Amos 9 - Nobonob Baibel

Yawe Nug Israel bu madakku

¹ Da, Amos, da Naɗi Nug qaɗab guguittak dayeye anitti, Nug da amelppa aum. “Na lagnu biidod menppa hak ikki huanaknab oppe, lag mawaknu ukku uɗalebeb, lag oh na qaɗ! Heppe, lag na qa, danab ah tonalatta, laa aqatteb mauhppeg, laa ii mauhkkulag ele amu, da heppi, kekeɗ ag qep elabppa aqappeg mauhkkulag. Laippu laa oola ii goma; oh mauhkkulag.

² Israel danab ag wan buun, wan ooppa, mauhak daattebppa wakkulagtai, amge da ag appanu eɗuen diiadkkul. Ao, Israel danab ah ag habppa tekkulagtai, amge da ag appanu eɗuen diien nekkul.

³ Israel danab ah ag qauko Karmel igippa tena, da anadpanu appa lokkumna daaglagtai, amge da ag appa mattialatte anatten, aɗualadkkul. Ao, Israel danab ah ag yu ooppa unuqagnab nona, da anadpanu appa lokkumna daaglagtai, amge da haknunab appi, appa yuppan mat nau ag emaladkku.

⁴ Israel danab dilag kekeɗ ag eɗadna lamadppeg, ag diia ukka laih me dayak danab ah wan laappa gona daaglagtai, amge appa da haknunab appi, kekeɗ ag qep elabppa aqappeg mauhkkulag. Da ag neekkatten dayeye, da ag eheɗ hadakkul. Da ena ii hadapa.” Yawe Nug anam awa atte.

⁵ Naɗi, Nug Yawe Nukka Ɠagattag Oh Ele, Nug wan lauɗitte, wan le mette; Nug anam he, wanppan danab ah oh ag mahitteb; Nug he, wan oh am le Nil, amuam Isipnu le okkai, am titiɗa ba, eɗua hiɗatte, amubia hetteb.

⁶ Naɗi, Nug Yawe Nukka Ɠagattag Oh Ele, Nug lag enanagnab, attan tak nuhig hab attan appa batak babaittom; lag amunu men ukku wanppa daatte. Nug yuppan le ita, wanppa gokkaɗe, le amu wan tonatte. Nug onig am Yawe.

⁷ Amu Yawe Nug inam atte. “Ag am Israel, amge ag dahil neekkakppa Kus danab eɗadttebte? Da ag Israel, da ag Isip wanppanu diiatten bemi, amge da Pilistia danab Kritnu ele diien bein, da Aram danab Kirnu ele diiatten bemi.

⁸ Antte! Ag Israel, ag hipunin heegeg, da Naɗi Yawe, da amu anidttem. Da heppi, ag padal meppeg, ahilag wan am wanppan wan laa oolagppa iinab daama, amge da Jakop buɗub ohnab heppi, iitta ii memana,” awa atte.

⁹ Yawe Nug inam ele atte. “⌊Amuam genab bekku.⌋ Aɗinu? Antte! Da haknunab nai ain heppi, ag Israel buɗub ag epeɗiak uug ele wanppan wan laa oh ele laippu aon daaglag. Epeɗiak amuam danab nug ee aeg, menetit ele qagmak laippu daamanu uɗalakppa heehe, men laippunab laa ee aeg daakku abenppa iinab daatte, amubia ag daaglag.

¹⁰ Dahilad danab ah oolagppa aun aɗi ag hipunin danab ah daatteb ele, ag qep elabppa mauhkkulag. Ao, ag danab ah oh ag, ‘Uug ihinigppa ii bema. Ig uug laa uɗa ii temata,’ atteb amu, ag oh qep elabppa mauhkkulag,” awa atte.

Yawe Nug Israel ehanadkkunu nuhig nai ɠagattag qetta, nai imu aum

^11-12 Yawe Nug atte. “Ag Israel, ag Edom danab oɗo yaak daaglag gumaglagnu, ag wan atu laa oh danab ag anukka da onil waappa daappig ele, ag ag ele gumaglagnu da danab lag na qeum bappaitte, eɗua enanag daatte, laih atten nauhak daatte bappaitte, dayom bia eɗua daatte, da amubia ag Israel, da ahilagppa hekkul.” Yawe, Nug keeke amu oh heeb bekku amu, Nug anam awa atte.

¹³ Amu Yawe Nug inam ele atte. “⌊Israel dilagppa⌋ haen laa uɗitte amu, da heppi, ee aeg ahilag am meu huanaknab okku. Ag ee aeg tuɗidna aonna, ii malappig haenppa, wan buuak haen dokku. Amubia ag keeke tuɗidna eppanna, ii malappig haenppa, grep meu tabappeg, leppu aoglagnu haen dokku. Amu ele, ahilag grep dad am qauko okkai daugppa daan, meu huan okkulag. Ao, grep dad am qauko nakokppa daan, meu huanaknab okkulag.

¹⁴ Da heppi, dahilad danab ah ag wan laalappa gona, diia ukka laih me dayak danab ah daaglag amu, ag eɗun, ahilag wanppa uɗin daaglag. Ag aab okkai kekeɗ loppaɗppeg nauhak daaglag bappaidna, aguppa daaglag. Ag grep dad eppan, ag wain aon lakkulag. Ag dad eppan, ee appanu aon lakkulag.

¹⁵ Da heppi, Israel danab ah ag ahilag wanppa daaglag, danab nug ad laa eppe, ba daatte bia. Da heppi, laa nug Israel danab ah ahilag wanppanu baula diia ii goma. Da wan amu ag mattami.” Yawe, Nug am ag Israel, ahilag Kayak, Nug anam awa atte.