Eksodas 32 - Nobonob Baibel

Israel ag makau gaiɗ golppa hak noobppa dup nona binag meppig

¹ Moses nug haen elab qaukoppa dayom, nug paha ii neum amunu, danab ah ag qagmena, Aron gumidna gona, nug amegppa appig. “Ig danab amu, Moses, danab amu nug ig Isipnu aikka ippa uɗiom ele amu, ig nuhigppa aɗi laa beum amu, ig ii doottem amunu, na ahan, kayak laa, geha nug ibppa anuqa ugakka, omaikka gokkunu hena mekke!” aon appig.

² Ag anam aeg, aria Aron nug ag amelagppa aum. “Ag ahilkad ah, ag bekkalkad, aɗelkad ele dilag bala gol daulkadppa meppig daatteb amu, ag amu uhuqadna akkan, da gumiɗna uɗieg!” awa aum.

³ Aron nug anam awa a amu, aria danab ah ag gol bala daulkadppanu uhuqadna akkan, Aron gumidna uɗippig.

⁴ Ag akkan, aon uɗieg amu, nug daulkadppanu gol bala amu awa, aabppa mane ewa, le me, nug makau gaiɗ dottog laa babaittom ele amu, aguppa gokkaɗeg no, nug makau gaiɗ dottog golppa aakku ha mala, babaittak uɗat aakku siselppa heum. Nug anam he, Israel danab ah ag anidna appig. “Doyeg! Imuam kayak ihinig. Nug ig Isipnu aikka, nug ig omaikka uɗiom,” aon appig.

⁵ Ag anam aeg, haen Aron nug aɗi heegeg antta amu, nug qaɗab laa makau gaiɗ dottog noobppa qewowa, nug aum. “Butti ig Yawe dabmettata, qagmak gamag ahak ele hekkunig,” awa aum.

⁶ Nug anam a, wagɗe deɗ amuppa amu, danab ah ag manaknu ofanu doɗ manadna, ⌊dottog amu⌋ mettona, ag laippu dayaknu ofanu doɗ ele manadna ⌊dottog amu⌋ medappig. Danab ah ag ofa amu mettona, ag ee, le ele lawona, ag ahan gona, ahi uɗa nak ele goɗappig.

⁷ Ag amu heegeg amu, Yawe Nug Moses amegppa aum. “Na paha no! Aɗinu? Danab ah nahipad, na ag Isipnu diin uɗime ele amu, ag kobol ena iitta uɗig wak ele hena, da dimeɗappig.

⁸ Ag haen elab iitta, pahanab da aɗi hekkulagnunab amelagppa ami amu, ag uuna, golppa makau gaiɗ dottog hewona, ag nug noobppa dup nona binag menana, doɗ main, nug mettana, ag atteb. ‘Doyeg! Imu nug ig Israel, ihinig kayak. Nug ig Isipnu aikka, omaikka uɗiom,’ aon appig.” Yawe nug Moses amegppa anam aum.

⁹ Yawe Nug Moses amegppa anam awowa, Nug nai tuɗitta aum. “Da danab ah amu dilagnu amu, da dottem, danab ah amu ag am oɗe dim lamidmananu dabmak ɠagattag eppak danab ah.

¹⁰ Ag anam daatteb, da ool amunu huan nauhtte amunu, dahil oo nauhak okkainab mekkunu, amuppa da heppi, ag padal mekkulagnu na uuiɗna ukke! Da heppi, ag padal meppeg amu, geha da eɗuen heppi, na buɗunad ag appatna, huu okkainab, ɠagattag ele daaglag,” awa aum.

¹¹ Yawe Nug Moses amegppa anam aum, amge Moses nug Yawe, nuhig Kayak, nug nuhig oo mak ag uuadmanu haaha, Nug inam Yawe amegppa anana, inam unuqittom. “O Yawe, na oo nauhak doonna, na heppe, danab ah nahipad, na danab ah amu na nahip ɠagattag okkaippa Isipnu diin uɗime ele amu, ag padal mekkulag, amge amuam uug ele.

¹² Am na ag anam hadappe, geha Isip ag, ‘Yawe Nug danab ah nuhikkud dilag dabmak eheɗ awa, Nug ag Isipnu diia, omalatte uɗieg, atu qauko imuppa eheɗ naunab hadatta, Nug ag oh aqeeb mauhna, padal mena autna aon, wanppa baula ii daamnanu diia uɗiom,’ aon akkulag, amge amuam uug ele! Ena iitta! Amu O Yawe, na amu hemananu oɗ medattem. Na oo nauhak huanaknab nahip amu, na uun aɗappe, nob maknu dabmak nahip eɗueb, na heppe, danab ah nahipad ag padal ii menananu oɗ medattem.

¹³ Na nahipad maɗi nid, am Abraham, Aisak, Jakop ele, na amu dilag dabmenana, na amu dilagnu keeke hekkutnu na oninppa, nahip nai ɠagattag qena ame amu, na nai amu dabmekkutnu oɗ medattem. Na nai ɠagattagnab qakkan, ag amelagppa ame am inam. ‘Da dakka da onilppa nai imu ɠagattag qetten, inam attem. Da geha heppi, ag buɗulkad ag kuɗumnab, hoɗopai daatteb bia bekkulag. Anam amu, da geha ag wan imuppa daatteb ele amu, da wan imu oh ag buɗulkadppa madappi, ag aulag hanhan daakku.’ Na anam ag amelagppa ame,” awa aum.

¹⁴ Moses nug anam unuqitte, Yawe Nug nuhig dabmak eɗue, Nug he, nuhikkud danab ah dilagppa eheɗ nau bekkunu aum amu, am ii beum.

¹⁵ Aria, Moses nug eɗua aha, qaukoppanu noawa, nug men maha aɗit Kayak Nug amuppa ɗo yom ele, nug amu eppegppa aɗalata noum. Kayak Nug men aɗit amu heqolah laih laih ohppa ɗo nai yom.

¹⁶ Kayak Nug nukka men aɗit amu ha, Nug nukka ele ɗo nai men aɗit amuppa otaɗatom.

¹⁷ Moses nug noa, Josua dayomppa no, aa oh ahaya noyaya, danab ah ag muttub qeegeg doya, Josua nug Moses amegppa aum. “Haen tutu dayaknu aab kalakppa amu, ag ban heegeg, oqotti otte bia dottem,” awa aum.

¹⁸ Nug anam aum, amge Moses nug aum. “Iittade! Muttub qak baag amuam danab ag ban hena, ban eɗidna muttub ii qetteb. Am banppa aqaeg mauhnana ii gaatteb. Da ag ahi goɗaegeg doottem,” awa aum.

¹⁹ Am Moses nug uɗia, haen tutu dayaknu aab kalak guguittatta, nug makau gaiɗ golppa hak amu antta, nug danab ah ahi goɗana daaegeg anatta, nug oo nauhak naunab doya, nug men maha aɗit eppegppanu buɗiate, wanppa nopiɗ. Amu nug qauko diigppa mawate goya, aoɗya nauhpiɗ.

²⁰ Moses nug anam hewowa, nug makau gaiɗ dottog ag heppig ele aab aɗuppa mana awa, aoɗa maduduɗe, kalu ne, nug kalu amu le qaɗeppa gokkaɗe noa, le attan qaɗeppa teppu iitta dayeye, Moses nug he, Israel ag le amu lappig.

²¹ Moses nug anam ha mala, nug Aron amegppa aum. “Am danab ah ag nahipnu attem heeg, amu diig amunu na ag kobol eheɗ naunab amu hekkulagnu ae heppig?” awa aum.

²² Moses nug anam a, Aron nug Moses aum, nug nai amunu eɗua inam aum. “Danab naɗi dahil, na oot aib nauhom. Aɗinu? Na danab ah imu diilag doottem. Ag kobol nau hekkulagnu amu, ag ib amu oɗeppa daan oitteb.

²³ Anam amu, ag da amelppa inam appig. ‘Ig danab amu, Moses, danab amu nug ig Isipnu aikka, ippa uɗiom ele, ig nuhigppa aɗi laa beum amu, ig ii doottem amunu, na ahan, kayak laa, geha nug ibppa anuqa ugakka, omaikka gokkunu hena mekke!’ aon appig.

²⁴ Ag anam aeg, da doyen, da danab ah amelagppa ag ahilag gol bala uhuqadkklagnu ai, ag bala gol ele amu uhuqadna meɗappig. Ag da meɗaeg, da aab aɗuppa maoi ta, makau gaiɗ aakku nukka hamu beum,” awa aum.

²⁵ Anam daye, Moses nug danab ah ag mauhnoak, dabmak iitta ele kobol nau digdig henan daaegeg anatta, nug Aron, danab ah ag kobol nau amu ag ii hemananu ele ag amelagppa ii aum doyom. Danab ah ag anam henana, Aron nug aib ii aum amunu, ag oh am kekeɗ ahilag, ag ag anadna, aon aon aqan, onilag heppeg nauhebeb, eheɗ imadkkulagnu ippu madappig ele doyom.

²⁶ Nug amu doya, Moses nug ukka, nug haen tutu dayaknu aab kalak ooppa noaknu ib oɗeppa hibaitta dayaya, nug inam awa eum. “Danab aun nug Yawe dim lamidkkunu oo daatte amu, nug da gumiɗa uɗiaɗ!” awa eum. Nug anam e, aakku Lewi buɗub ag ahan, gumidna dona, nug hibaitta dayeye, nug ouqena hippaidppig.

²⁷ Ag anam hippaidna daaegeg, nug ag amelagppa aum. “Yawe, ig Israel ihinig Kayak, Nug atte. ‘Ag oh anen anen qep elab ahilag akkan, aon gona, ag haen tutu dayaknu aab kalak ooppa nona, ag gona uɗinna, anamib henan dayeg! Ag anam oinna amu, ag danab ah ag kayak hambuppuak dim lamidppig ele, ag am ag awalkad, amalkad, lailkad, mudippan laippu ele amu, ag ag aqappeg mauheg!’ ” Moses nug Lewi buɗub amelagppa Kayaknu nai amu mattie dooppig.

²⁸ Moses nug anam a amu, Lewi buɗub ag Moses haknunab aum bia, ag anam heppig. Ag anam heegeg ukke, amu deɗ amuppaib danab 3,000 anam aqaeg mauhppig.

²⁹ Ag anam heeg amu, Moses nug Lewi buɗub amelagppa inam aum. “Ag gemu ag bekkalkad, awalkad, amalkad aɗi eheɗ heppig ele, ag ag aqaeg mauhppig. Ag amu aqaglagnu ii uuppig amunu, ag Yawenu daaglagnu tituana mettak daatteb. Nug gemu ag itattom,” awa aum.

³⁰ Amu oh ba ukke, wagɗe deɗ amuppa Moses nug danab ah amelagppa aum. “Hipunin ag heppig am naunab, amge da geha qauko attan eɗue tein, da Yawe gumitte ukken, ag ahilag eheɗ haknu nob nau doɗ tiigppa iitta meeb elele medakkunu, da Nug oɗ medappi, Nug, ‘Yo,’ akkutai,” awa aum.

³¹ Moses nug anam awowa, nug eɗua, qauko attan ta, nug Yawe amegppa inam aum. “Oo doyaknab, oo doyaknab. Danab ah imu ag hipunin naɗinab heppig. Ag kayak hambuppuak laa golppa hena, ⌊ag nug noobppa dup nona binag meppig⌋,

³² amge gemu da na, na ahilag hipunin amu uhuqna madakkutnu oɗ medattem. Da na anam oɗ medattem, amge na ahilag hipunin amu ii uhuqkkut dayeb amu, na danab ah nahipad onilag yaame, buk amuppa da onil daatte amu, na da onil amu obikkutnu oɗ medattem,” awa aum.

³³ Moses nug anam aum, amge Yawe Nug Moses amegppa aum. “Iitta. Da danab ah ag hipunin hetteb ele, da agib onilag obikkul.

³⁴ Amu na gona, na danab ah diin, aben da na amenppa ami amu, na amuppa gokkut! Doye! Engel dahil nug geha ibppa ag noolag awa, anuqa omaladkku, amge dimppa bu mattak haen tutukkuppa beeb amu, da geha uɗie, da danab ah ag hipunin heppig ele am bu madakkul,” awa aum.

³⁵ Aron makau gaiɗ dottog golppa he, ⌊nug, danab ah ele ag hipunin heppig⌋ amunu, ⌊haen tutukkuppa amu,⌋ Yawe Nug he, oɗe nau danab kuɗum aqe mauhtteb ele laa ag aqom.