Eksodas 27 - Nobonob Baibel

Manaknu ofa haknu qaɗab haknu nai

¹ Yawe Nug anam anana, nug nai tuɗitta, Moses amegppa aum. “Ag ad akasia aon, qaɗab laa, elab nuhig am 2 mita, 20 sentimita ele, emaitak nuhig am ele 2 mita, 20 sentimita ele, amu attan nuhig am 1 mita, 30 sentimita ele, ag qaɗab amu heig! Elab nuhig am emaitak nuhigbiaib dayaɗ!

² Ag henana amu, ag qaɗab ad akasia, amuppa hetteb, ag ad amuppaib ag keeke makau qeqeɗi bia waɗele qaɗabnu daug waɗele ohppa hoiatteg! Ag ad piɗenu hoyadna, qaɗabppa aib atulppig; laippu heig! Ag amu oh hewona, ag qaɗab amu oh brasppa toneg!

³ Ag qaɗab amu hena, ag brasib aon, tappiɗ okkai laala aab uhuɗ awaknu hewona, sabol naunau, tiig amuppanu awa tauɗeb ukkaknu tappiɗ, huɗup ele hena, aria, tappiɗ nakok, aab ma mawa ukkaknu amu, ag amu oh ele heig!

^4-5 Amu ag qaɗab hena, ag nuhig keeke laa, battam okkai bia, ag keeke amu brasppa giɗo giɗo ele heig! Ag hewona, ag ring bras waɗele hattana, ag keeke battam okkai bia daug waɗeleppa qata-aqadna, keeke battam bia amu aɗan, qaɗab amu ooppa paɗappeg noaɗ! Ag paɗappeg noobob, keeke battam okkai bia bitob am qaɗab gamagppa, attan iitta, honap ele iitta, nug anam noa dayebeb, keeke battam okkai bia oɗe am qaɗab agappan maha, otala nakok okkai ele amu, am amu waappa daakku.

⁶ Aria, ag qaɗab maoglagnu amu, ag ad akasia tuqai aɗit hoyatna, brasppa tonateg!

⁷ Haen ag qaɗab maoglag amu, ag tuqai aɗit amu aon, qaɗab mawa ukkaknu heqo laih laih ring oɗeppa aɗualatppeg noob, ag human maoglag.

⁸ Ag qaɗab amu plangppa kunup bia hekkulag, amge ag kunup ameg waappa attan ele aib meppig; uuppeg, hamu anam dayeɗ! Da ippa qaukoppa dottog na ippunidmi iikku, amu ag anamnab aakku hekkulag.

Mettid haknu peh lagnu aɗ haknu nai

⁹ Aria laa amu, ag lamen laala, linen muɗi hakkab eleppa agappeg, lamen amuam dahil mettid haknu peh lagnu aɗ bia daya, lag amu talilitteb, haɗap dayaɗ! Am lamen laa, am aben laih ulah yau uɗitteppanu daakku amu, lamen amu, elab nuhig am 44 mita daakku.

¹⁰ Lamen am anam dayeb amu, ag biidod 20 ele hattana, ag diig ɠagattag daakkunu tatap brasppa hak 20 ele hattana, ag biidod amu aon, diig ɠagattag daaglagnu tatap oɗelkadppa aɗualadppeg nona daaglag. Ag silwa ele aon, ag huk, ring ele lamen aihaknu ele hattana, ag biidodppa qata-aqatteg!

¹¹ Amu lamen laa, am aben laih ulah yawalti uɗitteppanu daakku amu, lamen amu ele elab nuhig am 44 mita daakku. Amu amuppa ele biidod 20, diig ɠagattag daakkunu tatap 20 brasppa hak, amu biidodppa silwa huk, ring ele qata-aqappeg daaglag.

¹² Aria, lamen laa, am laih qaban uɗitteppanu daakku amu, ag lamen amu, elab nuhig 22 mita heig! Ag hena, ag biidod eblaih laih ele hoyadna, diig ɠagattag daakkunu tatap brasppa hak eblaih laih ele, ele hekkulag.

¹³ Amu laih kaɗag uɗitteppanu, aben od daatte ele amu, nuhig melemel amu ele 22 mita daakku.

^14-15 Amu od heqo laih laih lamen aɗit aihatkkulagnu hekkulag amu, elab ahilah anen anen am 6 mita, 60 sentimita ele. Ag lamen laanu biidod ewam, diig ɠagattag daakkunu tatap ewam ele hadappeg daappeg, aria lamen laanu am anamib hadappeg daaglag.

¹⁶ Aria, haɗap amunu od oɗe qehakkaknu amu, ag lamen laa, elab nuhig 9 mita, ag lamen amu akkeg! Ag hekkulagnu amu, ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aon, ag lamen amu akkeg! Ag akkona amu, ag lamen koitaknu doya autanab awak danab madappeg, ag amuppa kobol kobol ele koitatteg! Amu ag lamen aihkkulagnu ag biidod waɗele, diig ɠagattag daakkunu tatap waɗele, ele heig!

¹⁷ Ag haɗap amu talilidkkunu aɗnu biidod ohppa ag ring silwa, huk silwa ele qata-aqadna, ag biidod diilkad ɠagattag daakkunu tatap biidod diilkadppa daaglagnu amu, ag amu oh brasppa heig!

¹⁸ Aɗ amu elab nuhig amu 44 mita, aria emaitak nuhig am 22 mita, am attan nuhig 2 mita, 20 sentimita ele. Ag linen muɗi hakkab aon, aɗ amunu lamen akkadna, ag bras ele aon, biidod diig ɠagattag daakkunu tatap oh ele hatteg!

¹⁹ Amuam anam daakku, amge dahil mettid haknu peh lakkanu keeke laa oh, ag keeke amuppa dahil mettid haknu peh lakka uɗat hekkulag amu, ag keeke amu oh, amu pin elab mettid haknu peh lag taietteb, ɠagattag qaadkkunu, haɗapnu aɗ talilittaknu ele ɠagattag qaadkkunu pin elab, ag keeke amu oh brasppaib heig!

Lam amahalaknu goɗennu nai

²⁰ Am laa amu, lam maattak balalppa lam daatteb eoglagnu, na Israel danab ah amelagppa haknunab appe, ag ad olip goɗen ena lamppa noaknu akkan uɗieg!

²¹ Amu Aron nug bekkod ele ag geha lam amu dahil mettid haknu peh lag danab ah appa qagmetteb ele, ag peh lag amu ooppa, Oo Gun Ele, Oo Gunnab Ele makkulaknu lamen, Tituanak Nainu Kunup kontrak inak ele am lamen amu dimugppa Oo Gunnab Eleppa daatte amu, ag lamen amu guguittak, Oo Gun Eleppa mekkulag. Ag meppeg dayebeb, ag deɗ oh goɗen lamppa gokkaɗppeg noob, tueb meeb amotppeg, geha lam amu deɗ oh tuebnu ukkeb tuqan, tuqannu ukkeb wakkaɗak, aben da daattem amuppa, da Yawe, da noolppa ewawa dayaɗ! Ag Israel gemu daatteb, amu geha dimppa buɗub buɗub doobob, ag buɗulkad amu ele ag ɗo amu haen oh aɗan henana, mana mettak danab ag lam amu amotppeg, tueb digma ukka, buttua batak ewawa dayaɗ!” awa aum.