Eksodas 11 - Nobonob Baibel

Moses nug Isip nid ⌊danab⌋ tatamnu oh ag mauhkkulagnu, Paro amegppa aum

¹ ⌊Amu gatatu teppu ele amu na dayeye, haen amuppa⌋ Yawe Nug Moses amegppa inam aum. “Da geha Paro, amu nuhikkud danab ele, da ag uug naunab laippu laa ele madakkul. Madappi, amu dimppa nug geha paɗatteb gokkulag. Aria, haen nug paɗatteb gokkulag amu, nug oo maɗoɗ ele dayaya, ag uuatteb ii gomana. Iitta. Nug geha ag wan imuppan oh lamatteb gokkulag

² ⌊amunu,⌋ na gemu Israel danab ah oh, danabib iitta, ah ele, na ag oh amelagppa, ag Isip danab ah miag daatteb amu, ag ag gumadna gona, gol balanu, silwa balanu ele oɗ mattaglagnu appe doyeg!” awa aum.

³ Aria, Yawe aum bia Israel anam heppig haenppa amu, Yawe Nug he, Isip danab ah ag Israel dilagnu, ag maɗi nid maɗi ah ele bia ii anadppig. Iitta! Ag danab ah ena anadppig, amu Paronu ehanittak anuqak danab ele, ag Mosesnu, nug am danab okkainab ele dooppig ⌊amunu, ag keekenu appig amu, ag hagakka ii aoppig. Iitta ag appig bia madappig⌋.

⁴ ⌊Amge amu ii bak haenppa, Moses Nug Paro ele daayya,⌋ nug Paro amegppa inam aum. “Yawe Nug atte. ‘Gemu tuqan imuppa, tugmag anam, da geha laih Isip dilagppa talilie oikkul.

⁵ Da oippippi amu, Isip dilag nid danab tatamnu amu, ag oh mauhadkkulag. Mauhak amu Isip danab oh tonadkku. Ge! Paro, nug king abenppa daatte, nuhig nid danab tatamnu amu, nug mauhkku. Amu Isip danab ah laa oh ele, laa ag okkai daatteb, laa ag nakok okkai daatteb, amu laa ag okkai iitta daatteb ele, ahilkad nid danab tatamnu amu, ag oh ele mauhadkkulag. Anam ukkeb ukkeb, begbeg maɗi ah bret haknu ee aeg ganuɗtteb ele, ahilkad nid danab tatamnu amu, ag ele mauhadkkulag. Amu doɗ makau keeke, nalkad ⌊dawai⌋ tatamnu ele, ag mauhadkkulag.

⁶ Am laih Isip ohppa danab ah oh ag geha uug okkainab doonna, huanak qanaglag. Anukka qanak anam laa Isip wanppa ii beum; amu dimppa ele, anam baula ii bema.

⁷ Amge geha, haen amuppa Israel danab ah daattebppa, aɗitai keeke nau laa Israel danab ah dilagppa, ahilkad doɗ dilagppa ele iinab bema. Oqotti wak, qai gamɗu qak keeke, keeke amuam nakok laa appa iinab daama,’ awa atte. Keeke anam bekku amunu, na amuppa dookkut, Yawe Nug ag Isip, ahilagnu ena ii doyaya, Nug Israel dilagppa ena dootte.

⁸ Keeke amu beeb, nahipad ehanittak anuqak danab imu, ag geha uɗin, da noolppa gomelna, ag ɠagattag inam akkulag, ‘Na ukke! Na nahipad danab ah ele, ag pahanab ukkeg!’ Aria, keeke amu oh ba maleb, dimppa amu, geha da Isip uukkul,” awa aum. Moses nug anam awowa, nug oo nauhak nau doyaya, nug Paro uuitta, dimittim ukkom.

⁹ Yawe Nug matu keeke amu oh ii nak haenppa Moses amegppa ⌊nai laa aum amu, nai amu aakku meu oum.⌋ Nug aum. “Paro nug geha nahip nai ii doya hekku. Nug anam hekku, diig amunu da geha uɗat ɠagattagnab ele, da amu laala Isip dilagppa hekkul,” awa aum.

¹⁰ Moses, Aron ele amu, aa uɗat ɠagattagnab ele kuɗum Paro noobppa hepiɗ, amge Yawe Nug he, Paronu dabmak aakku ɠagattag eppa dayom amunu, Paro nug he, Israel ag nuhig wan, am Isip wan, ag wan amu ⌊paha⌋ uun ii goppig.