Eksodas 4 - Nobonob Baibel

Yawe Nug Moses uɗat danab haknu elele iitta hekkunu ɠagattag mettom

¹ Kayak Nug anam a, Moses Nug amegppa inam aum. “Amge Israel ag dahil nai dooglagnu uuglagtai, oolagppa ele genab iitai dooglag. Da nai mehuqkkul amu, aria ag geha inam akkulagtai. ‘Na hambubuttem. Yawe Nug na gumitta ii neum.’ ⌊Ag anam akkulagtai amunu, ag anam appeg, geha da attem hekkul?⌋” awa aum.

² Moses nug anam a amu, Yawe nug oɗ mettom. “Na aɗi aɗattem?” A amu, Moses nug aum. “Da dudqak hokkat aɗattem,” awa aum.

³ Moses nug anam a amu, Yawe Nug aum. “Na dudqak hokkat amu maoppe, wanppa noaɗ!” awa aum. Awa aum amunu, Moses nug mawe wanppa noa, dudqak hokkat amu eɗua, mat me, Moses antta, nug baɗa oolom.

⁴ Nug baɗa oolom, amge Yawe Nug Moses amegppa aum. “Iitta. Na eppen bahin nona, na boobppa awe!” awa aum. Nug anam aum amu, Moses nug mat boobppa awe, mat eɗua, dudqak hokkat dayom.

⁵ Yawe Nug anam a, Moses nug anam he, Yawe Nug aum. “Na Israel gumadna gona, na heme imu bia ele hekkut. Amu na anam hekkutnu diig am, Israel danab ah ag anidna, ag da Yawe, da genab na gumitte nemi oolagppa genab dooglagnu hekkut. Da am Yawe, da ag mamelkad aɗi dilag Kayak, amuam da am Abrahamnu Kayak, am Aisaknu Kayak, amu Jakopnu Kayak ele,” awa aum.

⁶ Yawe Nug Moses amegppa anam awowa amu, Nug baula inam aum. “Na eppen meppe, saket nahip ooppa noaɗ!” awa aum. Nug anam a, aria Moses nug Yawe aum bia hewowa, nug eɗua eppeg eeɗa awe, nug eppegppa gaɗa oɗe nau ele dayom. Nug eppeg aakku hakkabnab eppom.

⁷ Anam dayeye, am Yawe Nug baula aum. “Na eppen baula meppe, saket ooppa noaɗ!” awa aum. Yawe Nug anam a, aria Moses nug anam ha, haen nug eppeg eɗua awe amu, eppeg am ena, beɗu laa oh daatte bia dayom.

⁸ Moses nug anam he, Yawe Nug aum. “Israel danab ag daulag human, nahip nai ii dooglag dayeb, ag oolagppa genab ii dooppeg ele amu, na dahilnu dabmettaknu kobol danab haknu elele iitta tatam heppe, ag oolagppa genab dooglagtai. Amge ag amu anidna, ag oolagppa genab ii doon heppeg amu, na tuɗidna, na dahilnu dabmettaknu kobol danab haknu elele iitta laa imu ele heppe, ag oolagppa genab dooglagbia.

⁹ Amge ag dahilnu dabmettaknu kobol danab haknu elele iitta aɗit amu anidna, ag nahip nai oolagppa genab ii dooppeg amu, aria na Nil leppanu le laa itan, wanppa gokkaɗppe, geha le amu eɗua, tiig daakku,” awa aum.

¹⁰ Yawe Nug Moses amegppa anam aum, amge Moses nug Yawe amegppa aum. “O Naɗi, nai mattiak dahil, amu laa ittag ii aqatte. Aɗinu? Da oɗel uugnab daatte. Da lemaɗul ele uug daatte. Da anukka anamib daami, gemu ele, na da amelppa nai iikku madittem, amge da daamibia, da anamib daattem ⌊amunu, da uɗat amu hekkulnu elele iitta⌋,” awa aum.

¹¹ Moses nug anam a amu, Yawe nug amegppa aum. “Aun Nug danab ah oɗelag madatte? Aun nug he, danab ag nai mattiglagnu elele iitta daatteb? Aun nug he, danab ah daulag ituak daatteb? Aun Nug he, ag amelag keeke anidtte, o Nug he, danab ameg gaɗutte? Da Yawe daib, da aakku anam hettem

¹² amunu, na ukke! Da geha na nai madikkutnu na oɗen ehanitten, nai amu ippunidppi, na nai amu oh madikkut,” awa aum.

¹³ Yawe Nug anam aum, amge Moses nug eɗua amegppa aum. “O Naɗi, ⌊gadon, da elele iitta.⌋ Na danab laa appe gokkunu oɗ medattem,” awa aum.

¹⁴ Moses nug anam a amu, Yawe Nug oo nauhe, Nug Moses amegppa aum. “Attem hak? Na awan Aron, nug am Lewi buɗub, amu nug daatte. Da nug nai elelenab madikkunu elele doottem. Nug am gehanab iikku na anidkkunu uɗitte. Haen nug na anitta, nug gamag ahakku.

¹⁵ Nug na anidkkunu uɗitte amu, ⌊nug uɗieb, uɗat imu, da na medattem ele amu, uɗat amu haknu haen beeb,⌋ na nug amegppa appe, nug am geha nai amu oh mehuqkku. Da am geha aa keeke aɗi mattiglahnu ippunatppi, aɗi keeke hekkulahnu ele ippunatppi, aa hekkulah.

¹⁶ Am inam bekku. Nug am geha na oɗen bia daakku. Da, Yawe, da nai na medattem, nai medakkul ele amu, na da abenal bia aona, na nug nai amu medakkut. Anam amu, nug na abenam awa, nug danab ah nai madakku.

¹⁷ Aria, na gonana, na dudqak hokkat nahip imu ele aon ukke! Dimppa na geha dahilnu dabmettaknu kobol danab haknu elele iitta, amuppa hekkut,” awa aum.

Moses nug eɗua, Isip ukkom

¹⁸ Yawe Nug Moses amegppa nai amu mattia male, Moses nug eɗua, tana Jetro gumitta ukka, amegppa aum. “Na uuiɗppe, da eɗue Isip ukken, da lailad anadkkulnu ool daatte. Ag ana daattebtai, o ag mauhppigtai amu, da dookkul,” awa aum. Jetro nug amunu ena doya, nug Moses amegppa aum. “Amu elele, na maɗoɗ ele ukke!” awa aum.

¹⁹ Jetro nug anam a, Moses nug ⌊gokkunu⌋ Midian wanppa dayeye, Yawe Nug amegppa aum. “Danab na nittaglagnu heppig ele amu, ag ii daatteb; ag mauhppig amunu, na eɗun Isip ⌊gokkutnu aib baɗame! Na⌋ ukke!” awa aum.

²⁰ Yawe anam a amu, Moses nug wau, bekoɗ aɗit ele diia, donki laa attan maatta, nug dudqak hokkat nuhig, Kayak nug awa gokkunu aum amu, nug amu awa aɗe, ag Isip gokkulagnu goppig.

²¹ Am Yawe Nug Moses amegppa aum. “Dimppa na gona, Isip tewona amu, na kobol danab haknu elele iitta, da na kobol amu na hekkutnu ɠagattag mettami amu, na amu oh Paro noobppa hekkut. Na anam hekkut amge da heppi, Paronu dabmak aakku ɠagattag ebakku. Nuhig dabmak am ɠagattag eppa dayebeb, Paro nug danab ah uuatteb ii gomana.

²² ⌊Na uɗat danab haknu elele iitta amu oh hena malappe, Paro nug danab ah ii uuatteb, amu dimppa na Paro amegppa inam appe doyaɗ!⌋ ‘Yawe Nug inam atte. “Israel ag am dahil nid danab tatamnu,

²³ amu da na amenppa ami, Na dahil nid paɗappe, nug ukka, da noolppa dup noa binal maɗ! ami. Da anam ami, amge na da ami bia ii hena, ii uuatte goppig amunu, da nahip nid danab tatamnu amu qeppi mauhkku.” ’ Na anam appe doyaɗ!” Yawe Nug Moses amegppa anam aum.

²⁴ Aria, Isip ukkak ibppa Moses niiom, aben amuppa, Yawe Nug Moses uɗa ta, Nug Moses qeeb mauhkkunu dayom.

²⁵ Anam dayom, amge Sipora, Moses wau, nug men aeg hawaɗnab laa awa, nug nid danab nuhig hipab gaɗa otaɗa awa, Moses baeg amuppa lauɗittowa, nug aum. “⌊Na mauhmananu da bekkal gaɗa otaɗmi⌋ amunu, gemu na tiigppa da gamul, bau eɗun daattem,” awa aum.

²⁶ Sipora nug bekka gaɗa otaɗe, Yawe Nug amu antta, Moses uuittom; Nug ii qe mauhom. Yawe Moses uuitte daye, Sipora nug amu antta, haen amuppa nug gaɗa otaɗak kobolnu, “Na mauhmananu da bekkal gaɗa otaɗmi amunu, gemu na tiigppa da gamul, bau eɗun daattem,” awa aum.

²⁷ ⌊Amge keeke amu oh ii nak haenppa amu,⌋ Yawe Nug Aron amegppa inam aum. “Na Moses uɗa tekkutnu amu, na atu taɗakppa ukke!” awa aum. Nug anam aum amunu, Aron nug aha ukka, Kayaknu qaukoppa, Moses uɗa ta, nug ootuqittom.

²⁸ Nug ootuqitte, Moses nug Aron amegppa keeke oh Yawe nug ⌊Paro amegppa⌋ madikknu amegppa anana, he uɗiom ele amu, nug amunu nug amegppa mattiom. Am Moses nug Aron amegppa Kayak dabmettaknu kobol danab haknu elele iitta hekkunu Yawe ⌊ippunitta⌋, hekkununab aum amu, nug Aron amegppa amunu ele mattiom.

²⁹ Amu dimppa amu Moses, Aron ele ⌊aa Isip goya,⌋ aa Israel dilag ikki danab qagmaadya,

³⁰ Aron nug keeke oh Yawe, Moses amegppa aum amu, ag amelagppa a, Moses nug Kayak dabmettaknu kobol danab haknu elele iitta amu, danab ah anidkkulagnu heum.

³¹ Nug anam he, ag oolagppa genab dooppig. Amu haen ag Yawe Nug ahilagnu dabmak awawa dayom doon, Nug ele Isip ag kobol eheɗ iɗu iɗu ahilagppa heppig anttom ele doon amu, ag dup nona, Yawe binag meppig.