Eksodas 23 - Nobonob Baibel

Danab ah ag akka akka ag kobol tutukku dim lamittaknu ɗo

¹ Aria, laa amu, laa ag hambuppuak nai laa mattiglag dayeb, ag nai genab iitta amu aib tuɗidppeg okkai meum! Amu danab nug nau heeb, laa ag nug hettoɗiakppa meppeg dayebeb amu, aria ag nug ehanidna, nai hambuppuak, ‘Nug eheɗ laa ii heum,’ aib appig!

² Danab kuɗum ag kobol eheɗ hekkulagnu dayeb amu, ag laa ag ahilag kobol amu aib dim lamidppig! Aria, haen danab kuɗum ag hettoɗiakppa ahan, nai doya mala hettoɗia epeɗia elele mettaknu kobol heppeg na qekkunu nai kuɗum madippeg amu, ag laa, ag amu dilag nai am aib dim lamidppig! ⌊Iitta. Ag nai tutukku aakkuib mattieg!⌋

³ Amu danab laa ag daɗek danab laa hettoɗiakppa meppeg, ag danab amu, ib tutukku iittappa ehanidkkulagnu nai aib kabolippig. ⌊Iitta. Ag nai tutukkuib mattieg!⌋

⁴ Ahilag kekeɗ laanu donki, o makau okkai ebehi ele aɗppanu oola doa, ukka oiyebeb anidna amu, aria ag aon eɗun, mameg toppa ukkeg!

⁵ Amu ag laa, nug ahilagnu nau ninig ele dootte amu, ag nuhig donki, o makau en mawa oiyaya, na qa niieb, mameg nug eɗua ahakkun heebeb anidna amu, aria ag nug ehanidppeg ahaɗ! Ag amelagib aib anidnan gobeppeg, nug wanppa niiom.

⁶ Daɗek danab laa nug hettoɗiakppa dayebeb, ag nai doya mala hettoɗia epeɗia elele mettak kobol dim lamidna heig! Ag nug am daɗek doon, ib amu dim lamidkkulagnu aib uuppig!

⁷ Danab ag danab laa hettoɗiakppa mekkulagnu henana, ag nai hambuppuak nuhignu madippeg amu, aria ag laa amu, ag aib amu dim lamidna, nai amu ele madippig. Am danab tutukku nug eheɗ laa ii heum dayeb amu, aria ag nug hamu hettoɗiakppa mena, nug aib qeppeg mauhom. Aɗinu? Da ⌊Yawe, da⌋ danab nug beɗuppa aab ele amu, da nug hettoɗidppi, nug padal mekku.

⁸ Danab nug hettoɗiakppa nai hambuppuak genab daakkunu lokkumakppa eheɗ haknu ehanittak mattaknu ab amu, aria ag men doɗo amu aib aoppig. Aɗinu? Kobol anam, amuam he, hettoɗiakppan danab okkai dilag dabmak, amu danab laa dilag dabmak ele he kaboliattette, genab tutukku hak danab dilag nai ele he, kaliak daatte.

⁹ Ag laa nug wan laihnu danab, ag nuhignu kobol nau aib heppig. Aɗinu? Anukka ag Israel ag Isip appa wan laihnu danab ah daappig amunu, ag wan laihnu danab ah ag aɗi uug digdig dootteb amu, ag amu aakku dootteb.

Sabatnu ɗo

¹⁰ Amu ag maɗ eblaih laippu ele, ag maɗ amu anen anenppa, ag datta ee eppan, ee meu amu aon qagmena ⌊lakkulag⌋,

¹¹ amge maɗ ebqak eblaih aɗitppa ag anam ii hemana; wan ele ii buumna. Iitta. Ag uuppeg, wan hik awaɗ! Amu ee maɗ amuppa nukka bette ele amu, ag aib aoppig! Ag uuppeg dayebeb, daɗek danab ah ag oolagppa daatteb amu, ag amuppan ee aon lappeg ukkeb, nakok laa dayeb amu, doɗ dakkuɗ ag aon lakkulag! ⌊Amge ag wan mameg aɗi amu, ag maɗ amuppa ee amu ii aomna.⌋ Amu ag grep dad, Olip dad ele, ag anamib hekkulag.

¹² Ahilkad donki, ahilkad makau okkai ebehi ele, ahilkad begbeg maɗi nid, amu wan laihnu danab ele amu, ag oh hik aon, ɠagattag bau aoglagnu, mettid ohppa amu, ag deɗ eblaih laippu ele uɗat hekkulag, amge deɗ eblaih aɗitppa amu, ag uɗat aib heppig!

¹³ Nai oh da ag matten, amelagppa ami amu, ag tutukku doon, dim lamitteg! Ag kayak hambuppuak aib unuqidnana, onilkad ele aib diippig. Amuam gunnab.

Hobul ewam haknu ɗo

¹⁴ Maɗ anen anenppa amu, ag haen ewam ag da noolppa uɗina, da dabmeɗanna qagmak gamag ahak ele hekkulag.

¹⁵ Hobul amu laa am Bret Yis Iitta Lanaknu Hobul Nakok. Ag hobul amu gamag ahak ele hena, da ag Israel amelagppa haknunab ami, amubia ag bret yis iitta deɗ ebqak eblaih aɗit ele lakkulag. Da ag amu hekkulagnu haen tituanmippa hekkulag. Da haen tituanmi am kalam onig Abib, kalam amuppa ag Israel ag Isip uun uɗippig amunu, ag kalam amuppa hobul amu heig! Ag amu henana, ag ɗo hamu mettak dahilnu aon uɗiglagoitte. Ag hamu aib uɗippig.

¹⁶ Hobul laa amu Ee Tatam Oɗue Digma Awaknu Hobul. Ag hobul amu henana, ag datta ee ebappig, meu tatam oɗuom amu, ag meu amu aon, amuppa hobul imu gamag ahak ele heig! Amu hobul laa am Pehppa Dayaknu Hobul. Ag hobul amu maɗ batakppa, ag ee oh meu aotteb haenppa, ag hobul imu gamag ahak ele heig!

¹⁷ Danab oh ag maɗ anen anenppa da, da Naɗi Yawe, ag haen ewam amu da noolppa uɗina, ag hobul amu heig!

¹⁸ Aria, haen ag doɗ laa main meɗanna amu, ag bret keeke, yis ele heppig amu, ag amu doɗ main meɗattebnu tiig ele, ag keeke aɗit amu mana mettak laippuppa aib main meɗappig. Laa amu, ag da dabmeɗanna qagmak gamag ahak ele henana, ag doɗ main, da meɗatteb amu, ag doɗ amu ittag meppeg dayebeb, butti buttua aib meɗappig. Iitta. Ag gemu main meɗeg!

¹⁹ Ag ee tatam oɗutte ele, ag ee amunu laih enanag aon, da Yawe, ahilag Kayak, ag ee amu aon, da laulppa uɗieg! Ag meeme nag, anignu huhppa aib badippig.

Yawenu engel ib bappaidtte

²⁰ Doyeg! Engel laa nug ag dabmadakkunu, nug geha ag omalatteb gona, wan da ahilagnu bappaidmi ele, ag amuppa tekkulagnu, da engel amu mei, nug ibppa anuqa, ag noolag awa gotte.

²¹ Ag nug nai akku amu, ag tutukku doon dim lamitteg! Ag nuhig nai aib tabappeg neum. Aɗinu? Da onil nuhigppa daatte amunu, nug danab ah dilag nai tappenak amu, nug amunu hamu ii dooma. Iitta! Nug bu madakku.

²² Amge ag nai nuhig pehettaknab doon dim lamidna, keeke oh da ⌊nug oɗeppa⌋ akkul bia hekkulag dayeb amu, aria da geha kekeɗ ahilagnu kekeɗ daappi, laa ag ahilag ib oo nekkulagnu hetteb ele amu, da ahilag ib oo nekkul.

²³ Aɗinu? Amu engel dahil nug geha ag noolagppa anuqa ugakka, ag omalatteb gona, ag Amo, Hit, Peres, Kanan, Hiwi, amu Jebus aɗi dilag wanppa teppeg, da geha heppi, danab amu ag oh iitta mekkulag.

²⁴ Ag amu dilag kayak hambuppuak noolagppa aib dup nona binalag meppig. Ag kayak hambuppuaknu dabmak ele aib dim lamidppig. Ag kayak hambuppuak dottolkad aoɗna, maduduɗadna, heppeg nauhppeg, men gappi ele heppeg nauheg!

²⁵ Ag daib, da am Yawe, ahilag Kayak, ag daib da noolppa dup nona binal mekkulag dayeb amu, da ag ena itatte, ag ee madakkul, le ele madakkul, amu da ahilag oɗe ele heppi, iitta mekku.

²⁶ Laa amu, da ah oolkad ele ena ehanadppi, ag nid awak haenppa aakkuib nid aoglag. Am da heppi, ah, danab ele oh ag nid menuglagnu elele daaglag. Ele amu, da heppi, ag oh paha ii mauhmana. Iitta. Ag mauhkkulagnu haenppa aakkuib mauhkkulag.

²⁷ Da ag noolagppa anuqe ukke heppi, ahilag kekeɗ, ag ag ele ban hekkulag amu, ag eheɗ nau baɗappeg, ootot aqeb, ag eɗun, oolna gokkulag.

²⁸ Da heppi, danab ag uun okkai baɗatteb bia, Hiwi danab, Kanan danab, Hit danab ele ag eheɗ baɗappeg, ag Israel ag ag lamadkkulag.

²⁹ ⌊Amge⌋ da heppi, ag maɗ laippuppaib ii lamadmana. Iitta! Da anam heppilob amu, geha wan am hele-ettak daalo, doɗ dakkuɗ ag ele geha kuɗum appatna, ag ahan, ag eheɗ hattalob amunu, da anam ii hepa.

³⁰ Da pahanab amu ii hepa. Iitta. Da heppi, ag Israel ag wan anen anen amu dilag danab ah hubhub lamadna, ag Israel ag appatna, kuɗum benana, ag geha wan amu ukka batak, ag wan amu oh aoglag.

³¹ Am da ahilag wan tom amu oppatppi, tom amu laa am yu oɗe onig Akaba, appanu digma ukka, yu naɗi Mediterenia appa batak daakku. Tom laa am le naɗi Yupretis laih yawalti uɗitteppanu, appa digma ukka, atu taɗakppa laih yau uɗitteppanu, appa batak daakku. Amu danab appa daatteb amu, da geha ɠagattag ag ag eɗadkkulagnu madakkul amunu, haen ag wan amu ooppa nona, ag danab amu lamadppeg gokkulag.

³² Ag danab appanu ele ag aib nug tituanna nai qagappig; ahilag kayak hambuppuak ele amu, ag ag ele aib nug tituanna nai qagappig.

³³ Ag hipunin dahilppa hemananu, ag danab gemu appa daatteb, ag ag uuadppeg, ahilag wanppa aib daappig. Aɗinu? Ag uuadppeg daaglag dayeb amu, geha ag ag eeɗadppeg, oolag eɗueb, ag kayak hambuppuak ahilag amu noolagppa dup nona binalag menana, hipunin hekkulag. Binalag meppeg amu, kayak hambuppuak amu ag heppeg, ag pelem nauppa tekkulag.” Yawe Nug ɗo amu oh Moses amegppa aum.