Eklisiastis 6 - Nobonob Baibel

Enub amuib danab ehanidkkunu elele iitta

¹ Aam waappa eheɗ laa danab ah uug okkai madatte anidmi am inam.

² Kayak Nug danab laa enub keeke, binag ele medatte. Danab amu nug keeke attemunab oo hette amu, nug aakku aɗatte, amge Kayak Nug danab amu nug keeke amunu gamag ahak laa dookkunu ii ehanidtte amunu, nug mauhe, danab nug ii dootte ele, nug awa, amuppa gamag ahak aotte. Kobol amuam gaɗappa, unuqagppa ele anttak laippu iitta; am eheɗ nau laa aakku.

³ Danab laa nug haen elabnab wanppa oikkutai, nid 100 menuadkkutai, amge nug bau dayak nuhignu ena dookkunu elele ii daatte dayeb, nug mauheb, ag kobol enappa ii boumkkulag dayeb amu, dahil dabmakppa nid laa anig ooppa mauhe, anig menue dotte, amuam kobol amu eɗidtte; am kobol ena.

⁴ Aɗinu? Nid laa nug mauhe, anig menue dotte, nug aben gaɗappa, unuqagppa ele anttak laippu iitta, nug amuppa ⌊bau iitta⌋ doa, nug gatatuppa ukke, danab ah nug onig ii ataɗtteb.

⁵ Nid amu nug aamnu amahlak nakok laa ii antta, uug, o keeke laa ii anidtte, me nug maɗoɗ anidtte. Danab nug maɗ kuɗumnab wanppa daya, nid kuɗumnab menuadtte, amge wanppa dayak nuhignu ena ii doya oitte ele amu, danab amu nug maɗoɗ ii anidtte.

⁶ Ge, danab amu nug maɗ 2,000 daalolob, amge nug enubnu gamag ahak aokkunu elele ii daalo amu, gadonnab gadon. Nuhignu am ena iitta. Aɗinu? Danab ah oh ag menuak dimppa ahilag haenppa mauhak abenppa iite gotteb?

⁷ Danab oh ag ee elele aoglagnu dabmenana, ag diig amunu uɗat henana daatteb; amge enug am ag baubau aqadtte

⁸ amunu, danab nug doyak dabmak ena ele, nug danab Kayak dab-ii-maama ii dim lamidtte ele ib attemppa eɗidtte? Daɗek danab nug laa noolagppa attem attem hekkunu dootte amu, doyak amuam aɗi keeke ena danab amu medatte?

⁹ Danab nug keeke aɗom daattenu elele dootte, amuam kobol ena; danab nug hanhan keeke baubau aokkunu dabmette amu, kobol amuam ena iitta. Amu ele am gaɗappa, unuqagppa ele anttak laippu iitta; am danab nug ulah aɗakkunu, ulah dim lamidtte, am amubia daatte.

¹⁰ Aɗi keeke daatte amu, keeke amu oh am onilkad ataɗattak daatteb; amu danab ag attem daatteb am miag atia dayom. Kayak Nug ɠagattag oh ele, amu laa Nug ele nai apeɗ ona, apeɗ dokkunu elele iitta.

¹¹ Nai mattiak huanak daatteppa amu, meu nakokib daatte; amunu kobol amuam auntai laa ii ehanidtte.

¹² Aɗinu? Danab nug wanppa dayaya oitte, nuhig haen wanppa daakkunu am tutuib. Daya, gaɗappa, unuqagppa ele anttak laippu iittanu oiyak nuhigppa am aamppa danab itotog bia amunu, auntai laa nug danab laanu, nug nuhig wanppa oiyakppa nuhignu aɗi keeke am ena ab dookkunu elele? Auntai laa nug danab laa mauheb, aam waappa aɗi kobol nuhig mauhak dimppa bekkunu daatte akkunu elele? ⌊Anam amunu, nai nai mattiak kuɗum am meu iitta.⌋