Eksodas 8 - Nobonob Baibel

Yawe he, og wan ohppa bena, wan ambeppig

¹ Deɗ eblaih aɗit ele amu uue amu, Yawe Nug Moses amegppa inam aum. “Na Paro gumidna gona, dahil nai imu appe doyaɗ! ‘Yawe Nug na amenppa inam atte. “Na danab ah dahilad, ag da noolppa dup nona binal mekkulagnu amu, na ag paɗadppe ukkeg!

² Na dahil nai ii dim lamidna, na ag paɗadppe ii gokkulag dayeb amu, geha da heppi, og huanak ag beppeg, ag Isip wanppa eheɗ naunab daaglag.

³ Le Nil amu, geha og am-nab-bena, geha ag le uun bena gona, nahip lag enanagnab, appa tena, lag ooppa nahip niiak aben ooppa nona, niiaknu balalppa tekkulag. Am og ag nahipad ehanittak anuqak danab laulkadppa tena, danab ah nahipad laa laulkadppa ele geha tena, lag ooppa nokkulag. Amu geha aab ilan, bret manaknu dramppa, am bret kaboliaknu tappiɗ ooppa ele nokkulag.

⁴ Og ag geha oolna, na beɗunppa, amu nahipad ehanittak anuqak danab beɗulagppa, am nahipad danab ah beɗulagppa ele tekkulag,” ’ ” awa aum. ⌊Yawe Nug Moses amegppa anam a, nug Paro gumitta ukka, nug anam aum, amge Paro nug nai amu dab-ii-mettom.⌋

⁵ Aria, Yawe Nug Moses amegppa aum. “Na Aron amegppa appe, nug eppeg awa, attan humeb teeb, dudqak hokkat nuhig amu attan aɗa, amuppa nug le, lenag, le ameg ele epponatta ukkeb, og ag bena, Isip wan ambeig!” awa aum.

⁶ Yawe Nug a, Aron nug dudqak hokkat huma attan aɗa, le epponatte amu, og kuɗumnab bena, Isip wan amu oh ambeppig.

⁷ Aron nug anam heum, amge Isip dilag baɗ mak danab ag ele baɗ ahilag heeg, og kuɗum le uun bena, Isip wanppa goppig.

⁸ Anam daye, aakku Paro nug Moses, Aron ele onilahppa e uɗieh, nug aa amelahppa aum. “Aa Yawe unuqidpeɗ, Nug og ihinigppa daatteb amu, Nug heeb, iitta meppeg, am geha da nahipaɗ danab ah paɗadppi gona, ag doɗ main Yawe mettaglag,” awa aum.

⁹ Am Moses nug Paronu nai nob ma inam aum. “Aakku ena. Da Yawe ehanidkkunu unuqidkkul. Na nakka da haen meɗappe amu, da geha Nug na ehanidkkunu unuqidkkul; da nahipnu, nahipad ehanittak anuqak danab dilagnu, am nahipad danab ah dilagnu ele, ag oh ehanittak aoglagnu, ag laulkadppa og iitta mekkulagnu, og ag geha le Nil amuppaib daaglagnu unuqidkkul,” awa aum.

¹⁰ Moses anam a amu, Paro nug aum. “Butti unuqitte!” awa aum. A amu, Moses nug aum. “Aria, na geha Yawe, ihinig Kayak, na laa Nug bia ii daatte dookkutnu, da na ame bia anam hekkul.

¹¹ Og ag geha na uuidna, ag laulkad ele uun, am nahipad ehanittak anuqak danab, nahipad danab ah ele uuadna, ag daattebppa iinab daamna. Ag le Nil amuppaib daaglag,” awa aum.

¹² Moses nug anam a amu, nug Aron ele aa Paro uuidya goya, Moses nug Paro ele madipiɗ, amubia nug Yawe he, og Paro toppa uɗippig amu, ag iitta mekkulagnu nug Yawe unuqittom.

¹³ Aria, Yawe Nug Moses oɗ metta aumbia he, amu og ag Isip laulkadppa daappig, am laulkad odppa, haɗap-ppa ele daappig, datta ee eppakppa daappig ele amu, og amu oh mauhadppig.

¹⁴ Isip danab ag og mauhadppig amu, ag akkan, aben laalappa ameg ameg qagmatteg daanna, beɗatteg, uɗig nau ahom.

¹⁵ Yawe Nug anam he, og amu mauhna iitta meeg, haen ena daye, Paro nug amu antta, Yawe aumbia, nug he, nuhig dabmak ɠagattag eppom. Nug Moses, Aron ele nai apiɗ amu doya, dab-ii-meum.

Yawe Nug he, peipe huanaknab beppig

¹⁶ Dimppa Yawe Nug bau laa Moses amegppa inam aum. “Na Aron amegppa appe, nug dudqak hokkat nuhig huma, wan gappud makkuɗeb, Isip wan ohnu gappud amu geha eɗueb, peipe huanaknab bekku,” awa aum.

¹⁷ Yawe Nug anam a amu, Moses, Aron ele aa anam hepiɗ; amu haen Aron nug dudqak hokkat nuhig amu awa, wan gappud makkuɗe amu, Isip wanppanu gappud oh amu eɗun, peipe bena, danab ah, doɗ oh ele happutadna daappig.

¹⁸ Aria, haen Isip dilag baɗ mak danab ag ahilag baɗ mak heppeg, peipe bekkulagnu heppig amu, ag hekkulagnu elele iitta daappig. Amu peipe ag danab ah, doɗ ele happutadppig.

¹⁹ Am Isip dilag baɗ mak danab ag Paro amegppa appig. “Kayak nukka keeke imu heum,” aon appig. Ag anam appig, amge Paro nug nuhig dabmak ɠagattag eppa daye, Yawe aum bia nug Moses, Aron ele nai apiɗ amu, nug amu dabmetta, ii doyom.

Yawe he, qid huanaknab beppig

²⁰ Amu dimppa amu, Yawe Nug Moses amegppa inam aum. “Buttuanab Paro geha leppa gokku amunu, na gona, nug anidna, dahil nai imu nug amegppa akkut. ‘Yawe Nug inam atte. “Danab ah dahilad, ag da noolppa dup nona binal mekkulagnu amu, na ag paɗadppe, ag atu taɗakppa ukkeg!

²¹ Aɗinu ⌊na paɗadppe gokkulag⌋? Am na ag ii paɗadppe gokkulag amu, da geha qid ameg naɗi heppi, na amu nahipad ehanittak anuqak danab, amu nahipad danab ah ele, ahilagppa amu, ag laulkadppa ele huanaknab daaglag. Qid amu ag laulkadppa ambak daaglag, amu wan ag Isip ag wan amu qaɗeppa daatteb amu, geha wan amu qidib ambekkulag.

²² Amge na danab ah dahilad ii paɗadppe, qid ameg naɗi bekkulag amu, deɗ amuppa, na geha da Yawe, da wan imuppa daattem dookkutnu, da aben onig Gosen, dahilad danab ah appa daatteb amu, wan amu da gumakkul amunu, wan amuppa qid ag gona ii daamna.

²³ Da keeke nahipad danab ah dilagppa hekkul amu, da amubia dahilad danab ah dilagppa laa iinab hepa. Doye! Dahilnu dabmettaknu kobol danab haknu elele iitta amu, am butti ana bekku.” ’ ” Yawe Nug anam Moses oɗeppa Paro amegppa aum.

²⁴ ⌊Paro nug nai doyaya, nug nai tappe nak he,⌋ Yawe Nug nai aumbia he, qid ameg naɗi uɗin, Paronu lag enanagnab, ag amu ooppa nona, nuhikkud ehanittak anuqak danab laulkadppa, am danab ah laulkadppa ele ambeppig. Isip wanppa amu, qid ambena heeg, wan nauha autanab awom.

²⁵ Aakku Paro nug Moses, Aron ele onilahppa e uɗieh, nug aum. “Ag gona, Isip dilag wan ooppa doɗ main, Kayak ahilag metteg!” awa aum.

²⁶ Paro nug anam aum, amge Moses nug aum. “Ig Isip wan ooppa doɗ mait, Yawe, ihinig Kayak, ig Nug mettagnig, amuam ena iitta. Aɗinu? Isip danab ah ag geha doɗ aqat, Yawe mettak kobol ihinig anidna, ag amunu oolagppa uuaknab dooglag. Amunu diig am, ig Hibru danab ig doɗ aqat, Yawe medattem amu, Isip ag ihinig kobol amunu oolagppa uuaknab dootteb. Anam amunu, Isip ag ig amu hebupput anigna, ag oolag aeg beeb, menppa ig iqappeg mauhkkunig.

²⁷ Amunu ig oit oit, deɗ ewam batak atu taɗak ooppa gokkunig. Ig gota, appa doɗ mait, Yawe, ihinig Kayak, Nug mettagnig. Nug ig amenigppa amu haknunab attebia hekkunig,” awa aum.

²⁸ Moses nug anam a, aria Paro nug aum. “Aakku amunu, da ag uuadppi, ag atu taɗakppa gona, ag doɗ main Yawe, ahilag Kayak, ag Nug mettaglag, amge ag umanab aib goppig. Aria, ag dahilnu ele unuqidppeg, da ehaniɗaɗ!” awa aum.

²⁹ Aria, Moses nug eɗua inam aum. “Haen da na uuitten gokkul, haen amuppa da Yawe unuqidppi, butti Nug qid na lautppanu, am nahipad ehanittak anuqak danab laulkadppanu, am nahipad danab ah laulkadppanu ele lamadkku. Nug lamadkku, amge na eɗun, ig baula aib hambuppuigme. Na eɗun, Israel danab ah gona, doɗ main Yawe mettaglagnu ib baula aib oo neme,” awa aum.

³⁰ Amu Moses nug Paro uuitta ukka, nug Yawe unuqittom.

³¹ Moses unuqitte, Yawe Nug Moses oɗ metta aumbia, anam Nug heum; qid oh Paro laugppanu, nuhikkud ehanittak anuqak danab laulkadppanu, amu danab ah nuhikkud laulkadppanu ele ahan goppig, laippu laa ii dayom.

³² Qid oh goppig, amge Paro nug he, haen imuppa ele nuhig dabmak ɠagattag eppe, Israel danab ah uuatte ii goppig.