappig⌋.

⁵ Aria, deɗ ag amu hekkulagnu tituanak dayom amu, Juda ag deɗ meppig, amuppa danab ag aqaglagnu heppig ele amu, Juda ag ag aqappig. Ag qep elabppa aqappig. Ag ahilkad kekeɗ oh aqappig. Ag danab ag ahilagnu nau ninig ele dooppig amu, ag amu dilagppa ag attem hattaglagnu maidppig amu, ag anam aakku heppig.

⁶ Ag aab okkai Susa ooppa aben aɗ ɠagattagnab ele, amuppa ag danab 500 aqappig.

⁷ Amu ag Pasandata, Dalpon, Aspata,

⁸ Porata, Adalia, Aridata,

⁹ Parmasta, Arisai, Aridai, amu Waisata ele aqappig.

¹⁰ Danab amu ag am Haman bekkod 10 aakku. Haman nug am Hamedata bekka. Nug Juda dilag kekeɗ dayom. Juda ag danab aun aɗi ag ahilagnu kekeɗ daanna, aqaglagnu heppig amu, ag danab amu aqappig, amge ahilkad keeke amu ii aoppig.

¹¹ Aria, tueb amuppa, laa ag king amegppa, Juda ag danab ah gane aab okkai Susa ooppa aben aɗ ɠagattagnab ele appa aqappig, ag amunu mattieg doyom.

¹² Doya, nug Kuin Esta onigppa e uɗie, amegppa aum. “Juda ag aab okkai Susa ooppa aben aɗ ɠagattagnab ele ippa aakkuib danab 500 aqanna, ag Haman bekkod 10 ele aqappig. Ag anam ippa heppig dayeb amu, prowins laala ooppa amu, ag attem heeg beum? Amge gemu amu, na aɗinu oot hette, na gemu da amelppa appe doyei! Da geha na medakkul. Na aɗi oɗ meɗakkutnu dabmettem? Da na medakkulib,” awa aum.

¹³ King nug anam a amu, Esta nug aum. “O king na imunu ootppa ena dookkut dayeb amu, Juda Susa daatteb amu, ag butti baula gemu heppig bia hekkulagnu elele appe, ag heppig bia hekkulagnu ool daatte. Laa amu, na heppe, ag Haman bekkod 10 ele ag gaɗalkad danab balal attan aihaknu balalppa aihadna daaglagnu ool daatte,” awa aum.

¹⁴ Esta nug anam oɗ me, king nug ele anam haknu oo daye, amu ag ɗo nai amu Susa appa aeg dooppig. Amu ag Haman bekkod 10 ele diin, danab aihaknu balal attan maadna, aihadppig.

¹⁵ Anam daye amu Juda Susa daatteb ele ag kalam Adarnu deɗ 14ppa, ag qagmena, danab 300 baula aqadppig. Ag aqadppig, amge ag danab ah aqappig ele, ahilkad keeke amu laa ii aoppig.

¹⁶ Amge deɗ amu ii bak, kingnu prowins ohppa Juda laa oh ag ban hekkulagnu, kekeɗ ag ag aqamnanu qagmeppig. Ag kekeɗ ahilkad oh eɗadppig. Ag danab 75,000 oh aun aɗi ahilagnu nau ninig ele dooppig amu oh aqappig. Amge ag ahilkad keeke laa ii aoppig.

¹⁷ Ag kobol amu kalam Adarnu deɗ 13ppa prowins ohppa hewona, deɗ 14ppa amu, ag hik aoppig. Ag hobul naɗi henana, gamag ahak dooppig.

¹⁸ Amge Susa appanu Juda ag deɗ 13ppa banelag daan hena, ag deɗ 14ppa ele tuɗid, kekeɗ aqaeg ukke, ag deɗ amu dimugppa, deɗ 15ppa ag hik aon, hobul naɗi henana, gamag ahak dooppig.

¹⁹ Diig amunu Juda aab naunauppa daatteb, ag kalam Adarnu deɗ 14, ag deɗ amuppa gamag ahak doon, ee lanak hobul naɗi henana, ag ee laanu daakkunu hamu mettak hetteb.

Israel ag Haman Eppegppa ii Nauhppignu Hobul dayak haen

²⁰ Mordekai nug keeke amu ohnu ya, nug uɗug amu oh Juda ag King Ekserksisnu prowins ohppa, gukkuittak, amu uma uma daappig ele, am amu oh dilagppa panie ukkom.

²¹ Nug ag hanhan hobul dayak haen laa deɗ aɗit amuppa maɗ anen anenppa, aɗaglagnu aum. Amuam kalam Adar, deɗ 14 amu 15 ele.

²² Nug ag deɗ aɗit amuppa ag lanak hobul okkai, gamag ahak okkai ele henana, ee hamu nug mettanna, ag daɗek ele ahilag daakkunu keeke hamu mattaglagnu aum. Amuam henana, Juda ag kekeɗ eppelagppan eɗua diiak amu daulagppa dookkunu aum. Haen amuam, ahilag haen nauhkkulagnu dayom, amge ag ahilkad kekeɗ eppelagppanu eɗua diiak aoppig. Ag oolagppa uug nau dooppig, amge ag eɗun, gamag ahak aoppig. Ag mahiak naɗi heppig am iitta me, gamag ahak aoppig.

²³ Amunu Juda ag Mordekai aum amubia hekkulagnu ena doon, ag heppig bia tuɗidna hekkulagnu nai qagappig.

²⁴ Aɗinu? Agag buɗub Hamedata bekka Haman, Juda dilag kekeɗ, nug Juda hatteb nauhkkulagnu kalam, deɗ ele anidkkunu, nug om yaak heum. Om yaak amu onig am purim.

²⁵ Amge Esta nug king gumitta ukke, king nug ɗo nai laa babaitte, Hamannu eheɗ laa hekkunu lokkumakppa dabmaama maittak eheɗ awak, maittak amuppa nug Juda eheɗ hadakkunu dabmeum amu, maittak amu Haman nug, amu nug bekkod ele am eɗua, ahilagppa uɗie, ag ag balal attan danab aihaknu hak, ag amuppa aihadppig.

²⁶ Hibru naippa om yaak amuam onig Purim. Amu diig amunu hobul dayak amuam ag Purim appig. Mordekai nug uɗug ya, lanak hobul naɗi hena, gamag ahak dooglagnu a, amu Juda danab ah ag aɗi keeke digdig ahilagppa beum ele dooppig

²⁷ amunu, ag akka ahilagnu, ag buɗulkad dilagnu, amu aun aɗi ag Juda bekkulag ele amu, ag hanhan maɗ ohppa, deɗ aɗit amuppanab, Mordekai nug dim lamitta haknu nai meum, ag nai amu dim lamidna hekkulagnu dabmeppig.

²⁸ Haen amu digma ukkak amu, prowins ohppa, aab okkai ohppa Juda danab ag Israel, ag Haman Eppegppa ii Nauhppignu Hobul dayak haen deɗ aɗit amuppa maɗ ohppa hekkulagnunab daappig. Ag, ag buɗulkad ele, ag kobol kobol ahilagppa beum amu, ag eɗun dabmekkulagnu, ag hanhan daulag ii atimanu heppig.

²⁹ Kuin Esta, Abihail aɗeg, nug Israel danab ah ag Mordekainu nai tutukku dabmettan, dim lamidkkulagnu oo he, nug am kuin amunu, nug Mordekai ele Purimnu hobul dayaknu nai laa ele yaapiɗ.

³⁰ Amu Mordekai nug uɗug laala amu me, Juda dilagppa King Ekserksisnu prowins 127, amu ohppa ukkom. Nai yaak amuppa nug ag oh geha oolag maɗoɗ ele, enaib daaglagnu oo heum ippuanattom.

³¹ “Ag, am ag buɗulkad ele, ag da, Mordekai, da Juda ted, da Kuin Esta ele i ag Israel ag Haman Eppegppa Ii Nauhppignu Hobul dayaknu amuɗ, anamnab aakku, ag hekkulagoitte. Amu ag anukka ee ohnu kud mena daaglagnu, ag mahiak ele hekkulagnu haen tituanna nai bappaidppig amu, amubia ag hanhan hobul imu deɗ aɗit tutukkuppa ag attemnab hekkulagnu daatte, ag anam aakku hekkulagoitte,” awa yom.

³² Esta nug Purimnu ɗo laala anam ɠagattag me, ag yaaeg bukppa noum.