Eksodas 26 - Nobonob Baibel

Mettid haknu peh lagnu nai

¹ Yawe Nug amu hekkulagnu anana, Nug keeke laanu inam aum. “⌊Danab uɗat amu hetteb ele amu,⌋ ag mettid haknu peh lag dahil heig! Ag mettid haknu peh lag amu hekkulagnu ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aona, ag lamen eblaih laih ele oh amuppa akkeg! Ag lamen eblaih laih ele amu akkona, ag lamen qaɗeppa bala koitaknu ag danab uɗat amu haknu doyak okkai ele madappeg, ag engel okkai-kerubim dottog lamen amuppa koitatteg!

² Ag lamen eblaih laih ele amu oh lag geɗiaknu daaglagnu melemel laippuppa akkeg! Elab ahilag am 12 mita, aria okkai ahilag am 2 mita.

³ Aria, ag lamen amu hena malona, ag lamen tanig ele aon, daug daugppa koitadppeg ukka, emaitak okkai dayeb, ag lamen tanig ele laa ele aon anamib koitadkkulag.

⁴ Amu lamen otala okkai aɗit amu tuɗidkkulagnu, ag lamen qatti 50 edppa hak aon, ag lamen otala okkai laa, lamen amu noobppa ag lamen qatti amu ring bia koitatteg! Ag amu hewona amu, ag lamen otala okkai laappa, lamen amu daugppa ele anamib heig!

⁵ Ag lamen qatti 50 aon, lamen otala okkai laappa koitattona, 50 laa amu ag lamen otala okkai laa amuppa koitadkkulag, amu lamen qatti lamen otala okkai laappa daatteb, lamen qatti 50 lamen otala okkai laappa daatteb ele amu, ag oh anen anen nug noob yaak dayeg!

⁶ Ag amu hewona amu, ag huk-ring 50 golppa hattaglag. Ag amu hattana amu, ag lamen otala okkai aɗit amu amuppa qakkadna, ⌊lag daug daug tona, ebehi attan ele⌋ duqatppeg, geha lamen aɗit amu aa lamen okkai laippu mettid haknu peh lag dahil daakkunu daaglah.

⁷ Aria, dimppa ag lamen laa, mettid haknu peh lag dahil tonakkunu henana, ag lamen 11 meeme uɗigppa heig!

⁸ Ag lamen amu oh, ahilag ebqak am 11, ag amu oh melemel laippuppa hattaglag. Elab ahilag am 13 mita, okkai ahilag am 2 mita.

⁹ Ag amu hena, ag lamen tanig ele aon koitadppeg, geha lamen okkai laippu dayeb, ag lamen eblaih laippu ele laa amu aon, oh laippu koitadppeg, geha amu ele lamen okkai laippu daakku. Amu ag lamen ebqak eblaih laippu ele amu, ag lamen amu piippeg, mettid haknu peh lag odppa teppu ele aɗit dayaɗ!

¹⁰ Aria, lamen ring 50 amu batakppan lamen okkai laa daugppa koitattona, ag lamen ring 50 laa amu, batakppan lamen okkai laa daugppa ele koitadkkulag.

¹¹ Aria, ag bras huk-ring 50 hadappeg, huk-ring ag lamen ring amuppa noppeg, lamen okkai aɗit amu, amuppa oh qakkalatppeg, lamen laippu dayaɗ!

¹² Amu lamen okkai amunu maha laa hamu daatte ele amu, ag uuppeg, anam dahil mettid haknu peh lag dimittim dimugppa aiha dayaɗ!

¹³ Am tonak lamen amu, elab nuhig amu dahil mettid haknu peh lagnu lamen gilil amu waappa daatte, eɗitta, 50 sentimita laih laih ohppa anam daakku. Tonaknu lamen am anam daakku amunu, geha tonaknu lamen, amuam peh lag laa aakku, lamen amuam dahil mettid haknu peh lagnu lamen gilil oh elele tonakku.

¹⁴ Ag amu oh hewona amu, ag keeke aɗit laa ele dahil mettid haknu peh lag tonaglahnu hekkulag. Ag laa sipsip dawai gaɗappa, laa ag heeg, kokoɗ eppom daatte ele, amuppa ag peh lag laa hewona, aria ag peh lag laa kakai maoi gaɗappa hekkulag. Aɗit amu oh, aa am laa qaɗeppa nug tonak daaglah.

¹⁵ Ag anam hena, ag dahil mettid haknu peh lag amu qabappeg daakkunu, ag gililnu ukku kuɗum, mettid haknu peh lag dahil amunu ebehi daaglagnu ad akasiappa heig!

¹⁶ Gililnu ukku amu oh, ahilag elab am 4 mita maha ele, aria ahilag emaitak am 66 sentimita.

¹⁷ Amu ag gililnu ukku anen anen henana, ag gililnu ukku diigppa baeg aɗit daaglahnu, ag akasia ad honap emaitak buuidkkulagnu nakok aɗappeg beeb, ag amuppa buuidppeg, baeg aɗit dayeɗ! Baeg aɗit amu, aa oh tutukku elele elele dayeɗ! Baeg aɗit amu, aa diilah aɗa daakkunu tatap oɗeppa noya, ɠagattag daaglah. Ag gililnu ukku oh anamib hattaglag.

¹⁸ Ag henana, ag gililnu ukku, dahil mettid haknu peh lagnu gilil laa, laih ulah yau uɗitteppanu daatte amu, ag gilil amunu ukku 20 bappaidkkulag.

¹⁹ Bappaidna amu, ag silwa aon, gilil amunu ukku baelkad, amuppa galadkkulagnu, ukkunu diig ɠagattag daakkunu, ag tatap 40 silwa amuppa hattaglag. Diig ɠagattag daakkunu tatap aɗit gililnu ukku anen anen waappa daaglah.

^20-21 Amu ag hewona, ag gilil heqo laih yawalti uɗitteppanu daatte amu, ag amunu ele anamib heig! Ag gililnu ukku 20 aon babaittona, ag gililnu ukku diig ɠagattag daakkunu tatap 40 silwappa ele hekkulag. Ag diig ɠagattag daakkunu tatap aɗit gililnu ukku laippu waappa mekkulagnu bappaidkkulag.

²² Aria, ag gililnu ukku eblaih laippu ele, ag dahil mettid haknu peh lag bitobppanu, ulah qaban uɗitteppanu daatte amu, ag amunu hewona,

²³ amu ag gililnu ukku aɗit laa ele, dahil mettid haknu peh lag bitobppanu uttug aɗitppa gililnu ukku daattep qaɗelahppa daaglahnu ele hekkulag.

²⁴ Gililnu ukku aɗit laih uttugppanu amu, aa anen anen gililnu ukku aɗit ouqak daaglahnu, gililnu ukku laa oh ad laippu daatte amu, gililnu ukku aɗit imuppa ad aɗit dayeɗ! Igippa amu ag ring laippu daakkunu, aben ele bappaidkkulag. Ag gililnu ukku aɗit amu, anamib heig!

²⁵ Ag amu hekkulag amunu, dahil mettid haknu peh lag bitobppanu gililnu ukku eblaih ewam ele daappeg, diig ɠagattag daakkunu tatap silwappa hak am 16 aakku daaglag. Gililnu ukku laippu waappa amu diig ɠagattag daakkunu tatap aɗit aakku daaglah.

²⁶ Ag amu oh hena, ag ad akasia aon, ag ad emaitak dayaknu gililnu ukku gamagppa mekkulagnu heig! Ag gilil laa, am laih ulah yau uɗitteppanu daatte amu, ag gilil amuppa emaitak maknu ad tanig ele hewona,

²⁷ aria, gilil laa, am laih yawalti uɗitteppanu daatte amu, ag gilil amunu ele tanig ele hewona, ag gilil laa, am laih qaban uɗitteppanu daatte amu, ag gilil amunu ele emaitak maknu ad tanig ele, ag amu ele heig!

²⁸ Ad emaitak maknu mekkulag amu, ad amu ag gilil gamagppa meppeg, ag gililnu elabnu melemel eleleppa dayeg!

²⁹ Aria, ag gililnu ukku amu oh golppa tonattona, ad emaitak maknu ad ele golppa tonadkkulag. Tonadna amu, ag ring gol laala, ag ad emaitak maknu gililnu ukkuppa qata-aqadkkulagnu ele heig!

³⁰ Ag amu hewona, ag dahil mettid haknu peh lag amu, dottog da ippa qaukoppa ippunidmi bianab ag qappeg!

³¹ Aria, ag amu hena, ag lamen okkai laa Oo Gun Ele, Oo Gunnab Ele makkulaknu hekkulag. Ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aon, ag lamen okkai amu akkeg! Ag hewona amu, ag lamen qaɗeppa bala koitaknu ag danab uɗat amu haknu doyak okkai ele madappeg, ag engel okkai-kerubim dottog lamen amuppa koitatteg!

^32-33 Ag anam babaittona amu, ag ad akasia aon, biidod waɗele hoin, ag gol aon, biidod tonattona, ag biidod diig ɠagattag daakkunu tatap silwappa hak waɗeleppa galatteg! Aria, ag gol huk laala hattana, ag huk amu biidodppa atulatteg! Ag atulattona, ag Oo Gun Ele, Oo Gunnab Ele makkulaknu lamen hukppa aihppeg na dayebeb, ag Tituanak Nainu Kunup kontrak inak ele lamen amu dimugppa, Oo Gunnab Eleppa meppeg dayaɗ! Am lamen amuam geha dahil mettid haknu peh lag amu oo gamagppa gilil bia dayebeb, lamen amuam Oo Gun Ele, amu Oo Gunnab Ele makkulak daakku.

³⁴ Amu ag Tituanak Nainu Kunup kontrak inak ele Oo Gunnab Ele, amuppa meppeg dayebeb, ag Tituanak Nainu Kunup amu ameg, amuam eheɗ haknu nob nau tiigppa iitta me elele medatte ippunadtte amu, ag ameg amu aon, Tituanak Nainu Kunup kontrak inak ele qaɗeppa meig!

³⁵ Ag amu hewona, ag balal ⌊epeɗiaknab⌋ heppig amu, ag balal amu aon, lamen Oo Gunnab Ele noobppa aihak daatte amu, ag lamen amu laih Oo Gun Ele, oo amuppa gilil laa, gilil amu laih yawalti uɗitteppanu daatte amu, ag gilil amu guguittak balal amu meppeg dayebeb, ag lam maattaknu balal aon, ag gilil laa, gilil amu ulah yau uɗitteppanu daatte amu, ag lam maattaknu balal gilil amu guguittak meppeg dayaɗ!

³⁶ Ag amu hena amu, ag lamen okkai laa, lamen amuam mettid haknu peh lagnu od oɗe tonakkunu daatte amu, ag lamen amu ele heig! Ag lamen amu hekkulagnu, ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, ag muɗi amu oh aon, ag lamen okkai amu akkeg! Ag akkona, ag keeke koitaknu doya autanab awak danab madappeg, ag lamen amuppa kobol kobol koitatteg!

³⁷ Ag amu hena amu, ag ad akasia aon, ag biidod tanig ele hoyadna, ag biidod amu golppa toneg! Tonona amu, ag gol huk hattana, ag lamen aihaknu biidod amuppa maattona, ag biidod anen anennu ɠagattag daaglagnu tatap tanig ele brasppa hattana, ag biidod amuppa galadkkulag,” awa aum.